茶果嶺全新海濱公園建8米高鐵滑梯 7大遊樂設施+180度海景／3個彩虹打卡位｜香港玩樂好去處

盪韆鞦、氹氹轉、瀡滑梯、搖搖板、跳彈床、馬騮架等都係小時候必玩嘅公園遊樂設施，只係早年不斷有意見指危險，多數舊式公園設施都已經被拆除，想拍拖兩個人懷念吓都頗困難。最近觀塘近茶果嶺海邊有一個全新公園，將已經逐步變文化遺產嘅舊式遊樂設施重現海旁，當中最吸睛嘅係約8米高嘅鐵滑梯，重有色彩繽紛嘅3大打卡位，即睇公園內有咩童年玩樂設施！

今次「茶果嶺海濱公園」於8月26日正式開放，當日更有「酷玩3-4-5」為題嘅開幕活動。整個公園佔地有1.8萬平方米，並與觀塘碼頭、翠屏海濱項目相連，合共有約1.7米海濱長廊。於公園內，更可180度環瞰九龍東區維多利亞港海景！「茶果嶺海濱公園」係全新維港海濱共享空間，現時與其他海濱共享空間齊名，包括堅尼地城「卑路乍灣海濱長廊」、灣仔「HarbourChill 海濱休閒站」、灣仔「水上運動及康樂主題區」、銅鑼灣「活力避風塘主題區」、炮台山「東岸公園主題區」，以及荃灣海濱長廊。

「茶果嶺海濱公園」係由渠務署與維港海濱公共空間相關部門共同打造，為加深公眾對改善河道工程認識，以及探索公園設施，皆因公園園景平台正正處於污水泵房上蓋。更特別之處，係今次公園係無障礎公園，目的在於傷健共融，其中一個氹氹轉亦專為輪椅人士而設。公園內不單有多個為小朋友放電而設嘅玩樂設施，更有適合晨運客嘅健體設備，甚至有少量草地給予公眾於海景前野餐。不過，編輯覺得最終會變成假日極受「姐姐」歡迎嘅公園，到底點解？

「茶果嶺海濱公園」7大玩樂設施

「茶果嶺海濱公園」園景平台設有多項玩樂設施，並以「好玩自然」為design concept，將大地、空氣、天空、陽光、水與設施融合，連繫大自然與公眾，大大小小遊樂設施的確好吸引大人小朋友。相對於5000萬嘅噴水池，今次茶果嶺海濱公園都算係一地多用，至少給予公眾一個休憩玩樂嘅好地方。

1. ｜8米高超長滑梯

全場最吸睛嘅遊樂設施莫過於8米高超長滑梯，當中包含恍如攀爬地貌嘅攀岩陣及噴水池等，從地面上行，需要先穿過恍如舊時越野障礙嘅繩網陣。整個空間基本被繩網陣包圍，較低層有一個小型鐵滑梯，繼續上行則有另一個大概有8米高嘅鐵滑梯，唔少小朋友高呼「好驚」、「救命」，但仍不失興奮心情。滑梯與舊時鐵滑梯無異，正午陽光猛烈時，溫度上升，鐵滑梯變得滾燙焫肉。若正午時將一塊牛扒放在鐵滑梯，向下瀡至地面一層，牛扒應該會變成medium rare，縱然血淋淋，但可供食用，故旁邊亦帶提示寫明「注意高溫表面」。

2. ｜∞渠管迷宮捉伊人

走到園景平台，首先映入眼簾嘅係呈凹入狀嘅渠管陣，向下走自然會到達由無數渠管組成嘅渠管迷宮。當日，就見到一家大細於渠管迷宮內捉伊人，無論大人定小朋友，都可以隱身渠管迷宮前後，瓹窿瓹罅大玩特玩。另外，渠管迷宮旁邊更有太陽能發電系統及雨水收集系統，可經太陽能板於公園採集自然光。

3. ｜1個迷你跳彈床

所謂「童子軍跳彈床」，下一句係咩？相信好多香港人自己亦心中有答案。毗鄰渠管迷宮，就會見到小樹屋同迷你跳彈床。一個小山丘中設有彈力十足嘅迷你彈床，鍾意「彈彈」要小心，彈彈吓回到地面時，人隨時真係變得飄飄然。

4. ｜4個可愛韆鞦架

頂樓平台另一端有一個又一個小型遊樂設施，其中有4個造型可愛、但風格迥然不同嘅韆鞦架，雖然睇落似好兒戲、隨時冧落嚟，但唔少人盪得高亦安然無恙。又韆鞦架對出有少量草地，前臨維港海景，相信都係秋季野餐好去處之一。

5. ｜2個海景氹氹轉

平台中有兩個氹氹轉，一個係輪椅專用，另一個係無敵大海景氹氹轉，前者以無障礙設計，方便輪椅直入氹氹轉。而後者就以高低自轉設計，人坐上去，會自然轉動，當然同舊式氹氹轉一樣，可以自行加速。轉動時，無論咩方位，都可以享受維港海景，不過就要小心轉得太快，恍如見到偶像一樣暈得一陣陣。

6. ｜4種音樂緩跑徑

平台一隅可見幼兒區及小朋友嘅小型緩跑徑，沿途設有多個音樂設施。當中有鋼片琴、花形敲擊、七色鋼片、回音小屋、傳聲筒，只要敲下就會發出聲音。不過，編輯實試後就發現，似乎鋼片缺少部份音符，難以完整地彈到一句歌詞，1-4-3-4-2只出到兩三個音符。

7｜2x2小型搖搖板

另一個遊樂設施係小型搖搖板，位於最底層平台，外形令人誤以為係4人設計﹐但其實只係2×2嘅搖搖板。而呢一層平台既係展覽場地，亦有較大面積空間，當中又有幾個涼亭座位，木枱櫈更以台灣相思製作。相信每逢假日，呢一層必定成為「姐姐」們嘅休息地，其中一個有蓋座位甚至係相連木枱櫈，最適宜開大食會，無需暴曬，又有大片空間，相信一眾「姐姐」會最開心。

「茶果嶺海濱公園」3大打卡位

1. ｜彩色風車

平台上，有一個個彩色風車，顏色鮮艷奪目，位置靠近幼兒專區。當風車遇上風，會自然地轉動，七色風車於公園內亦甚搶眼，構成獨特打卡位。

2. ｜七彩涼亭

園景平台中有一個又一個涼亭，頂端皆以七色玻璃設計。當陽光猛烈時，於光線折射下，地面會構成色彩豐富畫面。更特別之處，係每個涼亭頂部造型不一，形狀各異，故可折射出唔同效果。不過，七彩涼亭設計同早前西九龍圓方商場設計極為相似，編輯曾走訪圓方商場展覽，發現今次涼亭設計同上次商場展覽設計極為相似，其中一個連七色玻璃下嘅雲朵形座椅亦好相似，整個設計及成品更加有如倒模！到底係同一件藝術品，定係同一個設計師，抑或係如有雷同、實屬巧合，則只有設計師自己及展覽搞手先知啦！