【台北景點】碧潭風景區200米吊橋賞小赤壁河景划天鵝船泛舟湖上、逛有蓋藝術市集打卡｜附碧潭交通方法

台北自由行有好多景點可以選擇，松山區已有不少，而松山新店線嘅另一端碧潭與台北車站有一段距離，為台北頗舒服嘅風景區，有時間不妨拍拖兩個人逛一逛，既有打卡吊橋、藝術市集，亦可於湖中浪漫划天鵝船。

「碧潭風景區」係新北市一個受歡迎嘅觀光景點，河面溪流有如一個水潭狀，湖面平靜，水色澄碧，加上一旁鮮見嘅巨型吊橋。而吊橋之下就有天鵝船及各種小船可供租借，讓遊人可以於碧潭湖上泛舟，欣賞湖邊風景。

由捷運出站，徒步一小段路即達「碧潭風景區」，旁邊為「新店老街」，當中有唔少小吃攤販，有如迷你市集或夜市。如果一大清早到碧潭遊覽，比較適合逛畢風景區先到老街醫吓肚，因為攤販近中午先會陸續營業。

「碧潭風景區」以「碧潭吊橋」最搶眼，吊橋建築為台北比較少見。「碧潭吊橋」連接新店溪兩端，為當地人提供橋樑。吊橋全長有約200米，闊約3.5米，最多可以容納大概1000人，僅限行人使用。碧潭吊橋海拔有約30米，吊橋下方為新店溪，可俯視碧潭一帶風景，包括有風景區較知名嘅「小赤壁」。

雖然「碧潭吊橋」貌似只係一道為行人提供服務嘅橋樑，但當地新北市相當重視，更將呢道雙塔雙鉸單跨式吊橋列為「市定古蹟」，吊橋既有安全監控系統，同時係碧潭一帶重要地標。而「碧潭吊橋」夜晚更有光雕，燈光亮起，照亮「碧潭風景區」，夜景更為誘人。

而「碧潭吊橋」另一端，可通往「和美山」，吊橋盡頭就係上山步道。只辰依循「和美山步道」走，就可以從較高空俯視「碧潭風景區」。不過，由於當日天氣太熱，編輯未有上行山路，下次先算。

吊橋下既為新店溪，遊人可於湖上泛舟，乘座天鵝船等小船，於「碧潭風景區」遊覽，划至左右兩端，河岸沿岸風光盡收眼底，詩情畫意，風景優美，兩個人走過風景區浪漫非常。將天鵝船撐到河岸一端，可見潭面之上為「小赤壁」，由下而上仰望，巨大石壁頗為壯麗，係風景區內地標之一。

折返吊橋原先方向，於租借天鵝船之上可見碧潭市集。該市集既有各式茶座、cafe，亦有遊戲攤位，甚至有藝術打卡位，讓遊人可以輕鬆chill一chill。當日時間太早，大多數市集攤檔都未有營業，不過亦可以見到每個店家牆壁上都有各種藝術壁畫，相當有趣。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運松山新店線至總站「新店站」，出站後往海邊走1分鐘即達。

❷ 碧潭附近有Youbike單車租借地方，位置近碧潭西岸、捷運「新店站」。

❸ 碧潭風景區內可划天鵝船，兩人座計每1小時NT300，電動船兩人座每30分鐘NT400。

❹ 碧潭吊橋夜晚會有亮燈。而3月及5月都會有水舞騷，近碧潭橋東岸廣場，都係近傍晚時間每半小時1場，總共有6場。

❶ 新店老街毗鄰碧潭風景區，為一道美食街，但大多數攤販於朝早11點後先會營業。

❷ 如果走路太遠，唔想沿路折返回程再行多次，可以於碧潭渡船頭坐人力船回程，由朝早6點至傍晚7點都有，成人每人NT30。

EATWO

Miss A

【區區有小店2024】葵芳9間尚存本土餐廳推介！高水準叻沙／潮州粉麵／小型居酒屋｜葵芳美食推薦2024