【區區有小店】近飛鵝山獅子山！慈雲山3間街坊料理店歎高水準丼飯定食

提到慈雲山，有部份人連位置喺邊都唔知，但一講獅子山、飛鵝山，好多人都會清楚明瞭邊個方位，事實上慈雲山的確離獅子山、飛鵝山不遠，如果打算去拍拖兩個人行山嘅話，上山前後不妨去慈雲山搵吓食啦！今次編輯就先推介慈雲山區內3間小店，同樣以日式丼飯為主，價錢相宜，而且有水準，絕對係街坊小店。

（1）蒲點

第一間係離慈雲山南巴士總站最近嘅蒲點，為一間街坊店，近慈雲山毓華里，以日式料理為主打，包括丼飯，由年輕人創業，吸引眾多年輕市民幫襯。當中有咖哩吉列豬扒飯$52、原條滑蛋鰻魚飯$68，其實餸菜上用料不俗，而且炮製方式都可見水準，不過唯獨米飯於選材上略要扣分。

延伸閱讀﹕慈雲山年輕人美食蒲點大碗鰻丼有咩係美中不足？

（2）嵐屋

第二間係3間當中隱藏力最高嘅一間，位處樓梯之間，為一間日式居酒屋，主打串燒等燒物、炸物，其似丼飯、定食，基本上只有街坊會識得搵路過去。店內午餐相當抵食，有5款可擇，全部同價，人均$52，兩個人約$100埋單，確實超值。店內有如日本街頭小型居酒屋，套餐有咖哩吉列豬扒、照燒鯖魚、叉燒拉麵、照燒雞扒、芝士雞柳，含沙律、豆腐海帶麵豉湯，燒物明顯比拉麵有水準。

延伸閱讀﹕慈雲山真巷弄居酒屋嵐屋歎街坊價午市定食

（3）Katoya 加藤屋

第三間就係最多分店嘅連鎖店Katoya 加藤屋，係一間著名嘅快餐式日式牛丼專門店，最抵食之處就係價錢平，下午茶低至$20一個丼飯餐，即使鐵板飯餐亦只係$50零蚊。Katoya向來係平價丼飯，可揀牛肉、豚肉、雞扒，如果要類比，就係同吉野家比較，牛肉飯內飯量充足之餘，牛肉亦超多，而且並非嚡口，醬汁可按喜好隨意加添，加上小食亦只係加幾蚊，係窮人拍拖之選。

延伸閱讀﹕真正平民食堂加藤屋20蚊牛肉飯超抵食