灣仔碼頭海濱野餐隨行拉麵價越南Pho堅似豚骨湯？人氣卷蛋店原為懷舊愛皮西大飯店？

灣仔係商業區之一，平常有大量打工仔，多數買Lunch都會買返公司食，而假期到灣仔食飯就可以輕輕鬆鬆到碼頭海濱野餐。灣仔食店有唔少，想買熱門咖哩飯，外賣都要等足1.5小時，倒不如食其他？其實重有唔少值得拍拖兩個人買Lunch嘅地方，今次試吓一間越南菜餐廳，菜式貌似Fusion菜，湯底如同食拉麵。另外，灣仔有一間人氣卷蛋店，由懷舊港式餅店轉化而成，既有傳統餅食，亦有高質素新店卷蛋，野餐值得一試。

毗連灣仔碼頭嘅灣仔臨時海濱花園位處灣仔海濱長廊內，近香港會議展覽中心，可眺維港兩岸景色，於海旁野餐，可以坐喺海旁座椅，亦可以坐於海濱花園內嘅人工裝置內，皆因花園內有小涼亭同木枱櫈。

位於灣仔市中心的越南餐廳Spring Field，於2019年開業，以越式越南河Pho為主打，招牌作係和牛濃湯，有指招牌春園河$81湯底係牛骨、藥材熬煮，配搭半生熟安格斯牛肉、慢煮牛肉條、蘿蔔粒，店舖為越南人主理。

相對於招牌作，更令人想嚐鮮嘅係鹿兒島黑豚肉濃豆漿冷河粉$84，雖然係日式拉麵價錢，但以養顏低脂濃豆漿湯底、鹿兒島黑豚肉，係冷食嘅河粉。豚肉肉質軟腍，肥瘦適中，唔嚡口，配料有大量紫洋蔥、青蔥、芫荽、炸蒜等，口感豐富。

最特別嘅地方係採用豆漿炮製湯底，而湯底混合河粉之後，變成豆漿河，口感卻似日式拉麵湯底，貌似豆漿與豬骨湯混合，食落似豚肉湯拉麵。河粉夾起唔算太碎、太油膩，略有煙韌感，河粉幾掛湯，黏上豆漿湯底原來都幾夾。豆漿湯底濃而不濁，豆漿鹹中有甜味，內有微微豆香，食落恍如拉麵一樣，湯底唔會好滯好膩，反而涼涼哋有啲清爽感覺，食完麵想飲埋湯，冷食河粉入口原來幾驚艷。

飲品中有凍香橙紅茶$18，以香橙取代檸檬，原來除咗檸檬配紅茶，香橙都幾配合紅茶，茶中帶橙香，入口酸甜，茶底有啲橙肉碎，幾解渴。

另一間想推介嘅係一間從懷舊港式餅店轉化而成嘅新式餅店，位於灣仔嘅「ABC餅屋」於中環都有分店，而中環分店前身其實就係從「ABC愛皮西大飯店」演變而成，原為主打俄羅斯菜嘅高級餐廳，由50年代至今有約70年歷史，主打香港傳統味十足嘅懷舊西餅、麵包，表面雖然新式，但室內仍然帶有復古感，現時傳到第3代，但其實係一間老字號餅店。

雖然有唔少傳統舊式麵包、蛋糕，比如拳頭包、真係菠蘿包、檸檬卷、合桃酥、曲奇、鳥結糖、甘筍蛋糕$6、香蕉蛋糕$14等，當中甘筍蛋糕係傳統Carrot Cake，以紅蘿蔔作餡，啖啖夾雜蘿蔔絲，而香蕉蛋糕亦有濃郁香蕉味，內有合桃粒，兩款蛋糕皆較乾身，但紮實飽肚，但近年最受歡迎嘅係一系列卷蛋。

小店內嘅人氣卷蛋口味眾多，最受歡迎嘅一定係顏色搶鏡、內含多款口味嘅蜂蜜卷蛋$12，層次係最豐富嘅一款，蛋糕有蜂蜜香甜味，內裏綠茶口味帶甘香，朱古力則帶微苦，紫薯亦帶薯香甜味，而香芋則只係微微芋頭味，並無太濃味。其他口味朱古力卷蛋 $8、紫薯卷蛋卷蛋、抹茶紅豆卷蛋、咖啡卷蛋、栗子卷蛋、檸檬卷蛋等，通通皆為凍食。