前九龍消防局宿舍 =九龍尖沙咀梳士巴利道與九龍公園徑交界=1881隔離

毗連1881!尖沙嘴鬧市神秘一角藏舊消防車 前九龍消防局宿舍逾百年歷史紅磚建築物

尖沙嘴1881 Heritage係好多人都認識嘅地方,相信唔少人都已經拍拖兩個人去過,但係又知唔知道1881呢個位置除咗舊水警總部,重隱藏咗另一個建築物呢?原來一隅嘅紅磚建築物係大有來頭,背後更停泊咗一架舊式消防車,而呢種舊式消防車你又幾耐無見過呢?

1881本身係香港水警總部,由80年代一直到1996年主權移交之前都仍舊運作,整個空間眾所週知包括有水警總部主樓、前馬廄、前時間球塔充滿早期殖民地時代維多利亞建築風格。另外,其實重有兩幢紅磚建築物,即係舊九龍消防局及舊九龍消防局宿舍。而舊九龍消防局同宿舍建於20年代,曾加蓋至三層,直到70年代先停止運作,係殖民地時代嘅消防局。現時,大家仍然可以大概見到舊九龍消防局面貌,只不過場地已經租用予商戶溥儀眼鏡,現時位置離香港基督教青年會、半島酒店不遠。

以舊九龍消防局及舊九龍消防局宿舍地圖嚟睇,屬「1881 Heritage」戶外廣場範圍,前面係舊九龍消防局,後面就係舊九龍消防局宿舍,都係以紅磚建築設計,古典非常,嗰種歐陸懷舊風格滿滿高貴優雅感覺,絕對唔輸蝕於1881舊水警總部大樓建築設計。紅磚建築物樓高兩層,上層係宿舍專用,而下層就係車房,有指一個消防局大概有30名消防員同1名消防頭目駐守。70年代時,由於人口急劇增加,地方唔足夠,意外頻生,故該地嘅消防局需要擴充,最後就搬遷至廣東道嘅新尖沙嘴消防局。

當消防局搬遷之後,舊消防局原址曾經由消防局用途改為香港郵政總署部門,其後於80年代又以象徵式$1租予油尖區文化藝術協會,90年代再演變為香港警察茶水部辦公室。於1994年,香港古物古蹟辦事處將舊消防局宿舍列為香港法定古蹟,但就唔包括消防局主樓。直到1996年之後,水警總部終遷至西灣河區,整個空間於2000年代被地產發展商長江實業參與發展項目,活化後改為1881,由2003至2009年項目歷時約6年。而2019年起,1881被2019 FWD富衛集團承租古蹟酒店,現時已易名為富衛1881公館,經常為電視劇拍攝場地。

舊九龍消防局位置近前九廣鐵路KCR 火車總站,不時為火車站提供消防用途,故此當時有人會直接稱作火車站消防局。一般人即使走到1881,也未必會留意舊九龍消防局,更加唔會留意到消防局背後重隱藏咗一部舊消防車!其實,舊九龍消防局背後地下一層工作間同時係消防車停泊嘅地方,目前仍舊擺放咗一輪「丹尼士」古董消防車,據了解消防車係40年代製造,一直見證香港歷史。由於本地消防設備由19世紀至二戰後時期都係由英國公司Dennis主導,所以消防車嘅型號都係來自Dennis。

消防車後面其實就係舊九龍消防局宿舍,至今仍舊可見清楚見到有宿舍外牆嘅消防滑杆,當消防員接到緊急召喚等任務之後,就會從宿舍消防滑杆直接滑下,然後極速就位並執行任務,唔會39分鐘先會到達現場。

E.A.Tips :

❶ 前九龍消防局及前九龍消防局宿舍位於1881 Heritage戶外廣場範圍。

❷ 舊消防車位置躲藏於大樓背後,位於行人隧道旁邊。

EATWO
Miss A

前九龍消防局及前九龍消防局宿舍

九龍尖沙咀廣東道2號A
24hours
2926 8000