火鍋店616班底接手保留經典糯米包/魚翅餃大圍舊式茶樓客香邨開足24小時

舊式茶樓係本地愈來愈罕見嘅產物，更不用說同路人嘅舊式茶樓，今年初就有一間街坊舊式茶樓被收購，正式由人氣火鍋店616接手，店內有多款非常罕見嘅傳統點心，而茶位人均則只為$5，而且現時為24小時營業，方便大家隨時飲夜茶、食點心，晚市亦有各款鑊氣小炒，如果拍拖兩個人突然想去吓舊式茶樓飲吓茶，亦可以去由客香邨酒家演變而成嘅616客香邨。

位於沙田大圍嘅客香邨，係一間屹立逾25年嘅舊式中式茶樓，供應點心、小炒，舊舖因結業而易手，最終由火鍋店616接手，保留咗唔少傳統點心，而且一星期7日皆24小時營業，吸引區內街坊前往歎茶。每款點心價錢同現時一般酒樓無異，分為小點、中點、大點、優點、特點，由$16至$30。

火鍋店講求湯底同食材新鮮度，而點心店則純粹重視蒸點同調味，老實講點心比火鍋材料高技巧，當中部份傳統點心已愈來愈少人認識，能夠延續舊式茶樓風味，已經難得。

招牌之選有鹽香雞粥$48，不過中午時間就未有供應，而斗門蝦餃$30、金牌燒賣$25 都為必叫點心，粒粒顆頭圓潤飽滿，只係略嫌燒賣內嘅豬肉、蝦仁比例不均；而薑蔥牛柏葉$25 比較淋身，份量唔少，有爽口感覺，入口唔會韌。

傳統點心則平時比較少見，例如鵪鶉蛋燒賣$30、白玉灌湯餃$23、香煎家鄉鯪魚餅$23、鳳城糯米包$19、魚翅餃$23，都係其他酒樓鮮見之物。魚翅餃為中式點心，本來係以魚翅拌豬肉、蝦肉等作餡，但後來演變成素翅或粉絲，餃子味道比較清淡，可以講話無味。而鳳城糯米包有指來自港式茶樓，目前更加係極罕見，以金黃色燒賣皮包裹，內裏為生炒臘味糯米飯，糯米飯相當香口，一籠3個蒸起後其實都足夠飽肚。

門口有一架點心車，內裏放有一盅兩件嘅蒸飯，每客盅飯為$30，都算係一個平民食堂，當中鳳爪排骨飯$30 份量適中，排骨件件有肉地，鳳爪略嫌唔夠入味，而飯粒則比較乾爽，唔夠黏口，加上甜豉油會比較好。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 原來叫客香鄉酒家，現時被616收購，叫616客香邨，本來有15:00至18:00為落場時間，現時則為24小時營業，為大圍匿內唯一夜茶選擇。

❷ 乘搭巴士路線46S,46X,72A,80K, 82B,82D,88,88K,249X 皆可到達大圍市中心，步程約10分鐘。

❸ 小點$16、中點$19、大點$23、優點$25、特點$30，香茗每位$5。

❹ 盅飯可加生蛋$5或煎蛋$8。

❺ 勿自攜食物或飲品，若自攜酒水，每瓶$60，啤酒每瓶$20。

❻ 點心小炒都可以外賣自取，除咗於店內叫外賣，亦可以打電話或Google form 落單，收到訂單後會自動確認，有問闐店方會打電話詢問，但留意取餐時間為18:00至02:00。

❼ 用app用落單，然後到櫃台埋單。

❽ 茶樓上面為住宅，需要減低噪音。