大嶼山露營地探路！昂坪營地近心經簡林超方便 VS 走1小時陰森林蔭山路闖白富田營地勁偏僻

香港可以露營嘅地方唔多，唔計私人營地及非法營地，官方營地只得41個，每逢假日，多數營地都擠滿人，要拍拖兩個人露吓營唔容易。今回編輯前往大嶼山路線探路，以兩個營地為目標，一個係超方便嘅昂坪營地，另一個則為極度不便嘅白富田營地。

昂坪營地

由東涌市中心起步，乘搭一程巴士路線，大概45分鐘至1小時車程，即達昂坪市集，位置正正係天壇大佛、寶蓮禪寺、昂坪廣場。唔建議乘搭昂坪360，嗱我哋今次理由係離營地入口較遠，明就明啦。落車後，只需要向心經簡林、彌勒山方向走，15分鐘步程就可以到達東山法門分岔路口，昂坪營地入口即映入眼簾。

從昂坪市集前往昂坪營地，可以走昂坪樹木研習徑，而更直接、方便嘅路線係走瀝青路，沿昂坪奇趣徑走，全程平坦易行，拉車亦方便。到達營地之前一小段路，會見到昂坪營地公廁，而呢個正式公廁距離營地只係約3至4分鐘步程，不過營地原先嘅水源則未能使用，水喉已經損壞，若要取水則需要前往公廁。

昂坪營地屬南大嶼郊野公園範圍，位處大嶼山昂坪分支路，營地內只有7個營位，但每個營位分佈清晰，營位獨立，每個營位有自己嘅Private Area，難以被人中途插針。

營地內有基本設備，左邊營地嘅地面多泥，草地較少，而右邊兩個營地則設有木板地台，恍如荃錦營地，相當企理。而營地最大特色係設有獨立煮食爐位、枱櫈，更有更然防風板，即使唔帶防風板都無問題，營地有垃圾桶，但就無污水穴。

從環境嚟睇，昂坪營地係非常舒服，皆因週邊被山谷環繞，清幽寧靜，可以觀星，亦可眺望昂坪景色。雖然一條簡單路線可達，交通亦方便，但營地海拔較高，比較需時，人流相對市區少，當然假期喺有無位嘅問題上，都係有一定風險。

以方便程度嚟，昂坪營地都算係星級之選，倘若有咩想要補給，都可以直接走15分鐘到昂坪市集，補給點眾多，即使唔計士多等店舖，至少有7-Eleven。

營地附近有多支山路，包括鳳凰山、心經簡林、彌勒山、地塘仔等，入口正處於第三段與第四段之間，若前往露營，有時間可以到山徑走走，所謂鳳凰觀日，日出時份走到鳳凰山去觀賞晨光第一線，自然可睇太陽從地平線上升嘅壯觀畫面。

白富田營地

相對於其他大嶼山營地，例如昂坪營地，靠近南山營地嘅白富田營地就係較少人會選擇前往嘅官方露營地，因為環境陰森而過於偏僻。

即使白富田營地同屬南大嶼郊野公園範圍，入口位處南山營地一端，但地方細小而不便，故一直以來都好少人會前往營地。從現場所見，雖屬鳳凰徑第12段中途，但山路沿途遍佈樹葉，白富田營地更被樹葉覆蓋地面。

從嶼南道起步，入口右邊可下行至南山營地，左邊則為前往白富田營地嘅路口，對面則為燒烤場，可前往二東山、大東山。而前往白富田營地嘅山路複雜，先步行一段石階梯，直到分岔路口，約需15分鐘。然後，需要再走鳳凰徑第12段，終點可達梅窩碼頭，比較適合有經驗之人步行。

雖然指示牌寫前往白富田營地需時僅30分鐘，大概只係1公里，但實際上絕對唔止咁短路程。山路沿途皆被林木覆蓋，涼風輕吹，反而有啲陰森恐怖，尤其分岔路口至營地一段路，該段大概需再走30分鐘。

營地有基本設備，比如少量枱櫈、燒烤爐、晾衫架，而旱廁則距離營地有一小段路，需要下行一段山路先會到處旱廁。從旱廁潔淨度，可以估計營地長時間無人使用，不過亦有好多蚊蟲滋生。

多數營位都係凹凸不平，位置偏斜，地面偏硬，難以紮營，頂端幾個營位係略為平坦，但滿佈樹葉，而且蚊蟲更多，所以白富田營地基本上幾搵笨，與同曝罟灣營地。

白富田營地基本上全無景色，即使被群山環抱，處於谷地，但景觀完任被樹木遮擋，少見溪流，雖然官方稱為清幽雅緻，但實際上係陰風陣陣，兼且遍佈蚊蟲，難以於營地長時間逗留。

白富田營地位處梅窩西車面，以及貝澳東北面，附近多為山路，營地位於白富田山，又稱為大牛湖頂，海拔有約275米高。

若從營地離開，比較接近嘅係由嶼南道另一端上行，因為從營地向梅窩方向折返嶼南道，大概只係600米步程，但亦需時約30分鐘。不過，此路段較多墳墓，頗為陰森，與剛才前往營地嘅路段一樣，都係林木眾多，偏僻又陰森。下行至嶼南道之後，可以接駁鳳凰徑第12段，繼續走山路，再折返梅窩碼頭，亦可以直接依循嶼南道下行，一直前行就會返回梅窩碼頭，步程約10分鐘。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於東涌市中心乘搭大嶼山巴士路線23號，或梅窩碼頭乘搭巴士路線2號、大澳乘搭巴士路線21號，皆可直達昂坪市集。而從東涌市中心乘搭3M，則可於南山營地站落車，下行為南山營地，而於入口另一個方向上行，就係白富田營地。而從中環乘搭1小時船程，即可於梅窩碼頭出發，轉乘巴士路線1,2,3M,4號，都可以直達南山營地站。

❷ 從昂坪市集走到營地，步程大概係15至20分鐘。

❸ 山頂較大風，所以最好帶備多件衣物保暖。

❹ 營地夜晚昏暗，要預備充足燈具、頭燈、電筒。

❺ 揸車前往大嶼山需要禁區紙，而昂坪亦無泊車地方。

❻ 謹記盡量自己垃圾自己帶走，減少製造廚餘、包裝紙及垃圾。

❼ 雖然營地係先到先得，但唔好霸佔多過一個營地，同時晚間要控製聲量。

EATWO

Miss A

人人和平姊妹店！午市無加一、套餐送甜品！北角Gotthard base西餐廳歎西冷扒／香煎比目魚／燒豬仔髀！