泰金閣+泰國菜餐廳+賈炳達道公園+九龍寨城公園+牛元帥粉麵

【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover

以往選擇堂食去餐廳食飯,一個餐廳通常只會提供一款菜式,但如果選擇將唔同餐廳嘅食物外賣,再另覓用餐地點,以野餐方式用餐,就可以同一時間品嚐兩種或多種截然不同嘅菜式,如果拍拖兩個人各有想法,倒不如兩間都買,順便嚟個Crossover,可能會有更獨特嘅風格。今次編輯就選擇九龍城區內一間人氣泰國菜,對比區外受歡迎嘅泰國菜餐廳更值得一試,另外亦挑選一間以牛為主打嘅潮州粉麵店,帶大家到一個因最近被扑鎚嘅市區重建計劃而受到影響嘅公園用餐。

九龍城嘅泰國菜餐廳有好多,故一度被稱為「小泰國」,當中黃珍珍泰國菜館就係區外至遊客都熟悉嘅泰國菜餐廳,不過區內其實有好多間更值得支持嘅泰國菜餐廳,單單編輯推介嘅就有5間,包括泰皇閣泰國菜館、小曼谷海鮮燒烤屋、小曼谷泰國美食、BTS美食站,以及今次挑選嘅泰金國,全部都只係分佈於侯王道、衙前塱道、南角道。每間餐廳不單地址非常接近,而且店名都甚為相似,每一間泰國菜餐廳都包含正宗泰國菜式,比如芒果糯米飯、泰式燒豬頸肉、冬蔭功、海南雞飯、咖喱炒膏蟹、泰脆炸豬手、泰式肉碎生菜包、泰式生蝦等。

今次先試一間在區內受到歡迎嘅泰國菜餐廳泰金國,未有被廣泛報道宣傳過,但門口不時大排長龍,據悉小店為泰國夫婦打理,編輯親臨亦可以確認,店內老闆娘至員工都為泰國口音,係純正泰國人主理嘅泰國菜餐廳。

店內餐牌選擇眾多,只係星期六日價錢較平日貴,皆因並無套餐選擇,店內裝潢陳設簡單,有啲地踎感覺,但餐牌內都係正宗泰國菜式,相當地道,其中有2款小食係必試之選,一款係燒牛肉,另一款就係皮蛋炸蝦餅$88,非常獨特!皮蛋炸蝦餅以炸得香脆嘅蝦餅包裹軟綿綿溏心皮蛋,以$88計算,切開之後,一份大概有2顆皮蛋。

金黃色蝦球狀嘅蝦餅新鮮炸起,表皮仍然脆卜卜,內裏爽口彈牙,整顆蝦球已經切開,可見皮蛋上嘅溏心狀蛋黃,令人垂涎。溏心皮蛋夠綿滑,選材出色,切開之後黏附於一層蝦膠,香脆蝦球同軟糯嘅溏心皮蛋構成強烈對比。蝦球炸得香脆,而內餡嘅溏心皮蛋則依舊無熟透,似乎係採用大火炸蝦球嘅方法。將炸蝦球蘸上泰式辣醬,酸甜味為蝦球提升層次,雖然一份都幾飽吓。

最令編輯意外嘅係,每一份食物嘅份量同樣超豐富,單單一盒Padd Thai 泰式炒金邊粉$78 就有平常坊間一倍份量,金邊粉壓得實實,完整填滿一個外賣盒,一盒分分鐘足夠兩個人填飽肚子,一個人真係未必可以食得完!

泰式炒金邊粉味道香濃,炒得有鑊氣,鹹香中夾雜酸甜味,酸味較重,蓋過辛辣味,爆炒金邊粉時加入雞肉、蝦肉,再加上韭菜、蛋絲、芽菜、花生碎、豆乾、芫荽、甜蘿蔔乾粒,再加入魚露、棕櫚糖、紅辣椒,都夠惹味,但就無青檸汁,金邊粉唔油膩,但整體略有濕度,容易黏住,外賣始終乾身啲就會更好。

另一間係正對野餐點賈炳達道公園嘅牛元帥粉麵,係一間曾經被藝人梁祖堯推介過嘅潮州粉麵店,而店內固然以牛為主打,比如係牛腩、牛丸、牛筋、牛雜,當中靚牛腩就係出色之處。

