【中秋好去處2023】最真實大澳廣場VS隱藏超靚花燈階梯！香港花燈節夜繽紛始祖逾300個手繪燈籠掛滿大澳天空

今年，以手繪燈籠打造香港花燈節嘅地方愈來愈多，而呢種手繪燈籠模式嘅花燈節，元祖始於大澳非茂里團體。今年大澳繼續貫徹以往初心，將手繪燈籠掛滿大澳小島每個角落，發出代表希望嘅亮光，再次為居民及遊人帶嚟中秋活動，為拍拖兩個人中秋好去處之一。不過，平常最熱鬧嘅大澳天后廟對出廣場，竟然演變成一片鮮紅旗海，將DIY花燈全部遮薇，難怪鮮見人流停留花燈之下。編輯今次推介大家到一道隱藏大澳階梯，花燈佈滿頗高嘅樓梯當中，絕對稱得上打卡位！

身為「香港花燈節」始祖，一早就自行帶出夜繽紛，多年來為香港增添色彩，為中秋佳節添上氣氛。早前，「大澳非茂里」就已舉辦多場「手繪燈籠工作坊」，為中秋節做足準備，於日前（18日）已於大澳天空掛上一個又一個獨一無二嘅手製彩繪燈籠。而「大澳非茂里」總部更有大量貓咪及狗隻，店內外亦有唔少手作供售賣，水準不俗。

今年一如以往，由大澳主要場景至每個角落，都掛滿手繪燈籠，現場燈籠設計及畫風各異，手繪燈籠有獨特風格，甚至更多貼近生活嘅圖案。而以往雖然有好多個人氣男團mirror燈籠，但今次mirror主題手作燈籠數量極少，同時其他男團女團嘅燈籠亦不見蹤影。想要找尋喜愛嘅燈籠，就要親身到大澳仔細尋找啦！

只不過，由於今年中秋撞正10.1國慶，故同時撞正大澳中秋花燈節。據編輯親臨大澳目睹現場環境，「大澳鄉事委員會廣場」於上星期已經變成一片鮮紅旗海，通紅旗熾佈滿整個廣場，而所有大澳手繪花燈都要靠邊站，甚至被紅噹噹旗海完全遮蔽。本來每個週末都有遊人於廣場中影相打卡，但於上星期竟然一個停低嘅遊人都無！

反而，通往「勝利」蝦膏廠及「大澳文物酒店」嘅路線，中途不僅有大量手繪燈籠，亦有日本主題展覽。前段為手繪燈籠，而穿過大澳郵政局及消防局後，就會去到後段日本主題展覽。展覽中只有大量簡潔純色燈籠，最得別之處係中間加插一個「blue girl」燈籠，雖然明顯係宣傳展覽，但編輯覺得呢個宣傳頗成功，既唔突兀，亦帶到宣傳效果。展覽中，更有巨型月球、叮噹吹氣公仔，以及神社繪馬、日式燈籠牆等裝飾，相信可以吸引遊人打卡。

於2023年9月24日，「大澳鄉事委員會廣場」 / 「茂里。次所」將會有市集攤位、工作坊、音樂表演、裝置展覽等中秋活動，屆時會有創意市集、漁光餘光音樂祭、藝術裝置，活動皆來自大澳非茂里大街小藝「非茂里Art Like祭」。

今次活動地點為「茂里。次所」，建築物實為二級歷史建築，其中四幢並列嘅大澳街市街 7、9、11 和 13 號，更加係戰前露台式商住兩用唐樓。建築物樓高兩層，以上舖下居設計，加上露台欄柵，被稱為「店屋」。目前，「茂里。次所」為大澳華商會辦公室用途。

編輯想要特別推介嘅大澳花燈打卡位，正正位於通往「茂里。次所」嘅狹窄樓梯中！若然唔係刻意找尋，相信大多數人都唔會留意到大澳小島中嘅呢道狹窄又陡峭嘅階梯。小樓梯內燈籠唔算太密集，但又感覺剛剛好，加上昏黃光線，打卡時更有中秋感覺。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 中秋活動將於2023年9月24日（星期日）15:00-20:00舉行，地點係大澳鄉事委員會廣場 / 茂里。次所。

❷ 於2023年9月23日（星期六），「茂里。次所」將會舉行<漁光.餘光> 展覽 X 放映 X 分享音樂會。票價為$180，包飲品、演出、音響設備、燈籠材料。

❸ 每位參與大澳工作坊均會獲得藝術節精美紀念 Boxset 乙份（價值$120）。

❹ 「茂里。次所」需要經樓梯上落，但室內唔開放。

EATWO

Miss A