8月延長營業時間！旺角隱藏角落宵夜好地方超值價歎車仔麵X串燒獨創荔枝肉串？

旺角鬧市內美食眾多，但要重新開放夜市，其實稍有難度，皆因只要實地引證，拍拖兩個人夜晚前往旺角一遊，不難發現夜晚嘅旺角已經唔再係以前嘅旺角。曾經熱鬧嘅旺角，唔再旺，大多數食肆都提早落閘，而市民亦多數已經習慣提早歸家。想要於旺角搵宵夜地方唔容易，而今次eatwo就帶大家走遠少少，原來離主要街道有一段距離，一直以來都有一間宵夜小店屹立旺角街頭一角，而且價錢極為親民，最新消息8月中更延長營業時間，由夜晚開舖提早至中午前開舖！

以旺角美食嚟講，呢間位於甘霖街嘅「旺角88」，雖然隱藏於離主要通道有一段距離嘅角落，但都算係編輯私心之選第一位。即使受到打壓，都依然唔放棄，呢啲先係香港人精神。由良心至性價比，小店都係排行高位嘅選擇，明明開咗5年，竟然而家發現？

店內以車仔麵、串燒為主打，原先只係於傍晚7時起營業，前來嘅大多數都係附近大專院校嘅學生。但經編輯證實，小店由8月中旬起，將會延長營業時間，由傍晚7點提早至朝早11點開舖，方便大家午餐、下午茶、晚餐或宵夜。

即使門面極唔吸引，門口更有棚架遮擋，但其實小店已擺有招牌於大街上，店舖只係位於轉角位。而店內有車仔麵，包括三餸一麵$39、四餸一麵$44，齋睇價錢都係時光倒流親民價，湯汁帶秘製辣汁、沙嗲汁、咖哩汁、冬蔭功湯、豬骨湯、牛腩汁，其中腩汁清香，豬骨湯味濃郁可口。

車仔麵多為正常麵底、餸菜，較特別有招牌元蹄、沙嗲牛肉、沙嗲魚蛋、五香豬扒、田園蝦餅、招牌南乳豬手等，元蹄肉質軟嫩，而牛肉就似以沙嗲醃製，部份滲漏於湯汁內。蘿蔔則為係車仔麵必點之選，既要軟嫩無渣，亦要吸附湯汁。

多數小食平均$24至$32，當中韭菜豬紅$24，亦有招牌少爺雞翼尖、招牌麻辣豬爽耳，韭菜豬紅與坊間有別，並非以厚重醬汁為重點，反而係微辣湯汁，豬紅實淨，唔會一夾就散開。

宵夜必備嘅係串燒，一般平均由$10至$100不等，老闆娘特別推薦招牌荔枝尚肉串$18、椒鹽秀珍菇、紅酒香草燴羊架，先點荔枝圓肉串，賣相吸睛，肉片包裹圓潤荔枝肉，必須一啖入口！將肉片與荔枝同時送進口中，肉片鹹香與荔枝香甜混和，鹹中帶甜，只有極少孜然粉，絲毫不膩，能夠做到平衡味蕾，原來係小店獨創嘅得意作品。倘若一次食幾款串燒之後，再點一串荔枝圓肉串，自然口感清爽不膩。