【曼谷購物】近曼谷是隆街／帕蓬夜市！全新商場Silom Edge毗鄰Silom Complex 美食廣場24小時營業！

曼谷是隆街係其中一個市中心地標，其中有帕蓬夜市、Boy Street及日本街，被稱為「小東京」，向來吸引拍拖兩個人逛逛。而夜市附近有2個商場，一個BTS出站即達，另一個於2022年底方才開幕，商場內更有一個24小時營業嘅Food Court，夜貓必到！

帕蓬夜市 PatPong Night Market係曼谷市內夜市之一，同時係曼谷知名紅燈區，距離BTS站僅有約5分鐘步程。日光時間其實無咩睇，只有當地人穿梭其中返工放工，而7點入夜霓虹燈亮起，先至成為絢麗紅燈區。夜市內以販賣仿製品為主，而旁邊則酒吧林立，主打夜生活場所，包含有人妖、鋼管舞，甚至泰拳show，而Boy Street則名副其實會較多男人企街。

Silom Complex

想要於Silom區找尋購物勝地，必然要去2012年翻新重開嘅正式購物商場「Silom Complex」。商場毗連BTS站，交通便捷，2樓更有天橋連接。商場內店舖眾多，較為生活化，B1地牢為美食街，有多間餐廳可以選擇，比如係知名泰式甜品店After You。

「Silom Complex」樓高6層，內有約200間高店，每一層都分為唔同類型品牌。比如地下G層為時尚品牌專門店，樓上則為藥妝店，而3樓就係書店等生活化商店，再上層就包含各式餐廳及商店，比如Daiso、超市Tops，4樓就有知名泰國菜餐廳Banana Leaf，5樓更有泰式按摩店，每層之間都有唔少咖啡店進駐。

Silom Edge

位於「Silom Complex」斜對面嘅「Silom Edge」，於2022年底開幕，係近2年區內新商場。商場距離BTS及MRT站皆不遠，交通便捷。雖然商場內地方不大，而且商店不多，但最大特色就係擁有24小時嘅美食廣場！

事實上，「Silom Edge」係以曼谷另一個商場「Midtown Samyan」為藍本設計，將24小時營運模式移師新商場。令「Silom Edge」成為與別不同嘅曼谷商場，唔再夜晚10點結束營業，而係將開放時間延長，並將美食廣場變成24小時營業嘅「不夜城」模式，適合一眾夜貓前往歎宵夜。

商場樓高21層，不過有一半都係辦公室用途，只有9層係公眾可以前往嘅空間。基本上，地牢B1層至地面G層都係美食廣場，聚集唔少平價餐廳食肆。24小時營業嘅餐廳有韓式炸雞店Gugu Chicken、Lin Hotpot Mila、Malatang、A Ramen、Ginger Farm、KFC、Shiko Udon Bar、甜品店Swensens、Nam Nam Pasta，以及咖啡店Pakamara等。

上面1至2樓有少量生活化商店，而再上2層就係健身中心、醫療中心等，亦有LOFT分店。再徒步較上層位置，不難發現有唔少店舖仍未有營業，只係寫住「Coming Soon」。不過，商場重有另一個有趣特色，有洗手間嘅同時，竟然重有沖涼房！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭BTS至「Saladaeng站」，落車後於4號出口徒步即達Silom Complex，天橋會連接商場2樓。MRT「Silom站」同BTS「Saladaeng站」距離只有3分鐘步程。Silom Edge位於Silom Complex斜對面，只有約3分鐘步程，比較近MRT「Silom站」。

❷ Silom Complex多數店舖只營業至21:00，少數會營業至22:00；Silom Edge內嘅餐廳則為24小時營業。

❸ 如要前往帕蓬夜市，於BTS「Saladaeng站」1號出口即達，而3號出口就會比較近Boy Street，4號出口會較近日本街。

❹ 帕蓬夜市樓上酒吧比較複雜，最好唔好冒險前往。