【曼谷美食】Ari區9大網美Cafe推介！宮廷下午茶／新潮甜點有1間係曼谷人最愛Coffee Shop！｜附價錢、位置及交通方法

曼谷Ari區係一個中產地區，以旅遊界嚟講，最大特色係區內充斥咖啡店，網紅Cafe比比皆是，梗有一間喺左近，拍拖兩個人走一轉Ari區，隨時可以咖啡喝到飽！即睇E.A.Two推介9間Ari區網美Cafe推介，裝潢及美食皆為打卡之選！

Thongyoy Café

距離Ari站僅有約5分鐘步程嘅「Thongyoy Cafe」，以花及華麗宮廷風為主題，整個空間都滿滿花卉裝飾，繁花似錦，五彩繽紛，配以泰式傳統甜點襯托，不妨花牆下歎吓少女味十足嘅泰式甜點下午茶。

咖啡店內主打網美風，華麗而有貴氣，整體裝飾帶有些微浮誇風格，粉紅浪漫花牆與夢幻繁花堆砌出IG打卡位，喜愛少女風嘅朋友必到。下層為用餐地方，而上層則為服裝店，其中有唔少泰國風長裙，不過裙腳真係比較長，要較高先可以著得起，價錢就偏貴，約1000泰銖左右。

店內有唔少單點甜點，另外亦有套餐可以選擇，包含有下午茶Tea Set，例如係Combo Set，每份590泰銖，折合港紙大約為150元，兩個人平分僅約75元，不過未連稅。Combo Set基本包含4樣嘢，一份Thai Dessert Set、一份Soda Set、一份Tea Set，以及一份Cake。所有容器都係採用玫瑰金設計，顏色金光燦爛，摸上手狀似黃銅，設計似模仿宮殿級下午茶，頗有gimmick。

下午茶甜點為手工製作，飲品包含有1壺茶及兩杯梳打類飲品，其中1杯係荔枝玫瑰梳打，另1杯則為檸檬蝶豆花梳打，不過不失。下午茶套餐亦包括2小碟小食、1件蛋糕、1件撻﹐以及5款泰式傳統甜點。大多數甜點都係以椰奶炮製，入口偏甜，亦以糕點為主，包含有黏有箔嘅糯米飯、花瓣形椰奶餅、椰奶布甸、斑蘭椰絲球、同樣黏有金箔嘅椰奶糕點。另有莓果撻及芝士蛋糕，對香港人來說，會比傳統泰式甜點容易入口，無咁甜膩，其他甜點單點為30至60泰銖，蛋糕則為150泰銖起跳。

Oh! Vacoda Café

牛油果迷召喚！喜愛牛油果嘅朋友，必到呢間以牛油果為主題嘅「Oh! Vacoda Cafe」。位置上與「Thongyoy Cafe」有一段小距離，但與BTS站亦只係10至15分鐘步程。

「Oh! Vacoda Cafe」門口有一架復古味濃厚嘅電單車，而門面則以橙紅色為主調，小燈牌亦為牛油果造型。店內外更有唔同擺設，例如舊式傢俱及海報，方便客人打卡。

店內以輕食及飲品為主，大部份為以牛油果作主要食材，包含有Avoothie、Two Tone Avvothie、Affocado、Americado、Mochado、Cacao-cado幾款牛油果咖啡，重有一款寫明Avocado Tea Blends，價錢由90至180泰銖不等。食物則有牛油果脆片打拋豬肉飯、牛油果沙律等，價位為150至190泰銖。

其中，Avoothie一杯150泰銖，牛油果脆片打拋豬肉飯每份190泰銖，前者加入士多啤梨口味，上面呈粉紅色，下面則為牛油果色，入口清新；而後者最特別之處係將牛油果變成香脆薯條，表皮脆卜卜，內裏仍為軟腍牛油果肉，其餘同一般打拋豬肉飯無異。

After You Dessert Cafe

講到最為人熟悉嘅曼谷甜品店及cafe，必然係「After You Dessert Cafe」。Ari區嘅「After You Dessert Cafe」係最接近BTS「Ari站」嘅一間，分店位於全新複合式商場「La Villa」。

店內同樣以各式甜點及冰品為主打，尤其係泰式珍珠奶茶刨冰、蜜糖吐司、芒果糯米飯刨冰等，每份多數賣100至250泰銖，其中芒果糯米飯刨冰更賣265泰銖，價格頗高。

Onedee Café

位於Soi Ari 1嘅「Onedee Cafe」，距離BTS站只係約5分鐘步程，與「Thongyoy Cafe」有一種對比感覺，皆因店內嘅甜點並非傳統甜點，反而係比較新潮，有種意想不到嘅crossover感覺。

「Onedee Cafe」將傳統泰式甜點同新式甜點二合為一，再加上雪糕球及新鮮水果等無添加材料，創意度甚高，既係IG打卡甜點，入口亦有新鮮感。如果要進入食甜點，建議登上2樓，上層有一個圓形大窗戶，為當地人熱門打卡位。

甜點每份由109至189泰銖，最平嘅係雪糕球配泰式甜點、雪糕球配蝦膏及糯米飯，而最貴則為雪糕球配芒果糯米飯。先挑選一杯Southern Thai Milk Tea with Black Jelly 125泰銖、一碗Klong Klang with Plam Sugar Ice Cream 149泰銖，前者上方有甜蛋絲，似泰式奶茶加上椰絲及仙草，而後者則為自家製雪糕配上椰奶汁及粉條，設計似一件藝術品多過甜點。最特別在於容器充滿復古味，皆因甜點碗係來自泰國國寶瓷器「班加隆」，有如Trad Style，傳統而復古。

Frank cake bar

從Ari Alley步出，馬上會見到有3間相連嘅cafe，其中一間名為「Frank cake bar」。店面地方極小，主色為偏粉紅，該店以黑白朱古力甜點為主打，亦有大量朱古力味茶飲，包含有朱古力配薄荷、orea、香橙、焦糖等，非常邪惡，每杯價格由75至150泰銖不等。

Witty Ville

毗連「Frank cake bar」嘅係「Witty Ville」，門面以湖水綠色為主調，用色搶眼，店內地方同樣細小。該店有別於其他以蛋糕或泰式甜點等小吃為主打，反而主要售賣西式鬆餅，當中有多款口味，比如係原味、朱古力味、士多啤梨味、抺茶味，甚至係煙肉味等，由自家烘焙，甚受當地人歡迎。每個鬆餅價格由65泰銖起，折合港幣僅約15至20元，性價比高！