【橫濱景點】山頂觀景台180度瞰東京灣！高空俯全個1:1 GUNDAM 橫濱中華街至COSMOWORLD／紅磚倉庫手信街一日遊

橫濱係東京近郊其中一個熱門景點，距離東京新宿只係約40分鐘車程。橫濱係日本第一大港口，曾經用作與西方國家貿易往來，所以市內都係比較西化，現時都仍舊充斥住西式風格，擁有獨特嘅浪漫及魅力，適合拍拖兩個人去逛一逛。

「中華街」、「地標大廈」、「紅磚倉庫」，以至「COSMOWORLD」摩天輪，都係橫濱（神奈川）重要地標景點，今次編輯就帶大家橫濱一日遊，除咗「海洋塔」之外，重有一個隱藏版觀景台，可以環瞰東京灣風景，更可以俯瞰山腳下嘅巨型GUNDAM！

橫濱中華街

大多數「China Town」內行逛嘅人、進入餐廳嘅人都係以華人為主，但日本「橫濱中華街」就係以日本人佔多。事實上，「橫濱中華街」係全亞洲最大嘅唐人街，與「神戶南京野」、「長崎新地中華街」齊名，難怪每年有1800萬遊人到訪。「橫濱中華街」嘅歷史可追塑至1859年，屹今有劇160年歷史，600幾間餐廳中，當中至少有200間係中式餐館，好早期就成立一個華人小社區。

「橫濱中華街」交通便利，內有幾百間中式餐廳及商店，面積有約500平方米，大門口有一個充滿中華色彩嘅牌樓。除咗餐廳，中華街內有充滿中方特色嘅商店，例如係中草藥、醃製食品，甚至係酒品，於熙來攘往嘅大街上能輕鬆找尋中式美食及商品。

中華街內有唔少聞名嘅中式餐館，取名上都係好有中國特色，比如係「北京飯店」、「重慶飯店」、「廣東飯店」，甚至係「皇潮」、「蓬萊閣」、「聘珍樓」，其中「狀元樓」賣上海料理，「中華街王朝」賣四川擔擔麵，「龍翔記」賣烤鴨，「萬和樓」為素食店，「崎陽軒」就以燒賣為主打，而「菜香新館」則為港式茶館。

港之見丘公園展望台

由「橫濱中華街」起步，大概10分鐘步程，就可以到達一個非常有價值嘅橫濱賞景地點。位於橫濱市嘅「港之見丘公園」，向來係以欣賞園內「英國玫瑰園」、「花香園」嘅玫瑰花聞名，園內更有花壇噴泉等，一年四季都可賞花。而今次上行至「港之見丘公園展望台」，離入口只係大概5至10分鐘，短途又方便。

觀景台處於元町東面小山之上，環境清靜，曾經係唔少日劇取景地，山頂位置可從高空俯視橫濱港灣風景及橫濱街景，能180度環瞰東京灣海景，亦可遠眺「橫濱海灣大橋」。最令人意外嘅地方，係山頂觀景台位置可完全俯視山腳底嘅「橫濱海洋塔」、「本牧碼頭」，甚至係海旁嘅1:1 GUNDAM！

橫濱海洋塔横浜マリンタワー /橫濱港象徵塔 / 橫濱海洋塔

從山頂下行至海旁方向，可先近距離仰望被視為橫濱地標嘅「橫濱海洋塔」。呢座海洋塔係橫濱港嘅象徵，於橫濱已經屹立有逾半個世紀，一端連接「山下公園」，另一端靠近海旁，曾經被視為燈塔，現時獲稱為「戀人的勝地」。購買入場票，即可以進入海洋塔內，登頂後可從高空俯視橫濱港風景，成人入場費為750日圓，折合港幣近50元。

GUNDAM FACTORY YOKOHAMA（橫濱鋼彈工廠）

自問喜愛GUNDAM嘅鋼彈迷，到橫濱必然會去海旁嘅「GUNDAM FACTORY YOKOHAMA（橫濱鋼彈工廠）」！由2020年夏季起展出嘅超巨型1:1 GUNDAM機械人，現時消息指，只會展出至2024年3月，想要再朝聖就要盡早book定機票啦！

橫濱海旁呢款稀有嘅巨型1:1 GUNDAM，被稱為「行走的初化鋼彈」，皆因GUNDAM會移動，隔一段時間更會識自動行走同擺動，係一款巨型模型，近年人氣十足。入場可近距離觀看GUNDAM，亦可去主題餐廳、鋼彈基地，甚至可以進入鋼彈實驗室。不過，「GUNDAM FACTORY YOKOHAMA」成人入場費需要1650日圓，折合港幣近100元。

橫濱紅磚倉庫 2號館

「橫濱紅磚倉庫 2號館」單睇名稱及紅磚屋外形，感覺似文青或藝術地帶，大概係文化場地。但走入紅磚倉庫，會發現其實係一個購物中心，大多數商店都係以售賣手信為主，反而似一道「橫濱手信街」。

事實上，紅磚倉庫的確係前磚造倉庫，歷史可追塑至明治、大正時代，日本人對於歷史通常保留妥當，而且又會發揮創意，甚至物盡其用。紅磚倉庫外觀至今依舊完好保存，而內部先相當簇新，3層樓中分別設有大廳、多功能場地、音樂餐廳、展覽空間、咖啡館等，單單餐廳同商店都有超過30間，細心啲睇，都算係文化、商業兼備！

橫濱 COSMOWORLD

從紅磚倉庫折返JR櫻木町駅或地鐵港未來線馬車道駅方向，可以再前往橫另一個著名景點「COSMOWORLD」。其實「COSMOWORLD」係橫濱港未來21嘅城中遊樂園，免費入園，但個別遊樂設施需要收費。「COSMOWORLD」最有代表性嘅設施係巨型摩天輪、粉紅色過山車、旋轉木馬等，夜晚燈飾亮起時，配搭橫濱港夜景會更搶眼！

從海邊折返市區方向，穿過「萬國橋」時，可以遠觀巨型摩天輪。而摩天輪全名為「宇宙時鐘21大摩天輪／COSMO CLOCK 21 」，有超過112米高，頂端更有一個最大計時功能嘅時鐘！摩天輪轉動，坐於其中可環瞰橫濱港風景；而於摩天輪遠處，則可完全欣賞整座摩天輪，夜間時霓虹燈飾於每15分鐘就會轉變，加上河畔景亦唔輸蝕。而女神橋、國際橋則較接近「COSMOWORLD」，亦有相似風景。