流浮山海鮮街酒家林立藏殖民時代皇冠郵筒海味場旁眺后海灣日落觀60年歷史神秘建築物

提到流浮山，唔少人都會第一時間諗到食海鮮，皆因流浮山向來盛產海鮮，而且酒家林立，通往海旁嘅主要通道更被直接稱為流浮山海鮮街，而海旁景觀遼闊，位置可觀賞后海灣一帶黃昏日落，媲美附近嘅上白泥日落靚景，如果拍拖兩個人只想輕輕鬆鬆散吓步，可以到流浮山行吓，背後重有一座60年歷史嘅神秘建築物。

從流浮山迴旋處起步，會率先發現入口一個舊式郵箱，稍有殖民地歷史知識嘅你，一定會認得呢個係英國殖民時期嘅皇冠郵筒之一，只不過現時已經被髹上綠色。

該英式皇冠郵筒為嵌柱式及入牆式，形狀為方形，位於流浮山屏廈路、深灣道交界，旁邊為鰲磡村新慶村村公所，離流浮山海鮮街入口只係15秒步程。郵箱上刻有「ER」字樣，表示郵筒為英女皇伊利沙伯二世時代建造，即1952年之後，據悉郵筒於倫敦建造。

近期，流浮山有間去年底開業、因巨型希臘風壁畫而受到打卡人士歡迎嘅餐廳，門口可見以藍白色小屋設計，樓高3層，牆身有獨特希臘女神油畫，正正位處皇冠郵箱斜對面，即流浮山迴旋處嘅另一端，據悉餐廳以法國Fusion菜為主，亦有米芝蓮大廚主理，門口寫有Myth House字樣。不過，編輯無打算食，唔好問點解。

步入流浮山海鮮街，馬上會發現酒家至今仍然一間接一間，更有眾多海鮮檔，如同鯉魚門三家村嘅海鮮街，而海鮮檔背後則為海味場，離海旁不遠，靠近后海灣、珠江口，唔少攤販亦會不時趁陽光猛烈時曬曬海味。如果要講流浮山最出名嘅海鮮，應該就係蠔、黃油蟹，由於地理位置上有淡水流入，河口淺水區亦容易養蠔，碼頭旁邊不難發現養蠔痕跡，更有眾多蠔殼。

不過據歷史記載，70年代時，流浮山一帶水質其實曾經受到污染，因為中國共產黨曾經以武裝炮艇入侵，而珠江三角洲亦長期有水質污染，加上天水圍新市鎮發展，一度令蠔產量大幅下降，到80年代始逐漸回復正常。

流浮山位置為淋坑山、雞伯嶺山腳，為沙橋村、尖鼻咀至上白泥之間，基本上離上白泥不遠，故同樣可享與上白泥同一方向嘅日落景色。流浮山正對后海灣，可遠眺深圳灣公園、蛇口、深圳灣公路大橋，夕陽西下，黃昏時份嘅流浮山日落其實並唔輸蝕上白泥嘅日落景色。

若然更細心留意吓，會發現流浮山海旁背後有一座超特別嘅歷史建築物，該建築物從1962年建成至今已有60年歷史，其實就係前流浮山警署，只不過目前已經被棄用，現時活化改建成導盲犬學苑。

從流浮山碼頭海旁仰望，可見前流浮山警署位處山頂，以藍白為主色，建築風格獨特，為60年代嘅功能式建築物。警署樓高3層，天台更有個圓形瞭望台，屋頂亦有如炮台，地理位置上可俯視屏山、后海灣兩端風景，甚至回望流浮山鄉村。資料顯示，警署內仍保留有報案室、會議室、羈留室，而露台有支旗桿，本來係用作懸掛英屬香港旗。