【楓葉預告2022】九龍塘秘道闖市區秘密花園根德道夕陽下4棵楓香紅紅綠綠逐步變色

11月起秋意濃濃，既係郊遊季節，亦係芒草及楓葉嘅最佳觀賞期，有人會選擇到外地旅行賞楓，亦有人未能出遊，只能拍拖兩個人於本地賞楓。觀賞紅葉嘅地方有好多，元朗大棠、烏蛟騰等都係熱門之地，部份需要行山，而其實市區都有好多賞楓好去處，今次編輯推介一個位於九龍塘嘅秘密花園，既可觀賞楓葉，背後更有可望夕陽，當楓葉與夕陽交疊時，畫面更唯美。

秋天又到，意味楓葉季節亦即將來臨，可以拍拖兩個人觀賞楓葉嘅地方重有好多，編輯即將會嘗試逐一預告，想更快知道賞楓地點，可以Like吓我哋Facebook呀！

由九龍塘地標又一城起步，前往真光里，即九龍真光中學位置，就可以轉入一道無名嘅秘密通道。只要穿過巷弄之間，2分鐘就可以到達目的地根德道花園。

相對於熱門賞楓地點，九龍塘根德道花園恍如一個市區秘密花園，人流稀少，假日只有少量「姐姐」，而佢哋播放嘅菲律賓歌曲又出奇地配合楓葉畫面，為環境添上幾分悠閒，甚為舒服。

九龍塘根德道花園內嘅楓香樹有4株，3株樹身較大，十分茁壯，1株則較細小，但亦好茂盛；大株楓香樹甚為霸氣，而小株楓香就可以配搭人像構圖。小花園本來就好細小，只有一個涼亭、座椅及散步小徑，人流更少，少人爭位，拍攝時會更自在。

現時，小花園內嘅楓香未完全轉紅，仍有唔少呈綠葉狀態，只有少數開始逐步轉成微黃或橙紅色，相信再過一小段時間之後，相信變色後就會變成大眾喜愛嘅紅噹噹秋楓畫面，甚至一端會構成一道單邊小型楓香隧道。

更意外嘅係，當小花園內嘅楓葉配合黃昏時份，背後會更優美，少量夕陽斜照時，毫不刺眼，襯托逐漸轉紅嘅楓葉，整個畫面顯得更唯美。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 想知道「紅葉指數」，可以瀏覽漁護署紅葉情報網，一般指數分為 A （極紅）、B（紅）、 C（黃）、 D（綠）。

❷ 一般香港楓葉於11月開始有少量轉紅，多數於11月下旬逐步轉紅，視乎天氣狀況，通常12月就會係最紅嘅時候，到翌年1月都係楓葉季節。

❸ 賞楓時若多人就要特別注意安全。

❹ 賞楓還賞楓，記得自己垃圾自己帶走。

❺ 睇楓香係用眼睇，眼看手勿動，千祈唔好摘落去，但可以喺地下執楓葉。

❻ 謹記唔好踐踏地上植物。

❼ 乘搭203C或203S到又一村巴士總站，經又一城就可以前往真光里；而乘搭小巴路線25M,25MS,29A,29B，則可以直達真光里。