新北板橋區逾30年歷史湳雅夜市豬血湯／麻油雞／排骨酥湯／小籠包 7家重點小吃

平常去台北旅遊，大家會拍拖兩個人去邊個夜市呢？台北捷運連接好多個知名夜市，好多都吸引觀光客前往，有啲遊客重多過在地人，去都去到厭。今次E.A.Two編輯就去另一個台北捷運可達嘅新北板橋夜市，有超過30年歷史，有豬血湯、排骨酥湯、藥燉排骨、小籠包、臭豆腐、麻油雞、起士捲等小吃，即刻睇睇邊7款板橋湳雅夜市重點小食啦！

湳雅夜市又叫板橋夜市，可以從南雅南路或館前西路進入，同一般夜市一樣，既有夜市美食、雜貨，亦有攤位遊戲等。夜市入口牌樓已有逾30年歷史，整個夜市排列整齊，亦係唔少在地人喜愛到嘅宵夜好去處！

板橋湳雅夜市美食（1）﹕眼鏡仔豬血湯

湳雅夜市有唔少必食嘅小吃，有超過50年歷史嘅「眼鏡仔豬血湯」就係人氣之選。喺同一個夜市內，有2間「眼鏡仔豬血湯」，一間係創始店，另一間係旗艦店。該店主打都係招牌豬血湯，一碗招牌豬血腸湯賣TWD60。所謂豬血湯，其實即係好似港人食嘅潮州小吃韭菜豬紅，同樣有韭菜，只不過變成鴨血加豬腸。除咗豬血湯，重有麵線、炒麵等可以選擇。

板橋湳雅夜市美食（2）﹕王記好吃麻油雞

呢個夜市有唔少不得不吃嘅小吃，「王記好吃麻油雞」就係其中之一，店內主打固然係麻油雞湯，你可以挑選雞腿、雞塊，雞腿都只係TWD170，有麻油雞腿之餘，亦有麵線可擇。最特別之處，係可以免費加湯，只要講句「續湯」就得，鍾意飲湯嘅朋友絕不能錯過！

板橋湳雅夜市美食（3）﹕懷念排骨酥湯

板橋湳雅夜市有唔少隱藏美食，其中有「懷念排骨酥湯」，位置雖然係夜市中段，但就稍為隱蔽，座落中間主要通道嘅一角。該店早於1974年開業，原來至今已經有50年歷史，店內只係賣2款菜式，餐牌一目了然，只有排骨酥湯、油飯可以選擇，但依然有唔少在地人坐低用餐。

油飯及排骨酥湯分別賣TWD40及70﹐油飯粒粒分別，黏滿醬油，有啲似港人食嘅糯米飯。而排骨酥湯內有冬瓜、排骨，湯頭香濃，而且唔油膩，重帶有陣陣胡椒香氣。冬瓜與排骨都燉得軟腍，非常入味，連排骨都能夠入口即融。不過，將排骨放入湯頭內，酥炸排骨表皮就變得軟腍，反而無咗酥香脆感，港台飲食文化始終係有所不同。

板橋湳雅夜市美食（4）﹕板橋小籠包

而「板橋小籠包」則為其中一款湳雅夜市不可或缺嘅美食之一，皆因係在地人嘅地標美食，該店更營業至凌晨，所以都係一個宵夜好去處。除咗爆漿小籠包，該店嘅黃金臭豆腐、招牌蒜餃，都係受歡迎嘅小吃。

板橋湳雅夜市美食（5）﹕騎士捲

至於「騎士捲」，諧音其實係台灣讀嘅「起司捲」，顧名思議係一款以芝士為主要材料嘅捲物，「騎士捲」同時係呢個夜市嘅人氣小吃！「騎士捲」現點現炸，內含大量芝士，咬入口更可以拉出芝士拉絲，非常邪惡！呢款充滿鹹香味嘅芝士捲，口味不少，除咗原味，重有煙肉、醬爆牛肉、雞肉、吞拿魚、忌廉粟米，一捲騎士捲賣TWD35，兩捲則賣TWD60。