台北首個夜市！華西街精選9間小吃店炒牛肉／清湯瓜子肉／魯肉飯／平價佛跳牆

台北最出名嘅係夜市，而夜市更加係台灣嘅標誌，整個台北夜市眾多，最受遊客歡迎嘅係士林夜市、饒河夜市，基本上聽到廣東話重多過台灣中文。而台北第一個規劃嘅夜市係邊個呢？事實上，全台北首個規劃嘅夜市係華西街觀光夜市，想去感受第一個夜市不妨拍拖兩個人去逛一逛啦！

華西街觀光夜市鄰近香火鼎盛嘅龍山寺，包含整條華西街，夜市中間被桂林路分成兩段。成為規劃好過夜市前，其實只係一個紅燈區，後來就有唔少特色小吃進駐。而夜市入口可見牌樓建築，多間小吃店均為老字號，大多有近50年歷史，連台灣電影《艋舺》亦曾取景華西街夜市。除咗台南擔仔麵、蛇肉製品、大鼎肉羹等，亦有更多小吃可以選擇，當中有多間都獲得《米芝蓮指南》必比登推薦，馬上睇睇重有咩小吃可擇。

華西街夜市美食（1）﹕郭家炒牛肉

呢個夜市好多小吃店皆歷史悠久，其中「郭家炒牛肉」就係超過80年嘅老字號，由1939年起開業，被在地人號稱台北最強炒牛肉，現場都可以見到門口有唔少人排隊。炒牛肉基本分成3份，有大中小可以選擇，最小嘅份量賣TWD130，其餘中份及大份為TWD240及TWD300，而牛雜湯都係唔少人點選嘅菜式。

華西街夜市美食（2）﹕阿義魯肉飯

另一家甚受歡迎嘅華西街夜市小吃係「阿義魯肉飯」，由1967年開業至今，一直主打蚵仔魯肉飯，將醬香魯肉飯與鮮蚵合體，食法新鮮，一碗大概TWD140。

華西街夜市美食（3）﹕小王煮瓜

華西街夜市內有多間小吃店曾獲得台灣《米芝蓮指南》必比登推薦，「小王煮瓜」就係其中之一。該店由1975年起開業，從小攤到店面，已連續4年獲得《米芝蓮》星級推介，連CNN都曾推薦。店內TWD70就有一碗清湯瓜仔肉，相當清甜；而魯肉飯則賣TWD35至65，兩者都係店內人氣之選。

華西街夜市美食（4）﹕清泉號香菇粥蚵仔煎

而「清泉號香菇粥蚵仔煎」由1970年起開業，屹今已有超過50年歷史，甚受在地人歡迎。不過當日就未有營業，只見到門外餐牌，香菇粥、蚵仔煎都係招牌作，前者只係賣TWD20，而後者則賣TWD80，另外重有紅燒肉、蝦仁煎、蚵仔湯等。

華西街夜市美食（5）﹕昶鴻麵點

至於「昶鴻麵點」，不單係台灣《米芝蓮指南》必比登推薦嘅華西街夜市小吃，連台灣知名歌手蕭敬騰都喜愛吃其菊花麵。該店從1954年起營業，至今有約70年歷史，一份菊花肉麵賣TWD90，即係豬臉頰，肉質較鬆軟而有膠質，紋理似小菊花。另外，重有乾麵、扁食麵、下水麵、雞肉麵、豬尾麵、招牌湯麵等。

華西街夜市美食（6）﹕源芳刈包

另一間獲得台灣《米芝蓮指南》必比登推薦嘅華西街夜市小吃，係「源芳刈包」，與人氣店「小王煮瓜」、「昶鴻麵點」齊名。該店有約65年歷史，不時會大排長龍，最特別之處係刈包內有大大塊五花肉，惹人垂涎。

華西街夜市美食（7）﹕蒸好吃佛跳牆

而「蒸好吃佛跳牆」可能係遊客比較少去嘅華西街夜市小吃，雖然當日未有開門營業，但見到餐牌菜式受價格甚吸引，竟然TWD85就可以食到一份佛跳牆！其他菜式重有滷肉飯、雞肉飯、雞滷飯、排骨酥湯、筒仔米糕。

華西街夜市美食（8）﹕阿猜嬤甜湯

行畢一個夜市，最後當然要搵間甜湯當作飯後甜品，華西街夜市內就有間「阿猜嬤甜湯」，由1965年、即民國54年起營業，至今已傳到第3代，歷史悠久之餘，亦受在地人歡迎。店內有米糕桂圓粥、紅豆米糕粥、紅豆湯、冰糖白木耳蓮子湯等。不過，該店賣完就係收舖，當日夜晚7點幾去到，已經見到「完售」，所以要食真係要盡早。