上等牛坑腩麵$48 亦係必食之選,坑腩係招牌貨色,質感軟腍,有半肥瘦感覺,一邊係瘦削肉地,另一邊就係肥膏,肉質淋身又鬆軟,部份有少少爽口,有牛味之餘又略帶油脂甘香味,入口唔會黐牙,至於湯底配上爽滑米粉就不過不失,湯頭比較清淡,只加上少量蔥花、炸蒜。

賈炳達道公園由1987年起興建,直到1989年容許公眾入場,屹今有逾30年歷史,公園內地方偌大,連電視節目《城市論壇》亦曾經於公園內舉行。現時,公園內仍然有一個擁有唔同斜坡嘅自行車道,場內踩單車囓多為小朋友。公園連接歷史更悠久嘅九龍城寨公園,都算係紀念一個曾經係香港「三不管」嘅地方。不過最近政府已經公佈,九龍城嘅重建發展計劃已經被扑鎚,意味昔日九龍城舊區幾條街道連呢個野餐公園部份用地都會被拆走。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 泰金國六日假期無午市套餐,只可以單賣。

❷ 牛元帥粉麵下午茶時段14:30至17:30,可加$5配汽水或其他飲品,唔包括特飲,六日及假期除外。

❸ 九龍城有5間可以幫襯嘅泰國菜餐廳除咗編輯挑選、位於九龍城侯王道9號地下A號舖嘅泰金國,亦有位於九龍城太子道西398號御太子地下1-3號舖嘅小曼谷海鮮燒烤屋、九龍城衙前塱道15號地舖嘅泰皇閣泰國菜館、九龍城南角道11號地下嘅BTS美食站、九龍城南角道9-11號地下嘅小曼谷泰國美食。

❹ 泰金國係一間唔容許預訂、只可以Walk in嘅餐廳。

❺ 泰金國外賣需要每份加$2。

EATWO
Miss A

泰金國

九龍城侯王道9號地下A號舖
12:00 – 22:00
5920 2799(Whatsapp) 2716 9962

牛元帥粉麵

九龍城賈炳達道49號地下
07:00 – 01:00
2633 1283

賈炳達道公園 / 九龍寨城公園

賈炳達道公園 九龍城賈炳達道53號
24hours / 06:30–23:00
2716 9962

醫吓肚

干炒粒粒通2.0!新蒲崗肥仔銘茶餐廳又一隱藏菜單 即睇編輯全新推介菜式

【#隱藏菜式】上年初,E.A.Two曾經推薦過大家拍拖兩個人去新蒲崗一間街坊茶餐廳,該店名為「肥仔銘茶餐廳」。當時小店餐牌上並無「干炒粒粒通粉」,只係一款店內隱藏菜式,因為大多數人經其他平台只知道店內有一款「熱香餅」。今日再去小店,發現餐牌上已經多咗「干炒系列」,但大多數人只係點「干炒通粉」。今次編輯又試搵到隱藏菜單,比「干炒通粉」更勝一籌!

【新年禮盒2024】望月期間限定店抵買茶味曲奇!Pop Up Store遍佈K11/時代廣場/Sogo/新城市廣場

【#新年禮盒】目前正在煩惱今年拍拖兩個人要買咩賀年禮盒俾雙方長輩嗎?E.A.Two編輯有好介紹,最近「望月」於多個香港商場都有搞期間限定店Pop Up Store,今次唔賣月餅,反而轉為賣曲奇禮盒。不僅包裝設計精美,送禮體面,價錢唔貴,而且曲奇新款而變化多漾,並非只係單單原味牛油曲奇,尤其係茶味曲奇,送俾長輩更可關心健康。即刻睇睇有咩款式同價錢,記得留意早鳥優惠呀!

【年糕巡禮2024】港九新界超過30間龍年良心糕點推介!早鳥優惠蘿蔔糕/年糕/賀年禮盒款式眾多|新年糕點推薦2024

【#年糕巡禮2024】踏入2024年,意味農曆新年即將來臨,想要搵合適自己口味嘅年糕小店愈來愈艱難。今年E.A.Two編輯再為大家整合仍然有推出各款新年糕點嘅小店,等大家拍拖兩個人去買蘿蔔糕、年糕,甚至賀年禮盒都可以更方便。即刻睇睇全港近50間E.A.Two個人選擇,於呢個list中找尋啱你心水嘅小店糕點!

{"speed":"1000","height":"600","pause":"4000"}
影吓相
{"speed":"1000","height":"600","pause":"4000"}

在〈【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover〉中有 1 則留言

留言功能已關閉。