美孚隱藏版家庭式小清新甜品店 $58街坊飯連健康素湯自家製飲品

美孚一帶餐廳唔多，大多數人只數到連鎖店，而事實上高水準嘅小店仍然躲藏於每一個角落。當中，一間小清新甜品店雖然位處美孚新邨範圍內，但就唔太明顯，一般人未必會留意到，不過只要見到西餐廳Cafe82，就會知道呢間以甜品森林命名嘅餐廳喺邊。小店既以甜品為主，亦有意粉、飯、湯粉可擇，款式不少，連餐湯都係足料健康素湯，當然最出色嘅係甜品，比如係栗子露、芝麻糊。

毗鄰同路人小店「Cafe82」，重有一間位於美孚新邨內嘅家庭式小店，雖然位置隱蔽，但出品卻一流，而價錢又只屬街坊價，若非街坊帶路，編輯確實未必留意到呢間隱藏版甜品店。

小餐廳相對旁邊嘅「Cafe82」細幾倍，地段亦麻麻，只係躲藏於停車場一角，原來2010之前已經存在。室內感覺似迷係Cafe，堂食座位唔多，餐牌全為手寫，粉筆字幾有校園黑板風格，整體裝潢設計略帶小清新感覺。雖然叫「甜品森林」，以甜品為主軸，但又有主食可擇，狀似家庭式小餐廳，感覺窩心。

芝士雜菌龍脷魚柳配紅米飯或珍珠米飯$58，頂端平舖一層香濃芝士、蛋黃醬，散發陣陣焦香，芝士內夾雜菇菌，灑有少量黑芝麻點綴，底下有煎過嘅龍脷柳，魚質軟嫩，魚肉底下就係紅白米飯，呢款主食同隔壁「Cafe82」餐牌有少少相似，原來都唔太輸蝕於西餐廳，似乎係一間被耽誤咗嘅甜品店。想再平啲可以點選濃湯銀針粉$35，以自家製濃湯配合銀針粉，份量同甜品差唔多，湯內有菇菌、菜絲、豬肉碎等，湯底略帶鮮甜味，幾清新。

靚靚素湯或自家製飲品，有粒粒雜菌湯、甘筍南瓜湯、蕃茄紅菜頭湯，皆為素湯，其中粒粒雜菌湯即係蘑菇湯，同隔離西餐廳「Cafe82」幾乎如出一轍，口味相似，內有蘑菇粒，質感濃稠，入口綿滑，似乎都係撞咗忌廉。而飲品則有自家製健康飲品$18，包括檸檬香茅茶、蜂蜜洛神花茶、菊花羅漢果茶、南北杏蘋果雪梨茶、菊花玫瑰花雙花茶、檸檬博士茶。

季節限定有栗子露$39，似乎只限秋冬時節供應，栗子露有原味或薑汁選擇，但當日只有原味，餐牌上寫明有效健脾、益氣、美顏，相信女士們會好適合。店舖以蛋白杏仁茶、生磨芝麻糊等中式甜品最受歡迎，而西式甜品如芒果撈等都受到邨內客人喜愛。栗子露盛載嘅碗同主食嘅碗差唔多，當然細啲，感覺甜品真係幾抵食，栗子露聞落幾香，甜度適中，質感濃稠，亦容易飽肚。栗子露攪拌得夠順滑，啖啖濃厚栗子香，內裏甚至有栗子粒粒，似乎同芝麻糊一樣係自家生磨製作。