Hungry Monster +鳳德公園

【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠

感謝瀏覽我們的網站,很抱歉,由於網站發生故障,本頁文章部分內容暫時未能顯示,我們現正搶修當中,不便之處敬請原諒。

相關內容亦可到我們facebookMEWEYOUTUBE或IG專頁找到。

黃大仙區內良心食店唔多,野餐點亦甚少,今次就帶大家拍拖兩個人到黃大仙一個逾30年嘅街坊公園野餐,有一間熱狗專門店離公園只係2分鐘步程,而該公園以一個神話故事為主題,但其實公園非常騎呢,到底點解?

 

位於黃大仙嘅Hungry Monster,係一間以自家製熱狗為主嘅小店品牌,區內已經係第5間分店,不過目前只係得返3間分店,而黃大仙分店既係最新一間分店,亦有限定優惠嘅一間。店內以淺藍為主口調,只有一張張堂食枱,可以容納兩個人坐低用餐。



 

呢間熱狗店同齊柏林熱狗店有咩分別、係咪都係連鎖店呢?據資料顯示,Hungry Monster係由4位年輕人創立,以自家製熱狗為主打,再加上各種小食、自家製水果茶,不時推出季節限定,由100%香港製造。而店舖就係特許經營小店,總店則會定期確保分店食物水準同質素,情況如同7-Eleven,但成本較低,容易上手,有指大概$158,000就可加盟3年,適合初次創業人士。

 

步行至於1995年由市政局規劃並建成嘅鳳德公園,內裏有近30年嘅舊式特別裝飾,因為公園係以中國神話《西遊記》為藍本,當時劃分成6個區域,包括有五指山、火焰山、水簾洞、水晶宮、花果山、伊瓜蘇瀑布,唔知情嘅人大概會以為好霸氣,實有驚喜,但事實上呢個被設計成《西遊記》嘅公園非常騎呢!



 

小店熱狗口味並非傳統只有茄汁、芥辣、腸、麵包嘅配搭,餡料更豐富,比如係鐵板燒熱狗、鄉村風味熱狗、香蔥吞拿魚熱狗、芝士炸雞包,至於招牌貨就有熱溶芝士熱狗,套餐$56、單買$39,包含多重芝士、粟米、芝士腸、怪獸醬,麵包質感軟熟,但只係普通貨色,熱狗內有邪惡多層芝士,完全覆蓋芝士腸。

 

雖然Topping嘅芝士未至於可以拉絲,但入口都係軟淋淋芝士,溫暖芝士於口腔逐步溶化,整體幾香口。同時,亦有大條芝士腸,咬下口略有肉汁,而芝士內更隱藏粒粒微甜粟米、千島醬,令口感豐富。

 

至於新貨色就有怪獸炸魚柳包,套餐$46、單買$27,包含炸魚柳、生菜、怪獸醬,似足港版金拱門嘅魚柳Bell,魚柳外脆內軟,大小厚度適中,以大大塊生菜分隔炸魚柳、熱狗麵包,令油份未有滲透麵包內。怪獸醬唔太明顯,狀似千島醬,只係略微層次,



 

套餐嘅炸薯條比單買嘅芝士醬或shake shake粉薯條單調,只有一小包茄汁,薯條份量適中,的確香脆可口,而且係新鮮炸起,上手仍熱焫焫,薯條有薯香,並非如港版金拱門般為薯粉,但就鹹味重,粗身而脆卜卜,無燶邊,但食落就比較乾身,將喉嚨口水都抽乾,如果配搭更多醬就會更好。

 

飲品以台式為主,包含古釀冬瓜茶加$0、經典珍珠奶茶加$4,冬瓜茶香甜,珍珠奶茶亦略有茶味,珍珠煙韌,為正常珍奶味道,兩者甜度都唔會好高。

 

小食怪脆雞球$24/5粒,套餐加$12,雞球幾有驚喜,雞肉微脆,配搭千島醬,比熱狗更出色。其他有金莎雞軟骨、金莎單邊雞翼、千島雞棒、牛油粟米、炸芝士波,亦有薯條、炸雞拼盤可擇。



 

雖然劃分多個區域,但所有設計只係園內一啲裝飾,同公園設施基本上毫無關係,有啲甚至禁上遊人進入及接觸,實在難以令人印象深刻,連小朋友嘅遊樂設施都係無關係,除咗水簾洞有一道橋貫穿,勉強有實際作用,其他裝飾真係令人摸不著頭腦。

 

如果將各個《西遊記》特點同公園融合,情況會完全唔同,比如係金剛棒變成樓梯,火焰山變成搖搖板,水晶宮變成氹氹轉,又或者五指山變成滑梯或鋼架,公園會更吸引,唔再騎呢。

E.A.Tips :

❶ Hungry Monster分店目前有只有慈雲山蒲崗村道75號富祐大廈地下6號舖、粉嶺聯捷街1號榮福中心商場地下87及110號舖、太子大南街27-31號富威閣地舖,尖沙嘴加拿分道8-12號嘉芬大廈地下A1號舖分店已結業,而西灣河筲箕灣道57-87號太安樓地下A34A號舖分店已改名。

❷ 尖沙嘴店於2020年底開業,西灣河分店於上年4月開業,太子、粉嶺分店亦於同月相繼開業,黃大仙分店則最後於上年7月開業。

❸ 黃大仙分店有限定優惠,買滿$50會有一枚印花,一張印花卡只限黃大仙分店使用,印滿6個可換$19小食一客,印滿12個可換$22以下飲品一杯,印滿18個就可以換脆岩薯條一客,兌換日期截至2022年6月30日止。

❸ 野餐時,自己垃圾謹記自己帶走!

❹ 野餐要盡量使用可循環再用之餐具器皿。

❺ 可以挑選有長櫈嘅地方,會較方便。

❻ 有需要可自備小餐枱、小型露營櫈用餐,可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方,避免接觸人群。

❾ 野餐地同食肆最好距離不足15分鐘步程,以免食物及熱飲冷卻,有需要就自備保溫袋。

❿ 野餐時最好唔好完全除晒口罩,拉低口罩用餐時一定要拎住食物或飲品。

EATWO
Miss A
Hungry Monster +鳳德公園

Hungry Monster

慈雲山蒲崗村道75號富祐大廈地下6號舖
12:00 – 21:00
5538 0383

Hungry Monster +鳳德公園

鳳德公園

竹園鳳德道42號
06:00–23:00
2350 2680