【東京景點】走訪紅磚瓦頂著名地標東京車站編輯私心推介東京鐵塔最美視角！

到東京旅遊，走訪著名景點都係行程其中一環，其中東京駅及東京鐵塔都係東京重要地標，亦係拍拖兩個人都應該逛一逛嘅景點。要拍攝個個都影過嘅知名景點，當然最好找尋獨特視角，今次編輯私心推介於不走上東京鐵塔嘅情況下，拍攝東京鐵塔嘅最佳位置及角度，相信都係東京鐵塔嘅打卡位！

東京駅

東京駅係東京市主要交通交匯處，JR東日本、JR東海、東京Metro地下鐵等多條路線都會經過東京車站，地方偌大，出入口眾多，月台亦不止4個，人潮滿滿，車站為其中一個東京主要交通樞紐。

車站出入口都有明確指示，比如係東口係八重洲，西口係丸之內，重有南口、北口、中央口。東京車站內有「東京站一番街」，地下街商舖林立，係購買東京手信嘅好地方，同時亦包含為數不少嘅餐廳，當中有多間拉麵店嘅拉麵街、廚房街、動漫街及黒塀橫丁 (Kurobei Yokocho)，地下街包辦吃喝玩樂，同時係東京落雨好去處。

東京車站外係最值得打卡嘅地方，車站外觀傳統又有古典美，宏偉而壯觀。縱橫交錯嘅地下車軌之外，外牆都採用紅白磚瓦舖砌而成，加上屋頂呈圓形穹頂，優雅感盡現。樓高3層嘅車站於1914年修建完畢，整體長度達330米，屬明治時期之建築物。

東京鐵塔

另一個知名景點要數「東京鐵塔／Tokyo Tower」，係一座於1958年興建嘅東京電波塔，可用於廣播電視訊號傳送。鐵塔高332.9米，高度僅次於東京最高嘅晴空塔。東京鐵塔最大特色係橙紅色嘅鐵塔有如巴黎艾菲爾鐵塔嘅外觀。

東京鐵塔上設有兩座觀景台，主觀景台高將150米，頂層觀景台就高約249.6米，入場費不一。從東京鐵塔頂俯視，可環瞰東京市內一帶風景，甚至係360度俯瞰整個東京都。倘若天氣晴朗，甚至可以遠眺富士山呢！

而東京鐵塔下，就設有水族館、售賣紀念品嘅商舖，亦係購買手信嘅好地方。從鐵塔下仰望，東京鐵塔其實係紅白相間嘅顏色，用色有如日本國旗，只係鐵塔上顏色偏橙紅。

拍攝東京鐵塔嘅地方有好多，比如係甫踏出「赤羽橋駅」，已經可以直視整座鐵塔。而東京鐵塔下嘅「東京芝豆腐屋UKAI（東京芝とうふ屋うかい）」，亦可以觀看整座東京鐵塔。不過，要數編輯私心推介嘅最佳東京鐵塔視角，應該係通往東京鐵塔停車場嘅小階梯！

站於小樓梯，從下而上拍攝東京鐵塔，正對東京鐵塔，兩側切出斜角，令鐵塔高聳入雲，構圖獨特。從小樓梯可以拍攝鐵塔全景及基座，有如甫出家門就見到東京鐵塔一樣，呢道小樓梯絕對係IG打卡景點！只不過，停車場不時有車主及乘客進出，所以拍攝時需要經常讓人先走過。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭東京都營地下鐵至「東京駅」，穿過地下街上行即達東京站外。

❷ 乘搭東京都營地下鐵至「赤羽橋駅」，徒步約5分鐘即達東京鐵塔。

❸ 留意東京鐵塔地下停車場樓梯開放時間為08:00至22:00，而東京鐵塔最後入場時間則為22:30。

❹ 東京鐵塔瞭望台每日開放，09:00至23:00皆可進入，Main Deck大展望台 Top Deck Tour 成人票價為1200日圓，折合港幣約70元。