梅窩銀礦灣神秘一角!萬角咀村民自行封村 公眾沙灘頓變私人地方?

如果要拍拖兩個人遊走梅窩路線,多數穿梭山路,熱門路線中,可以來往東涌、愉景灣,甚至南大嶼山方向,但原來梅窩有一個神秘海角,近期仍然未能進入。有指該地係被村民自行封村,令該海角位置尤如神秘角落,公眾空間瞬即變成私人地方,到底呢個地方係邊度、有咩方法可以前往呢?

由梅窩碼頭起步,向銀礦灣泳灘方向前行,經過銀礦灣度假酒店,步程約10分鐘,直到沙灘盡頭,會見到一幢賽鹿會建築物、銀礦灣公廁,就可以轉上山路。路段為通往愉景灣、聖母神樂院路線,不過今次只係前行2至3分鐘至第一個分岔路口,依循指示牌往萬角咀。

萬角咀係邊度嚟?如果暢通無阻,30至45分鐘可以到達萬角海邊小沙灘,位置有燈塔,另一端有葫蘆洲連島沙洲。其實,整段小徑係位於萬角,盡頭有萬角咀村,現時仍有人居住。而萬角咀就係梅窩銀礦灣以東嘅一個海角,由於係萬角東面嘅山咀,所以就叫做萬角咀,位置正對喜靈洲、周公島,另一端可眺望坪洲。

據了解,位處南方嘅梅窩至萬角咀一帶,於幾千年前已經有人聚居,而萬角咀村現時仍有村民居住,係一條位處海角嘅小村落。萬角咀村內,於50年代被發現嘅「李府食邑稅山」石碑,目前被放置香港歷史博物館內,而1999年被古物古蹟辦事處發現萬角咀有唐朝窰狀建築、大量青銅時代銅器。前往萬角咀沿途會發現,山上有唔少山墳,有指係因為二戰前有漁民出海捕魚之後失蹤。

前往萬角咀嘅路線遊人唔多,分岔路口甚少,只需一直靠右行,沿途坡幅僅有少量升降,中段會見到一個幾近無人嘅沙灘,但沙灘唔係康文署正式泳灘,故唔建議落水,反而可以散吓步,甚至坐低野餐,沙灘恬靜,令人心曠神怡,亦係獨木舟路線嘅一個休息點。

北端岬角本來風景優美,但現時陸路完全無辦法前往萬角咀,皆因款到盡頭萬角咀村時,路段已經被完全封鎖。編輯查問當地村民,發現係有人自行封村,封鎖前往海邊沙灘嘅陸路路線,故此可以提提大家從陸路係無辦法可以前往萬角咀。如果想去萬角咀,或者只有海路路線,一係包船,一係爆林,一係以獨木舟等工具先可以前往。由銀礦灣起步,直到萬角咀,水路路程等同相思灣至綠蛋島,但海面則未必如綠蛋島路線平靜而安全,最好先請求專業意見先從水路前往。

折返原路,可以返回剛才經過嘅涼亭,現時陸路要觀望萬角咀,就只有涼亭呢個位置,呢道來往萬角咀至梅窩嘅小徑係當年英軍建成。從涼亭眺望,可見萬角咀燈塔、沙灘,甚至細小嘅萬角碼頭。原路折返銀礦灣泳灘,中段亦有賞景位,可回望梅窩碼頭,亦可遠眺喜靈洲、長洲北端。

同剛才嘅萬角無人沙灘相比,銀礦灣沙灘只係一個比較安全嘅泳灘,海床淺,而且寬闊,但事實上水質污染嚴重,有唔少垃圾,編輯連步行落水都唔敢。銀礦灣本身位於大嶼山東南面,萬角嘅西面,背山面海,由於當年西北面山崗上被採礦,掘出白銀,所以海灣就叫做銀礦灣。而講到銀礦灣著名景點,就一定係銀礦瀑布、銀礦洞。

銀礦灣泳灘水質一直為人詬病,因為水質由80年代起為極差水平,到近年亦只係改善至一般水平,只有間中為良好水平。根據環保署環境保護互動中心資料顯示,銀礦灣泳灘近年維持於良好至一般水平,但2022年近月則被評為水質欠佳,即係三級水平,而大腸杆菌含量亦僅屬一般水平。

E.A.Tips :

❶ 銀礦灣沙灘水質一般,唔太建議落水。

❷ 中段無人沙灘亦非落水好地方,只係可作獨木舟休息點,或者陸路散步休息點。

❸ 於前往愉景灣方向嘅山路前行,第一個分岔路口為萬角咀。

❹ 萬角咀村現時自行封村,禁止外人進入沙灘、燈塔範圍。

❺ 陸路係無辦法前往萬角咀盡頭,只有水路可以前往,或者划獨木舟會係幾乎唯一可以前往嘅方法。

❶ 萬角涼亭係陸路僅有可以遠眺燈塔同沙灘嘅位置。

❷ 謹記經過萬角咀村唔好大聲傾談喧嘩,以免出現爭端。

❸ 由中環乘搭渡輪前往梅窩,價錢會比較貴,但時間就比較快,一般40至50分鐘就會到達。

❹ 乘搭大嶼山巴士路線3M,可從東涌前往梅窩,唔塞車時間約需45分鐘。

❺ 銀礦灣泳灘為康文署正式泳灘,有基本沙灘設施。

❻ 謹記自己垃圾自己帶走。
EATWO
Miss A

萬角咀

銀礦灣以東

銀礦灣

大嶼山梅窩