【曼谷按摩Spa】曼谷8間中低價位按摩店！實試平價泰式／水療／精油／足部按摩

曼谷旅遊除咗陽光與海灘，Spa亦係Must Do Item，想要拍拖兩個人找尋按摩店，不妨睇睇E.A.Two編輯以下實試過嘅8間中低價位按摩店﹐價相尚算親民，包含泰式按摩、水療按摩、精油按摩、足部按摩等等。

Treasure Spa

Siam座落曼谷市中心，區內有唔少按摩店，要搵一間做Spa亦困難。位於Siam Square嘅「Treasure Spa」﹐算係唔係好熱門嘅按摩店，但其實亦係一間Siam大型按摩店。「Treasure Spa」分店唔多，只有Siam Square One及Thonglor兩間分店，但就係編輯私心推薦嘅一間按摩店。

今次去「Treasure Spa」十幾年經驗，Siam分店內樓高4層，外觀上頗為霸氣。大樓以藍色為主調，室內地方偌大，裝潢時尚而有品味﹐進入按摩店時需要換上拖鞋。其中，第二層就係接待處，預訂booking之後直接拎出booking資料就得。

二、三、四樓都有唔同房間，可以選擇二人房或三人房，方便同認識嘅人同一間房做按摩。該店不時有優惠，例如朝早免費送30分鐘療程、二人同行又有special price。facial、按摩服務應有盡有，而肩頸按摩及腳底按摩就幾百泰銖就得，豐儉由人。而簡單100分鐘「Thai Treasure」為泰式按摩，同樣於獨立Spa房做按摩，則只係1500泰銖，折合港幣僅約375元。

當日編輯挑選店內價格較高嘅「Warm Rose Package」，包含150分鐘療程，合共2.5小時，人均2890泰銖，折合港幣約722元。整個Package除咗60分鐘全身按摩﹐亦有身體磨砂，更有20分鐘草藥香薰蒸浴及20分鐘牛奶浸浴。另外，療程前會有一杯迎賓飲料及冰毛巾，飲品其實都係一杯泰式茶，而Package最後亦包括一份「Thai High Tea Refreshments & Relaxation」，完成後可以歎一份泰式層架鹹甜點，打卡必備！

「Warm Rose Package」於比較大嘅Spa房做按摩，一間房內已有各項設施，包括蒸氣房、浴缸、沖涼房，以及裝有草藥嘅小瓦壺。換上衣服後，技師於療程開始時會先為客人清洗雙腳。然後，可以走入去蒸氣房，做一個芳香草本蒸氣浴，20分鐘後自然會有技師提醒。

之後就可以平躺於按摩床上。做身體按摩時，技師會利用溫暖玫瑰、茉莉香米敷喺身體上，期間會同時以蜂蜜做埋身體磨砂，技師好專業。完成按摩及磨砂部份，可以跳入技師預先準備好嘅花瓣牛奶浴，一個人浸於浴缸內，暖笠笠牛奶浴浸透全身，更能夠放鬆身心。

折返2樓，離開前會有小點心同一杯茶，而編輯挑選嘅Package則有一份泰式層架下午茶。上下層各有3份小點心，合共有6款點心，加上一杯茶，享受高雅感覺，店員服務亦親切。

Let's Relax

講到最為人熟悉嘅曼谷按摩店，必然係分店眾多又屢獲殊榮嘅「Let’s Relax」。直接去最就腳嘅Siam Square One分店，人流果然係特別多，預訂咗就唔使點等候。

老字號「Let’s Relax」嘅按摩以草藥敷布、精油、熱石為主，可以選擇按摩、磨砂、芳香療法。若然只係揀1小時嘅泰式按摩、香薰精油按摩或泰式草藥sauna，價錢只係500至600泰銖。今次挑選Dream Package及Heavenly Relax with Hot Herbal Compress，價格分別為850泰銖及1500泰銖，折合港幣約212元及375元。

若有同行朋友，基本上會安排於同一間房做按摩，做完身體按摩，又會帶到另一間房做腳底按摩，事前當然要先換上拖鞋及清洗雙腳，亦要換衫。其中，「Heavenly Relax」即係有45分鐘足部按摩，加上120分鐘嘅泰式按摩與草本熱敷。採用身體按摩嘅房間較私人，而腳底按摩嘅房間就會有其他客人，該房間更正對樓下BTS Siam站。

只要療程服務超過850泰銖，於完成之後可以每人享用一份芒果糯米飯，另外重有一杯熱薑茶。即使一間泰國按摩店附送嘅芒果糯米飯，以當地計水平唔算高，但質素已遠比香港嘅芒果糯米飯有水準。

