路邊營地VS山上營地？嶂上猴塘溪穿梭山林眺海景西貢郊遊徑1小時達榕樹澳

香港露營地既然已經重開，41個漁護署官方營地嘅營位固然被秒搶，想要拍拖兩個人露營真係唔容易。今次編輯前往西貢郊遊徑，由海下路至榕樹澳，穿梭山林之中，推介2個毗鄰郊遊徑嘅露營地，一個位於馬路邊，另一個則處於山上，到底邊個少人啲、邊個好啲呢？

由西貢市中心起步，一程小巴路線可以直達今次編輯所講嘅兩個營地，包括猴塘溪營地、嶂上營地，車程大概20分鐘。

猴塘溪營地

於海下路落車後，猴塘溪營地標誌馬上映入眼簾，皆因營地位於馬路邊，「猴塘溪」指示牌亦清晰可見。猴塘溪營地位於西貢西郊野公園，等同大灘營地、黃石營地等，只不過位置係海下路中段，斜對面為漁護署管制站。而向下行就可以步行進入猴塘溪燒烤場範圍，而營地就毗連燒烤場，穿過燒烤場就會到達營地範圍，兩者之間有一個涼亭分隔。

事實上猴塘溪營地營位唔多，只有寥寥幾個，大概得4至6個營位，足夠20至30人使用，每個營位都有燒烤爐、枱櫈。基本上，每個營位都有獨立Area，足夠使用。查探當日，人流唔多，全場不足10個，但編輯發現有人被逼於燒烤場紮營，到底點解？睇埋落去你就知。

不過，編輯實地查看營地情況時，發現咗一個問題，當日每個營位都有一個帳篷霸佔，而每個營位都係無人，一個人都無，燒烤爐亦無人使用，只有中間其中一個營位有數人起咗天幕，聚集一齊。估計係同一班人分開於唔同營位起營，擴大自己人嘅Area，疑似為咗唔俾其他人進入營地範圍起營。

編輯當時只係路過查探營地，卻被年輕人們怒視，甚至有人開口指營位有人，似乎唔想有人插針，相對於年紀較大或經驗豐富嘅營友，新生代營友似乎欠缺友善，一句Hello都唔會講。編輯對於呢種情況並無意見，亦無打算評價，因為營位的確係先到先得，而且據漁護署官方資料亦指每個營位可容納一個帳篷，從官方規矩去睇的確無錯，能走入灰色地帶。

毗鄰海下路嘅猴塘溪營地係新手露營場之一，營地都算平坦，但基本上都係泥地。營地遍佈林蔭，亦可以接收手機網絡訊號，但營地範圍其實無乜景觀。想睇景嘅話，可以前往營地對面，經過洗手間之後，上行至直昇機停機坪，就可以登上頂端賞景，位置可以眺望黃石碼頭方向。

嶂上營地

從猴塘溪營地折返海下路，可以前往嶂上營地，不過嶂上營地位於深山高原，所以必須走山路先可以到達嶂上營地。而嶂上營地同樣屬於西貢西郊野公園範圍內，營位亦唔多，只有一下兩個草地範圍。

雖然嶂上營地位處山上，但相對猴塘溪營地嚟講，好處係有士多直接當補給站，只要你唔怕上山路，拾級而上，就可以帶少啲飲料，到士多先作補給，甚至可以歎士多出品嘅山水豆腐花，該士多已開業超過30至40年，食物、飲品都係從山下運至嶂上營地位置。

嶂上營地接住嶂上郊遊徑、麥理浩徑，兩條路線都可以直抵嶂上營地，北潭路上山會比嶂上路線短啲。今次編輯從海下路猴塘溪口嶂上郊遊徑起點出發，沿途盡是林蔭幽靜山路，但只要攀上梯級之後，上行約1小時就可以到達嶂上營地範圍。

營地本身係嶂上村，以耕地為主，只係後來70年代起多數村民已經搬走咗，耕田嘅地方就演變為露營地。故此，營地位置有兩隻牛隻，要前往嶂上營地亦需要留意營地內係有牛隻原居民。

原本營地係位於郊遊徑至麥徑嘅路段，而旁邊嘅平坦草地並非官方營地，無固定營位，但部份營友會選擇此地紮營，只係草地容納到少數帳篷，唔能夠俾太多人同時露營，而且低窪區域有水浸風險。至於目前官方嶂上營地，則位於草地之上，比較適合有露營經驗之人，始終位置係深山高原，必須經山路前往。

