山腳藏T形街牌！蕉徑營盤起步逆方向登蝴蝶山一隅享無遮擋上水北區風景

舊式T形街牌向來集中於九龍區、港島區，新界區、大嶼山、離島區都係比較少見，當中粉嶺區雖然有3個街牌，但跨過山嘅另一端，原來營盤方向重有一個T字街牌躲藏於山腳之下，位置同人嘅高度相近，拍拖兩個人於熱門嘅蝴蝶山、北大刀屻行山時，不妨抬頭查看一下呢個舊式街牌啦！由舊街牌起步，經營盤村亦可以直上蝴蝶山，一端小秘道可享無遮擋日落景，俯視上水方向，另一端可以直接往返粉嶺市中心，路段簡單又方便。

乘搭巴士路線到粉錦公路蕉徑村落車，於蝴蝶山營盤入口對面，抬頭一望，會發現一個懷舊嘅T字形街牌躲藏於一間鐵皮屋底，位置近蕉徑村村民福利會食堂，甚為偏僻，如同新界大西北。

蕉徑T形街牌

正對營盤村嘅蕉徑T形街牌，被放置於離地面只有約160至170厘米高嘅鐵皮屋牆壁上，一般人多數轉頭就能夠目睹，有可能係繼長洲、粉嶺皇后山嘅T形街牌後，另一個離行人最接近嘅舊街牌。

T形街牌係本地嘅舊式街牌，於19世紀末起出現，大概係1890至1960年，係英屬香港時期常見嘅文化產物之一。呢種舊街牌同現時以電腦印製嘅長方形新街牌大有分別，除咗呈T字形，亦以上英下中方式標示街道名稱，係本地傳統街頭文物。

此舊式T形街牌以鐵框瓷製，每粒字為陶瓷字粒，都係逐粒鑲嵌於鐵框內，鐵製街牌最大優點係夠堅固，就算經歷百年都仍舊簇新，呢點同皇冠郵筒一樣。

市區T形街牌多數未能保留，原因係政府並無保育，加上舊樓重建，或者係都市建設，甚至商舖或樓宇維修，令舊街牌逐漸減少，全港由近200塊減至不足100塊。粉錦公路蕉徑街牌暫時有幸獲得保留，或者係因為未有任何建設或維修，加上位置偏僻，此街牌先未有任何動靜。

經蝴蝶山至粉嶺市中心

蕉徑村對面就係營盤村，既係雞公嶺山腳位置，亦係蝴蝶山入口之一，只需要穿過營盤村，就可以上行至蝴蝶山，並折返粉嶺市中心。

一般人遊蝴蝶山，都會從粉嶺市中心起步，而蝴蝶山係全程瀝青路，除非要攀登北大刀屻或大刀屻，否則路段係簡單易行。蝴蝶山海拔僅高約240米，山上有涼頂，與高約256米嘅箕勒仔山頭甚為接近，山路靠近蝴蝶山村，山腳為蓬瀛仙館，山路係粉嶺居民晨運路線。

營盤係北大刀屻以下嘅谷地，由營盤起步，沿樓梯上行至分岔路口後，右邊就係通往粉嶺市中心嘅路線，而左邊則為穿梭上水嘅路線。先向左邊方向前行一小段路，會發現此路段係蝴蝶山嘅賞景路線，可俯視上水及北區一帶風景，例如蓮塘尾，甚至能夠遠眺深圳。

相對於蝴蝶山觀景台有唔少樹木遮擋，此上水路段反而可享無遮擋景觀，而且可以觀賞黃昏夕陽餘暉。前行上水路段比較複雜，加上Google地圖未有網絡收到，故難以摸索前行。不過，只要折返原路，就可以維持一星路線，返回蝴蝶山及粉嶺市中心。

來往蝴蝶山嘅路線有幾條，熱門路線係蝴蝶山徑、畫眉徑，返回第二個分岔路口之後，轉左就能夠折返粉嶺市中心，而右邊就係通往北大刀屻路線。於蝴蝶山返回粉嶺市中心，路段清晰，平坦易行，老少咸宜，而且大多數都遍佈樹蔭，基本上唔需要任何人帶路，就能輕鬆折返粉嶺蝴蝶山徑入口，全程只係約1小時步程。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線77K可以來往上水、元朗鳳翔路，只要於蕉徑落車，前行就係T形街牌。

❷ 於上水乘搭小巴路線57K亦可以前往蕉徑彭屋村。

❸ 穿過營盤村就可以上行至蝴蝶山。

❹ 上行樓梯之後，記得左邊係通往上水，山路較複雜，而右邊就係通往粉嶺、北大刀屻，山路較簡單。

❺ 第二個分岔路口會比較明顯，係蝴蝶山同北大刀屻分水嶺。

❻ 就算山唔複雜，都千祈唔好掉以輕心。

❼ 謹記帶備足夠糧水。