One More Thai

位置毗連「Chit Lom站」嘅「One More Thai」，雖然交通方便，但大門口位於小巷內，比較隱蔽，亦係比較少港人搵到嘅曼谷按摩店。

店舖分成兩邊，比較近大馬路嘅門口係主要接待處，內裏有客人等候區及售賣精品嘅地方，樓上則為房間。另一邊門口則有兩個用途，樓上係房間，而地下就係為客人拍攝泰服嘅地方，一端有唔同款式泰式可以選擇，更有化妝檯。成人每租借4小時需900泰銖，優惠價則為720泰銖，同時需要每位2000泰銖作按金。故此，「One More Thai」客人除咗可以做按摩等療程，亦可以有泰服體驗，店內可以直接租借泰服打卡！

「One More Thai」按摩療程可以預先於Klook預訂，價格較相宜，若兩個人同時做同一款按摩，更可享買1送1限時優惠，平均每人港幣僅約103元，比足部按摩更抵做！店內按摩療程包括全身泰式古法舒壓按摩及草藥球按摩、泰式足部按摩、泰式香薰精油芳療按摩、泰式熱油按摩，以及各式按摩護理等。

今次只挑選2.5小時嘅清暢舒緩按摩護理，人均港幣約441元。療程包括有60分鐘全身泰式按摩、60分鐘泰式熱油按摩，以及30分鐘肩部按摩，房間以布廉分隔，技帥手法純熟。全身泰式按摩會結合伸展及指壓技法；泰式熱油按摩會使用加熱精油進行按摩，舒緩肌肉緊繃，緩解疲勞；肩部按摩會使用手指、手部與手肘按摩舒緩肌肉僵硬，適合經常坐辦公室嘅朋友，亦適合shopping完想揼骨鬆一鬆嘅女士們。

療程前後，基本上都會有一杯草本茶，完成後休息夠，飲完泰國茶，同其他按摩店一樣，由於已經預先付款，所以無問題就可以自行離開。

OASIS SPA

「OASIS SPA」目前擁有3間分店，該店以綠洲為題，全名為「Oasis Spa 綠洲水療」。縱然按摩店位置較偏僻，但室內外整個空間都充滿度假風，屬中價位Spa按摩店，亦曾獲得「亞洲水療年度最佳日間水療中心大獎」，相信有唔少港人已經熟悉。

今次選擇距離Asok區比較接近嘅Sukhumvit 31分店，距離BTS Asok站有20至25分鐘步程，所以係比較遠。原來該店係有免費接駁車來往「Phrom Phong 站」，如果唔想行嘅話，不妨向官網預約接駁車服務。

當以為預先於kkday預訂，並已付款，加上官方facbook inbox confirm。當以為萬無一失時，店員竟指查無此booking。原來於kkday預訂之餘，更要官方confirm再confirm，即名副其實double confirm，否則會被視作無效。還好等15分鐘後有空房，否則需要向kkday退款，prepaid再搞退款唔係問題，重點係浪費旅程時間與精神。按摩店店員服務不俗，但官方與kkday溝通就大有問題，預訂呢個層面絕對要俾負評！

招牌按摩及熱油按摩都係港幣311元起，療程可以選擇1小時芳香熱油按摩、1小時綠洲四手按摩、2小時綠洲帝王按摩、2小時綠洲女王按摩、150分鐘古暹羅安神放鬆按摩。編輯只揀咗比較平嘅芳香熱油按摩，療程需時60分鐘，當日價格為港幣303元，價格上仍算一般人可以負擔嘅費用。

由接待處到樓上房間，穿過花園，整個空間都係偏向簡約風格，房間有兩張床，可以兩個人認識嘅人同時做按摩。另外，房間亦有浴缸、洗手間及淋浴間，而淋浴間為半露天空間，有種於戶外淋浴感覺。該店連毛巾、棉花棒、梳都有放於客人個別小籃內，方便客人有需要時使用。按摩前，有需要亦可換上即棄底褲，小籃內似乎咩size都有。技師手勢不俗，手法及力道適中，不過不失，唔會好痛，旅行時想要適量放鬆及舒緩就適合。

療程前後，店員都會遞上毛巾及泰式冰茶，冰茶帶有香甜味，甚解渴。療程後，一邊休息、一邊飲冰茶，再感受外邊清幽環境，令人放鬆。不過，當日附近有工程，所以貌似綠洲被污染一樣，有少少嘈，但好彩房間都算隔音。

Lek Massage

於曼谷擁有十幾間分店嘅「Lek Massage」，為當地連鎖按摩店，分店眾多，無論Siam Square、Asok、Thonglor，抑或Chong Nonsi、Sala Daeng等都有分店，而且位於BTS附近，交通便捷。最大優點係該按摩店營業至凌晨12點，對於鍾意旅行逛到好夜嘅朋友就係福音，按摩完直接返酒店就Perfect池！

「Lek Massage」有獨立按摩房及足部按摩房，一般以泰式按摩、香薰精油按摩及足部反射療法為主。店內有120分鐘Package，每60分鐘做2款按摩，可於足部按摩、臉部按摩、泰式按摩與精油按摩選擇，價錢為800至1200泰銖不等。另外，Asok區分店內亦有修眉、修甲等服務，皆因該店係同時叫「Spa」及「Salon」。