非官方草地一帶環境清幽，屬於高原濕地，到處畫面青蔥翠綠，營地被一片綠林包圍，恬靜舒適，附近更有多個山峰可達，比如係石屋山、坳門、畫眉山等，三山環抱，附近高山圍繞，層巒疊障，四通八達，故既可以從海下出發，亦可以從北潭涌、北潭凹起步，其實若係正式營地，絕對係五星級營地。

不過，正式官方營地邊有咁好環境吖！官方營地本身位於路面，於2022年中下旬搬到山上，需要走過一小段山路，先可以到達營地，位置係剛才士多對出草地之上。全新嶂上營地只係佔一個小山頭，面積極細小，一眼睇晒，地面為石地及硬地，設施極少，只有4個營位，有3個垃圾桶，營地內並無燒烤爐，每個營位只有1張極矮嘅枱同4張極細小嘅石櫈，瞬間由五星級變成一星級營地。

由嶂上營地一端下行，向榕樹灣方向走，前行不久會到達一個小山丘平台位置。從山鄉頂端俯視，可以俯瞰山腳榕樹澳村、漁排，甚至企嶺下海、馬鞍山一帶風景，當中企嶺下海全景一覽無遺，景觀都算遼闊，令人豁然開朗。

榕樹澳、嶂上一段路多為石級山路，地面滿佈樹葉，顯然走過嘅人唔多，所以相對原路折返係略有危險，路況明顯，只係需要穿梭山林。嶂上營地至榕樹澳一段路牽涉到一道有名嘅天梯，皆因從榕樹澳起步上山比較辛苦，石級陡峭，需要攀上天梯，但由嶂上下山則會相對輕鬆。從營地起步，下行1小時左右就能夠折返榕樹澳村，整段路線又唔算太複雜。

穿過榕樹澳村，再穿過引水道，可以近距離眺望榕樹澳漁排，亦可望黃昏暮色，畫面優美。而一直前行，可以折返西沙路水浪窩方向，由榕樹澳村起步，至西沙路水浪窩大概需要預留約1小時步程。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於西頁市中心乘搭小巴路線7號，向海下方向，喺海下路中途猴塘溪落車，就會到達猴塘溪營地。

❷ 從猴塘溪營地折返約5至10分鐘步程，就會到達嶂上郊遊徑入口，上行45分鐘至1小時就會到達嶂上營地。

❸ 猴塘溪營地位於海下路馬路邊，而嶂上營地就位處山上，必須走山路，而且係上行一段時間。

❹ 兩個營地都有洗手間，猴塘溪營地對面有標準洗手間，而嶂上營地就只有旱廁。

❺ 想睇景觀嘅話，於猴塘溪營地過對面馬路，經洗手間上行至直昇機停機坪就可以眺望黃石碼頭方向景色；而嶂上營地向麥理浩徑第3段往榕樹灣方向走，繼續走嶂上郊遊徑，可以俯瞰榕樹灣一帶風景。

❻ 猴塘溪營地雖然位於路邊，但無補給點，而嶂上營地反而有一間士多，名為許林士多，並非漁護署設施，通常周末假日先營業，查詢電話為2328 2456。

❼ 注意海下路嘅小巴路線最後班次大概為18:25至18:35，視乎平日定假日。

❶ 想要原路折返嘅話，又怕小巴路線班次疏落，可以返回北潭路，乘搭巴士路線94,96R,289R，甚至直接到黃石碼頭上車，郊遊徑起點至碼頭約20分鐘腳程。

❷ 若唔想走回頭路，就要預多1小時前往榕樹澳離開，嶂上郊遊徑終點就位於榕樹澳村，村口有公廁，只需沿引水道、海旁走，海邊可見榕樹澳漁排。

❸ 由榕樹澳村返回西沙路水浪窩，步程約需45分鐘至1小時。

❹ 西沙路離開時，可以乘搭巴士路線99,99R,289R,299X 返回沙田市中心或馬鞍山。

❺ 謹記愛護環境，自己垃圾自己帶走。

❻ 營地係公家地方，記得唔好私下霸佔營位。

❼ 嶂上營地有牛隻，亦有狗隻，要有心理準備，亦唔好騷擾或攻擊牛隻，同時最好收好食物，避免牛隻掂到。

EATWO

Miss A

新蒲崗濃姐加持、米線生力軍成排隊店！秋拾小食完勝米線﹕蝦多士／八味豆腐／炭燒豬頸肉／脆炸韭菜餃