全港3間分店！復古裝潢還原屋邨走廊賣懷舊點心老馮茶居不如用一款點心單飛？

現時開茶樓賣點心少啲諗頭都唔得，老馮茶居一直靠復古裝潢、懷舊點心，於全港已經開咗3間分店，除咗元朗元祖店，大埔亦有分店，而最近更於荃灣開第3間分店，似乎受到各區街坊歡迎，拍拖兩個人去隨時等位等到天荒地老。不過，編輯認為該茶居只係一間以打卡為主嘅小店，較吸引愛好打卡嘅港女，如果單單講食，倒不如只用一款點心單飛算啦。

茶樓點心講懷舊，亦要講創意，老馮茶居由元朗開到大埔，再開到荃灣，都堅持走復古風格，室外以木系為主調，室內裝潢則以公共屋邨環境設計，倒模公屋走廊，再加上各款舊式裝飾、磁磚地板，加上雜貨店、山貨店等道具，連收銀位置亦以錢莊為藍本，一啲都唔老土，反而可吸引少女前往打卡呃Like。

而用餐碗筷、茶杯、茶壺都選用雞公碗，的確紅黑色調雞公碗係舊時標記，雞公碗早年其實有興旺添丁嘅意思。老馮茶居外觀上呈現舊式屋邨，懷舊感重，有老香港味道，近月更為ViuTV節目《宵夜燒到過埋夜》取景地。

當中有較少見、但又好經典嘅鵪鶉蛋燒賣皇$28/3粒、古法千層糕$26/3個，燒賣望落飽滿結實，內含豬肉、蝦肉之餘，頂端再加上一粒鵪鶉蛋，相當香口，而千層糕則加上鹹蛋黃、椰絲等，將包皮同餡料分為5至6層，層層堆疊，比蛋糕硬身，蛋黃味唔重，稍為淡身。

金牌炸芋角$16/2個呈現蜂巢狀，入口外脆內軟，表皮有一定厚度，有酥脆感，而內裏則為綿密芋泥，鹹中帶甜，但有少少油膩同唔夠熱。而老馮流沙芋泥包$23/3個則為招牌作之一，製法有如流心奶黃包，只不過變成流心芋蓉餡，比芋角芋泥餡滑，外皮則加入芋頭製作，果然真係全部都係芋。

點心中有家鄉砵仔排骨$26，有別於豉汁蒸排骨，以砵仔盛載，排骨份量適中，骨量唔多，尚且可以啖啖肉，有啲梅子醬嘅口感，幾開胃。

點心選擇好似好多，但事實上，上述點心其實只屬不過不失，打卡大於食，反而唯一值得推介嘅係客家砵仔蒸飯，同排骨一樣用砵仔盛載。蒸飯本身有多款口味，細心留意吓，幾乎每一枱客都會點一份蒸飯。其中，蝦醬蒸腩仔飯$38 非常出色，砵夠扁而闊身，蒸時夠均勻，飯粒分明，水份適中，又夠黏滑，飯底有些微酒香，聞落有蝦醬，但加入甜豉油後，整體食落又唔鹹，腩肉份量充足，油香、豬肉香滲入飯粒內，但又唔會好油膩。若用呢款點心作單飛選擇，選擇精簡啲其實可能更高水平！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 大埔分店近海寶花園，而元朗元祖店位處元朗大棠路66號地舖，至於荃灣新店則位於荃灣眾安街68號荃灣千色匯ll期地下G30-G33號舖。

❷ 茶介每位$5，星期一至五穿校服學生可享9折優惠兼免茶介。

❸ 點心即叫即蒸，約需10至15分鐘。

❹ 有外賣自取，每個外賣盒加$1。

❺ 網店外賣點心有95折優惠。

❻ 店內只收現金，無其他收費選擇。

❼ 茶就當然係普洱、鐵觀音較好啦。