由於時間太夜，亦無預約，所以編輯今次係walk in進入，只係做咗Foot Massage，當中有30、60、90、120分鐘任擇，價格分別為350、450、650、850泰銖，最平只係港幣約87元。換上拖鞋及清洗雙腳後，技師就會帶客人走入一間足部按摩房間，房內同時有其他客人，當日甚至聽到有客人打呼睡著嘅聲音。

「Lek Massage」既然係連鎖店，服務亦不過不失，技師手法純熟，療程後，技師會遞上一支水，之後就可以自行離開。

Smile Massage

平時去曼谷旅遊，通常去開比較大型嘅按摩店，今次就嘗試吓較為街坊嘅按摩店。由於編輯選擇Asok區嘅酒店，所以亦試過另一間位於該區嘅按摩店，名為「Smile Massage」。

「Smile Massage」最大特色係在於大眾化，無論價錢定按摩療程都係一樣，連門口都有多種語言可以選擇，顯然除咗當地人，都係做遊客生意，連日韓文都有。多數按摩療程都係由30分鐘、1小時至1.5小時及2小時不等，有泰式按摩、足部按摩、精油按摩、椰子油按摩、香薰按摩等，以最貴嘅2小時香薰按摩計算，都只係1300泰銖，的確係比坊間平價。

該按摩店最大優點係營業至凌晨12點，所以可以逛到攰再做按摩，最後直接返回酒店休息。今次編輯都係只做足部按摩，由30分鐘起跳，最平係200泰銖，其後1小時及2小時亦只係300泰銖及600泰銖，相當親民。

其他按摩會去樓上房間，而足部按摩就只係於樓下大房做，旁邊有其他客人，而即使兩個認識嘅人，亦未必會被按排坐埋一齊，因為座位有限。「Smile Massage」雖然價格相宜，但技師手勢當然無其他按摩店嘅技師咁專業，如果純粹有啲攰，想鬆一鬆就可以嘅。

Siladon Spa

當日於「Sala Daeng 站」徒步有一段距離嘅「Siladon Spa」，原來現時位置距離「Phrom Phong 站」只有約11分鐘步程，比先前更為便利。當日分店樓高2至3層，位置雖然偏僻，但環境清幽寧靜。

由於當日事前預訂有「Buy 1 Get 1 Free」Promotion，自然會前來一試。兩個人做2小時Siladon Harmony Package，價錢只係2300泰銖，人均1150泰銖，折合港幣僅約287元！雖然事前預訂，但就係到場先付款，若以信用卡付款，會多收3%手續費。Siladon Harmony Package包含有足部按摩及香薰精油按摩，全程做足2小時，兩人會於同一間房內做按摩療程。

進入大廳接待處報到後，店員會遞上兩杯冰水，同時亦會遞上一盤香薰。整盤香薰包括有6款口味，讓客人自由選擇喜愛嘅香薰味道，當中有Lavender、Rosemary、Lemongrass、Wrightia、Mandarin、Himalayan Mango，即薰衣草、迷迭香、檸檬香茅、茉莉花、柑橘花、喜碼拉雅芒果。然後，技師亦會詢問有無邊個部位需要加強按摩。

樓上房間設備齊全，有小梳化同按摩床，亦有衛浴，方便客人使用。按摩前，技師會請我哋換鞋及換衫，然後先坐梳化，再清洗雙腳，之後就可以上按摩床。

按摩療程同時包含雙腳按摩，以及草藥球、香薰按摩，大部份時間都係平躺按摩床上。技師手勢不俗，但時間分配唔太好，由腳按到身，再由身按到頭，足部按摩時間充足，夠晒放鬆。但上身至肩膊位似乎未夠舒緩，如果足部時間可以褪上上半身，多按穴位，可能會較好，不過整個按摩療程亦屬舒服，最後亦可以歎返份芒果糯米飯及熱茶。

Baan rim naam

至於「Baan rim naam」，其實係一間鄰近曼谷唐人街嘅咖啡店，而且係一間編輯好喜愛嘅半露天cafe。店內不僅售賣咖啡，亦有按摩服務，可以於湄南河畔同時享受咖啡與按摩！

餐廳客人能自由選擇3種按摩服務，包括Tapping Line Therapy、Neck & Shouder Aroma Massage、Thai Foot Treatment，每項療程為30分鐘，價錢只係200至300泰銖。

延伸閱讀﹕【曼谷美食】近唐人街／古老大宅恆泰號！神秘民族風露天按摩咖啡店湄南河畔躺平賞日落！｜Baan rim naam

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 每間按摩店收費不一，每個項目亦各有不同，謹記睇清楚收費先好預訂。

❷ 多數按摩店都要事前預約，否則要睇吓該店到時有無位，如果齋做腳底按摩就基本上唔使預約。

❸ 留意有部份店舖要一再confirm先叫confirmed，如果從第三方預訂，最好事前再同官方confirm﹐以免白行一趟。

❹ 大家可以隨心意俾小費，一般20至50泰銖就可以。