大澳出發闖大嶼山最偏僻露營地！1小時崎嶇山路達萬丈布荒涼深山郊野

香港人要拍拖兩個人找尋人流唔多嘅露營地唔容易，以大嶼山營地為例，煎魚灣營地明明係一個需要走2至3小時先可以到達嘅營地，營位卻又被走捷徑乘搭非法快艇抵達嘅人捷足先登，今次編輯就到另一端探路。從大澳起步，走一段需時1小時、只有崎嶇不平山路，前往步行先可以抵達嘅萬丈布營地，睇睇有無人露營呢？

從大澳巴士總站出發，向背後粉紅色欄杆海濱長廊走，約5至10分鐘即達南涌遊樂場。步行至分岔路口位於遊樂場後面，右邊為牙鷹角營地、二澳方向，而左邊則為萬丈布營地方向。

由海濱長廊一角嘅遊樂場起計，依循萬丈布指示牌走，需要先走一段45度角「長命斜」，大概15至20分鐘後會抵達一個涼亭。始後會逐漸變暗斜上山，前往萬丈布路段甚為費時。

大澳出發至分岔路口，需要至少30分鐘腳程，一直前行會到達鳳凰徑第6及7段交接點，大概於海拔219米高位置，會見到一個荷花池，位置為龍仔悟園，小橋流水恍如中式庭園。

此後，從山路轉向瀝青路，又轉返山路，沿途「萬丈布」指示牌明確，步行約15至30分鐘，即達萬丈布營地位置。由大澳巴士總站出發起計算，直至萬丈布營地，需時若1至1.5小時。

萬丈布營地為官方營地之一，位於深山之中，由於無車船可達，而且必須走一大段崎嶇山路，故人流較少，環境較其他營地清幽寧靜。而萬丈布營地地方空曠，並非完全被林蔭包圍，可以賞景、賞星，所以唔會好似白富田營地咁陰森恐怖，反而有洗滌心靈嘅感覺。

位置上，萬丈布營地位於大嶼山薑山以西，靈會山以北，大澳以南，牙鷹山、煎魚灣、二澳以東，處於鳳凰徑之間，與大浪灣營地、狗嶺涌營地、煎魚灣營地、牙鷹角營地一樣，屬南大嶺郊野公園範圍。

萬丈布營地正式營位基本只有4至5個，每個營位皆分佈於一個獨立空間，每個營位都有天然屏障分隔，有獨立嘅Private Area，等同石欖洲營地，難於被人插針。不過，營位內地面偏硬，等同石地，比較難落營釘，相對其他營地嚟講，係有啲唔太方便紮營。

營地附近既有龍仔悟園，亦有慈興寺，從營地眺望可見山上嘅慈興寺，兩端能遙遙對望，而週邊則被群山環抱，可飽覽翠綠景緻。營地內部份營位有兩個燒烤爐，亦有晾衫架、污水穴，枱櫈皆為石造。

營地內樹林茂密，既有一座旱廁，以及多個垃圾桶，離營地一小段路亦可搵到溪澗水源，此為萬丈布天池，又稱「 Infinity Pool」，山徑另一端可通往牙鷹山。活水流動可以於水池取水，但此為生水，不宜飲用。

萬丈布早被劃為具特殊科學價值地點，若想於營地外散散步，可以前往著名嘅萬丈布瀑布，該瀑布以長如銀布聞名，有如銀色絲布，被稱「水澇漕」，皆因溪澗與瀑布相連，極有氣勢。不過前往萬丈布嘅路段比前往營地山路更崎嶇，甚至需要爆林，所以只適合有豐富行山經驗之人前往。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於東涌市中心乘搭前往大澳嘅大嶼山巴士路線11號，或者於梅窩碼頭乘搭士1號至大澳，向萬丈布方向走鳳凰徑，上山1小時即達。

❷ 萬丈布山路崎嶇不平，入口路段極陡峭，要特別小心步行。

❸ 萬丈布天池取水地點為走出萬丈布牌坊後轉右，大概走100至200米就會見到。

❹ 萬丈布瀑布極危險，無適當攀山裝備千祈唔好胡亂闖入。

❺ 山路多青苔，陡峭又易跣腳，落雨前後及落雨時切勿前往。

❻ 龍仔悟園為私人地方，有CCTV，切勿闖入該範圍。

❼ 記得保持山野不留痕，自己垃圾自己帶走。