機場維修區+南環路近赤鱲角南路巴士站+觀景山

【赤鱲角機場遊】只識維修區睇日落?南環路海旁驚現和風巴士站 15分鐘登觀景山俯機場全景

香港人好耐無去過旅行,對於機場絕對又愛又恨,想要衝上雲霄,又被人禍阻撓。提到香港赤鱲角機場維修區,唔少人第一時間都會諗起日落勝地,專程到海旁觀賞夕陽西下景緻,甚至會拍拖兩個人前往浪漫散步或踩單車,熱門時間都係黃昏時份,但事實上赤鱲角機場一帶又豈止海旁維修區?編輯決定帶大家從反方向走,先找尋一個充滿和風味道嘅舊式巴士站影吓相,再攀登上一座小山丘,俯視機場全景,有時間重可以去大草原散吓步或野餐。

要前往赤鱲角機場有幾個方法,但若要前往機場維修區海旁一帶,就只有巴士路線可以到達,而前往赤鱲角南路亦有多條巴士路線,而且可從市區直達。於赤鱲角南路巴士站落車後,抬頭會見到觀景山隧道,行遠少少回望巴士站,會發現南環路巴士站設計甚為特別。

赤鱲角南路巴士站原來係機場維修區內估唔到嘅影相位,頭頂係觀景山隧道,一邊係機場維修區日落點,而另一邊就係觀景山、大草原。巴士站位置正對東涌灣,一端可眺望東涌馬灣涌村,另一邊可望東澳古道方向,山海夾雜,畫面豐富,巴士站似舊式設計,和風味濃,有日本動畫場面嘅感覺。

向機場維修區觀景點反方向直行,直到見到迴旋處,只係3分鐘步程,一隅有油站,迴旋處斜對面就係觀景山入口處。沿途可仰望昂坪360纜車來回登上山頂。

踏上觀景山之路並唔困難,有瀝青路走,依循石屎樓梯直上,只需上行20分鐘左右,就能登上觀景山涼亭嘅山頂位。機場島望機場景,觀景山山頂可以俯視香港赤鱲角機場全景,同一個景色,路段比昂坪360救援徑、昂坪棧道舒服得多。

觀景山海拔僅高約77米,離國泰城不遠,山頂風光明媚,環瞰附近山海,既可望機場四週風景,亦可回望東涌一帶市景。觀景山相對機場維修區地面嚟講,人流唔多,環境清幽而舒服,使人豁然開朗。

如果尚有時間,不妨前往另一條路,到古窯公園及機場古物園,內有一個大草地,既可野餐,亦可散步。草地離國泰城非常接近,園內有唔少同機場有關嘅物品。呢個時候,如果想前往機場維修區,又唔想步行,可以等候巴士路線,就可節省時間。

折返原路,一直沿海旁走向機場維修區觀景點,沿途可見對岸為沙螺灣村,不單可欣賞黃昏日落餘暉,亦可遠眺港珠澳大橋。由南環路巴士站前行至無遮擋嘅機場維修區海旁,步程約30至45分鐘,繼續前行至盡頭巴士站,仍需額外15分鐘步程。

機場維修區又叫飛機維修區,本身係機場嘅後勤區,後來南環路一段盡頭被攝影發燒友、航空迷同打卡友發掘,演變成攝影熱門地,多數人都係為咗前往影日落。南環路一端設有躉石,以免有車停留,而另一端則有長長嘅花崗石防波堤,石塊堆疊,坐低安靜地休息,吹吹清涼海風,觀賞天空逐漸變色、太陽消失於地平線,心情總有一刻變得平靜。

以往於南環路一帶抬頭,幾分鐘可見一架飛機起飛、降落,但現時隔好一段時間先有一架飛機於天際翱翔,香港國際金融中心到底變成一個咩地方呢?

E.A.Tips :

❶ 巴士路線E11,E11A,E21,E21D,E22,E22A, E23,E23A,E32,E33,E33P,E36, E36P,E36S,E37,E41,E42,N11, N21,N23,N26,N29,N30,N30P, N30S,N31,N35,N42,N42A 皆可抵達赤鱲角南路。

❷ 去機場維修區就只有巴士路線E37C,E42C,E21C,E22C,S52,S52A 可以抵達,比較方便係來往東涌嘅S52。

❸ 現時揸車係唔可以停留於機場維修區,南環路有大量巡邏車監視,一旦有車停留就會馬上驅趕。

❹ 石礦場樹屋蚊蟲極多,謹記做足防蚊措施,最好穿著長袖衫褲。

❺ 最好都係踩單車或者搭巴士及行路進入。

❻ 謹記自己垃圾自己帶走。

EATWO
Miss A

機場維修區

赤鱲角南環路