【曼谷購物】曼谷潮流選物店Another Story隱身EmQuartier 本土設計／時尚家品／可愛文具／咖啡店應有盡有

曼谷商場有好多，唔少人都會拍拖兩個人去逛一逛，而最為人熟悉嘅商場大多數集中於Siam一帶，其次就係Asok；今次編輯就去吓近BTS「Phrom Phong 站」嘅「The EmQuartier」商場，並推介一間曼谷潮流選物店，當中有當地設計精品，以及各款時尚家品、可愛文具，店內更有一間咖啡店可以chill一chill呢！

於2015年開幕嘅「The EmQuartier」，正正位於「The Emprorium」對面，亦係一間大型商場。室內分成三幢建築物，全部互通，所以落雨都無需要怕淋濕自己及戰利品。

「The EmQuartier」基本上分成A、B、C 三棟建築物，A棟係「HELIX Emquartier」，主要有大品牌、美容中心、家品等，亦有一個半露天小花園「Quartier Water Garden 空中花園」，綠意盎然；而B棟為「The Glass Emquartier」，內有一個美食廣場，亦有泰國設計品牌、書局等；至於C棟則為「The Waterfall Emquartier」，顧名思議有一道外牆瀑布，有如熱帶雨林，甚有森林感覺，室內亦有超市、food court、市集、時裝店、cafe、IMAX戲院等。

今次集中講吓商場內一間文青味十足嘅商店「Another Story」，店內並非主打大品牌，反而係一啲泰國當地嘅小手作品牌。店內價格唔算太高，款式眾多，產品設計精美可愛，消費上人均可能600泰銖就有交易。

據悉，店內有超過100款小眾精品，而非大眾品牌，而泰國本土品牌就佔約70個，不時搜羅世界各地好物。店內產品眾多，無明顯大分類，卻又井然有序，當中包含有各式生活雜貨、服飾、環保帆布袋、背包、家品、文具、燈具、紅酒、文創產品等，好多都係當地設計師嘅作品。店內充滿生活氣息，如果想要買手信送人，呢間店舖都係唔錯嘅選擇。