灣仔位置近中區地帶，餐廳食物一般都係比較昂貴，外賣小店就相對性價比高，當中有一間位於灣仔市中心嘅外賣店，以三文治為主打，包含多款滑蛋三文治，還有牛角包、意大利包，甚至飯盒，適合拍拖兩個人外賣自取。由於編輯打算將食物托至塔門呢啲離島，故未有選擇滑蛋內餡嘅三文治，以免三文治變形或變得濕潤。
小店只係一間外賣店，由上年9月開業至今，一直並無做堂食生意，所有食物都係便攜選擇，無論通粉、滑蛋飯等都有，比如滑蛋蝦仁飯、雙蛋蔥油飯。而招牌之作就係各款滑蛋三文治，包括黑松露炒蛋治、蔥花炒蛋治、芫茜(荽)炒蛋治，以厚身滑蛋作餡。
而意大利包則是長途選擇，即使托幾個鐘，都仍然可以保持「靚仔」。當中，煙三文魚牛油果醬意大利包$48 為店舖一款特別推介，內餡有酸忌廉、沙律菜、guacamole 牛油果醬、煙三文魚。麵包烘烤至乾脆，內餡軟腍，沙律菜嘅清新中和煙三文魚嘅鹹味，牛油果醬軟綿清爽，平衡酸忌廉嘅膩感。
至於豬扒意大利包$38Z，內餡大同小異，只係主要材料變成一塊豬扒，而豬扒雖然為薄切，但啖啖肉，唔會韌或乾柴。豬扒入口清淡，調味唔重，麵包整體比較清新，豬扒無肥膩感。
飲品方面有日式焙茶鮮奶$15、袋仔奶茶$10，前者為日式奶茶，而後者則為港式奶茶。日式焙茶鮮奶入口偏甜，奶香甜味較茶味重，而袋仔奶茶就如同舊式香港茶餐廳嘅絲襪奶茶，反而較有驚喜。
由灣仔前往馬料水碼頭，再乘搭1.5小時街渡到塔門，需時逾2小時，但意大利包依舊堅固，未有塌陷。塔門係近年香港其中一個為人熟悉嘅野餐地及露營地，東至弓洲，南至高流灣，西至海下灣、灣仔半島，北至赤洲，位置離大鵬灣、東平洲、大赤門不遠，一可環瞰全海景緻。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 店舖位處駱克道近柯布連道。
❸ 如果前往塔門，馬料水碼頭、黃石碼頭皆有船，但就要睇緊船期表。
❹ 食物即叫即整，需要等15至20分鐘。
❹ 塔門多牛，謹記唔好騷擾牛牛原居民。
❹ 記得自己垃圾自己帶走。
13 Thirteen
灣仔駱克道117號興邦大廈地下6號舖
星期一至五07:30 – 16:00；星期六08:00 – 14:00；星期日全日休息
5710 7271
塔門