【野餐隨行】將軍澳寶康公園草地野餐泰式海南雞x正宗四川成都冒菜

秋天來臨，又係拍拖兩個人野餐季節，但野餐對於編輯嚟講已經唔係咩新鮮事，皆因大家Enjoy堂食嘅時候，我哋野餐、外賣自取已經食咗大半年，堅持又無人Support，同單打獨鬥無太大分別，到底堅持有乜用？

今次選擇前往將軍澳寶林方向，揀選食物之後，就可以前往區內一個大型公園，園內有瞭望塔及涼亭，亦有大量小朋友遊樂設施，連雕塑都係以親子為主題。公園內有一部份為草地，可以於草地野餐。

其中一間係「OK德海南雞專門店」，呢間係一間有唔同分店嘅海南雞專門店，但並唔係間間都一樣，只有寶林新都城店先係同路人。食店以海南雞為主題，似乎係泰式海南雞，玻璃窗可透視室內環境，其實有啲似茶記風格。

入得海南雞專門店，目標固然係海南雞飯，招牌無骨海南雞飯$70，3款醬料包括薑蓉、辣醬、黑醬油，擺放小兜內，但量唔少，薑蓉唔會得油，辣醬夠味，黑醬油夠濃稠。薑黃飯入口偏淡，有少少雞油香，但似白飯，飯粒微黏，唔夠乾爽。雞肉動態清骨，真係啖啖肉，上層為雞髀肉，下層則為雞胸肉，雞皮爽滑，少見皮下脂肪，份量唔算少，肉質白滑軟腍，伴有青瓜、蕃茄。

似乎店內現時係泰國嘢Mix越南嘢，越式蔗蝦加$10，將蝦仁剁成蓉，撈勻打成蝦膠，依附於一小段清甜嘅蔗身上，以蝦膠包裹蔗，然後炸成金黃色。咬一口蝦肉時，可以同時咬少量蔗，蝦肉微鹹，配上少量蔗渣香甜，剛好中和味蕾。

另一間係離海南雞飯只係2分鐘步程、轉個彎就到嘅「烏蠅館」，炮製四川菜，而四川菜中又特別選取冒菜為主打，店內嘅麻辣鮮香味恍如大陸嘅麻辣火鍋店。

集中做冒菜嘅餐廳喺香港比較少見，而事實上冒菜係四川成都嘅小食，主要係將蔬菜、肉類燙熟，加入麻辣、香辣再食用。通常冒菜選用嘅材料同本地人認知嘅麻辣燙相似，都係木耳、海帶、豆芽、豆腐、土豆、白菜、牛毛肚、血旺、魷魚、雞鴨胗、鵪鶉蛋等。而湯汁通常都特別重口味，辣椒、花椒、豆瓣醬缺一不可，薑、辛香料等配料亦需要，湯汁一般都係比較辛辣，重會加入蔥、蒜、芫荽、鹽等調味。湯汁鈉含量都算高，所以盡可能唔好飲湯汁。

店內嘅冒菜亦恍如港式車仔麵，都係自選麵底、配料、醬料、湯汁，其中最平嘅6款配菜$50，同樣價錢比部份車仔麵有更多選擇，湯汁紅噹噹，BB辣會較容易入口，狀似迷你版麻辣火鍋。先挑選風琴豆腐串、鮮淮山、鴨血、鵪鶉蛋、豬大腸、四川臘腸、火鍋寬粉，其中寬粉係比較唔吸收湯汁，所以帶去野餐都會比較適合，寬粉質感較煙韌。餸菜中鴨血並非台式鴨血，四川臘腸狀似一條條臍帶，略甜而油脂較多，豆腐串即豆卜，比較吸收湯汁，鵪鶉蛋有2粒，大腸不過不失，而淮山清甜爽口，只係略略吸收少量湯汁，唔會太多，反而吸收嘅湯汁係最適中。

加$10有茶葉沖泡嘅紅茶、綠茶可擇，當中黑美人紅茶入口順滑，夠解渴，每啖有滲透茶香，茶葉總比茶包有意思。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 烏蠅館分店為尖沙嘴亞士厘道29-39號九龍中心大廈地下G29號舖、將軍澳貿業路8號新都城中心二期地下G10

❷ 烏蠅館截單時間為21:00。

❸ 兩間食店只係距離約2分鐘步程。

❹ 食店離公園僅約15分鐘步程。

❹ 寶康公園有機會有蠓，所以食辣嘢同泰國嘢都會較適合，因為辣椒同香茅等配料係有驅蚊作用。

❹ OK德海南雞專門店平日同假日價錢唔同，假日基本上貴$10。

EATWO

Miss A

【區區有小店2024】南丫島3間尚存本土餐廳推介！高水準意粉／鹹蛋黃曲奇／迷你茶居｜南丫島美食推薦2024