鄰近車公廟！沙田大圍廢校轉化綠色環保空間環保博物館將藝術融入生活

最近，沙田大圍有一個由舊校改建而成嘅環保空間，將藝術與環保融合，多個裝置容許觀眾免費入場參觀，展館空間唔大，但可以一看，館內恍如一個綠色空間，每一個角落都提醒我哋要注重環保生活，似足一個環保博物館，尤其適合充當拍拖兩個人嘅落雨好去處。

該環保博物館由11月中起免費開放，名為慈濟環保共行館，為佛教慈濟基金會香港分會，位置原為一間名為慈航義校嘅廢棄學校，由1954年建校至今有逾60年歷史，於2000年已經停辦，基金會將學校舊址轉為環保共行館，室內外融合中式與日式設計，以純白、木質為主調，展館樓高兩層，下層分成4個展館，加上「靜思人文館」為題嘅紀念品中心同訪客接待處，而上層則為講堂。

近年，全球暖化影響人民生活發展，加上氣候變遷，令環保成為重要議題，館方就以環保為題，做足環保分類，提點大家資源要充份運用，萬勿浪費，希望人類可永續發展。館內有多個環保展覽，包含常設展覽，一而再再而三提醒大家環境保護嘅重要性，每個人於日常生活都可以做到。

展覽中有4個展館，包含「大愛感恩科技館」、「地球館」、「蔬醒館」、「賽馬會共創空間」，有唔少互動裝置，亦將藝術同環保二合為一，令展館無咁沉悶，中間有一個展覽叫《共知･共識･共行》，展現各個風災、水災、火災、土地災害等事件，而一端有水墨畫裝置，另一端又有一個大型木鯊魚裝置，加上各種木製藝術品，另外亦有以廢棄膠樽演變成布料嘅小展館。

更特別之處係展館亦身體力行，其中一個展館內展示將塑膠變成膠地墊，而於展館後亦可見一塊又一塊膠地墊平舖路面，由發泡膠演變而成嘅地墊，走起路來原來都好實淨。如果細心留意吓，會發現屋頂有保留舊校嘅外貌，室內展館特別多窗口，少有冷氣機，一旁亦有一個水井，以提供水資源洗手之用，似乎都以環保建材為主，綠色建築設計有親近大自然嘅感覺。

而另一端亦可見多個環保分類專區，充份呈現綠色環保原則，提醒本地人對環保嘅醒覺。除咗「藍廢紙、黃鋁罐、啡膠樽」之外，重細分成紙張、紙包盒、其他金屬、鋁罐、發泡膠，連塑膠亦分為1、2、4、5、6號塑膠，甚至PP（聚丙烯）、PS（聚苯乙烯），重有紙皮、鐵罐、膠袋、玻璃樽等，以行動提醒大家環保7R，包括Refuse、Reuse、Recycle、Reduce、Rethink、Respect、Repair。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 留意館內有午休時間，為12:30至13:30，而每逢星期二及假期都會休館。

❷ 有需要可以whatsapp 6367 8522查詢。

❸ 巴士路線 81C、82K、85B、86A、87B、89B、170、182、249X、281M、E42，或者小巴路線 68K、803、804、812 皆可抵達。

❹ 位置離車公廟不遠，只有1分鐘步程。

❺ 參觀費用全免，不過需要預約參觀，到官方網站登記﹕www.tzuchieac.org.hk，如果無預約就要視乎人數而定。