油麻地2層高日式木系咖啡店似co working space！Yama Cafe常見合作小市集／精品售賣

香港與台灣並唔一樣，寸金尺土，地方有限，一間樓面稍為大少少嘅咖啡店，每月租金隨時動輒5至6位數字。油麻地有一間咖啡店隱身於大街小巷中，樓高2層，雖以日式為主題，但有如台式咖啡店模樣，樓上更有如一個Co Working Space，值得拍拖兩個人探索吓！

一般人開舖，大多數都難以忍受鬧市嘅高昂租金，故此距離鬧市有一段距離嘅地方，自然變成小確幸。以位於油麻地嘅「Yama Cafe」為例，雖然門面稍細，設計成日式小木屋。但實際上，原來樓高2層，格局有如台灣上居下舖模式。

油麻地英文為「Yaumati」或「Yaumatei」，該店名就有如「油麻」諧音；而日文嘅「山」﹐讀音亦等同「Yama」，但亦可能係同一個女性英文名「Yama」有關，感覺似歧義。小店由2021年底起，只係靜悄悄屹立油麻地碧街轉角處，木系裝修給予人平靜悠閒感覺，而室內及樓上則以日式裝修為主題。

室內一端設有偌大窗戶，外望街景，另一端就有富士山壁畫作裝飾。值得一提，樓上一層並非設有多個座位，只有兩張大型木檯，有如給予客人一個co working space，方便喜愛到咖啡店工作嘅朋友。而店內不時有小型市集，亦一直有少量精品售賣，包含有多款陶器擺設，以及溫室盆栽、日式精品、手工藝品等。

小店以咖啡為主，只有少量輕食可以選擇，例如係4款toast，每份$4o。當中有肥仔之選，多士內會夾上漢堡扒、薯餅、芝士，麵包經過烘烤，視覺上呈金黃色，觸覺上暖笠笠，口感上帶有微脆，微溶芝士、香脆薯餅、香口漢堡扒，雖然係一個比較飽肚嘅選擇，但始終帶有肥膩感，難怪叫肥仔之選。

咖啡一般$30至$45，其中不時有限定選擇，例如係黑芝麻忌廉鮮奶咖啡$55，另有花生version；以及橙啡$45，另有蜂蜜泡沬version。據悉，店內咖啡豆特別來自日本北海道，而牛奶亦來自北海道3.7牛乳嚟炮製咖啡，所以奶味係特別濃郁，大多食材都係採用日本原材料，尤其係咖啡及茶方面。

前者係以黑芝麻配上忌廉嘅鮮奶咖啡，即黑芝麻版本嘅latte，若選冷飲，忌廉會同時混合其中。咖啡帶有黑芝麻味，比一般latte香口，黑色嘅latte甚有創意。而後者顧名思議係鮮橙汁溝咖啡，即係橙汁加上espresso，係一杯無鮮奶嘅americano。香橙味甚濃，令濃郁咖啡添上天然甜味，味帶酸甜，蓋上一點咖啡苦澀味，味道能取得平衡。