油麻地半世紀懷舊冰室活化重現電影主題茶記好立克x咖啡／招牌蛋撻餡料獨特秒變fusion菜

油麻地一帶有好多舊式餐廳，單單茶餐廳都有幾間，其中「大安茶冰廳」由1969年開業起，有超過50年歷史。直到前年﹐原先老闆因移民而結業；翌年，則有有心人以同名重開餐廳，既保留裝潢風格，並將舊式菜式重新設計，變成fusion菜，打造全新現代化精品茶餐廳，拍拖兩個人打卡之選！

除咗門口招牌，店內亦保留木製卡座、舊式餐牌等，亦曾與藝術團體聯乘，整間茶餐廳更貼滿電影海報。有部份電影於該店取景，有部份電影則於其他店取景，其中有最近期上映過嘅多套本土電影，包含有Error主演嘅《陰目偵信》、Mirror成員卞主演嘅《阿媽有咗第二個》，另外亦有舊時鄭伊健主演嘅《差少少》、張國榮主演嘅《阿飛正傳》、周星馳主演嘅《行運一條龍》、張曼玉主演嘅《花樣年華》等等。

由早餐到常餐，飲品到甜品，選擇都係來自舊式茶記，但就配搭新式設計，有如fusion菜。例如招牌之一嘅檸茶曲奇，又比如係將梅菜肉餅同薯條crossover，港式雞尾包混合bagel，或者將中式腐竹雞蛋糖水同西式慕絲蛋糕二合為一，甚至係台式奶蓋同港式法蘭西多士混合，更有楊枝甘露格仔餅，菜式經過設計，望落又似乎無乜違和感。

常餐選擇有5款，包括西檸雞牛油檸檬汁意粉$98、腐乳卡邦尼煙鴨胸意粉$98，雖然份量唔算多，亦係正常現代cafe價，但菜式設計上就比較有心思，將原材料中西合璧。比如中菜配料腐乳當意粉醬，中餐菜式西檸雞配搭牛油檸檬汁意粉，前者為意粉帶上微辣味，而後者就為意粉帶上酸甜味，連西檸雞本身都有水準，表皮炸得香脆，內裏雞肉亦保持軟嫩。

必試嘅小店招牌作係啡立刻$46至50，英文叫coffee now (holicks coffee)，簡單啲講就係以經典懷舊飲品好立克同latte咖啡crossover，咖啡中滲出好立克香味，但就無平時嘅奶香味，似乎係採用燕麥奶，以好立克溝燕麥奶嚟取代傳統奶為原材料，同時以此作拉花，令咖啡味道獨特。而mocha即朱啡$42至46，有濃郁朱古力味，同樣有好獨特嘅拉花設計，編輯眼見拉花與兩隻嘢形相相似，一度有窩心感覺，皆因誤以為咖啡師照住兩隻嘢外貌畫於咖啡拉花畫上面。

套餐配$38以下飲品，加$20配出爐蛋撻。其中有經典焦糖流心蛋撻$28、椰汁芋頭西米露蛋撻$28，該店蛋撻與傳統酥皮蛋撻或曲奇皮蛋撻有別，將西式焗撻同港式蛋撻融合，酥皮鬆脆可口，而內裏既有滑溜雞蛋，滲出蛋香之餘，亦有流心狀餡料。招牌作為焦糖口味，焦糖餡僅放置底層，雖然比較少，但唔會太甜膩；而椰汁芋頭西米露本身為糖水舖必備甜品，現時就放置於蛋撻餡料內，的確係入口香甜，甚有創意，只係唔講唔知係椰汁芋頭西米露。