西門町6個夜貓景點！點只獅子林／萬年大樓／國賓大戲院？必去紋身街／美國街／電影街！

台北西門町係自由行熱門旅遊勝地，無論日光定夜晚時份，熱鬧非常，日夜皆宜，拍拖兩個人去逛街都好適合。西門町入夜之後，有無咩適合夜貓嘅好地方呢？今次就特別於夜晚遊走西門町徒步區，睇吓有咩好睇！

西門町景點（1）﹕紋身街

西門町最熱鬧嘅係西門町夜市，主要通道內人聲鼎沸，遍佈擺攤小販及掃街嘅人。而夜市附近、從uniqlo轉入，可以去到西門町知名嘅「紋身街」，又名「刺青街」。大概只有百零米嘅小街道，聚集眾多紋身店，而當夜晚鐵閘落下時，又會見到大量搶眼塗鴉作品。

紋身對於部份香港人嚟講，依然走唔甩古惑仔形象，或者係黑社會印象，以負面評價為主。而其實對台灣原住民嚟講，紋身其實係一種藝術，甚至有祟高形象，甚至係文化。

西門町景點（2）﹕電影街

「西門町徒步區」內，不單止有多國餐廳及夜市攤販，亦有流行服飾店及精品店等，除咗外地遊客，其實連當地人都鍾意行逛。徒步區內有一道「電影街」，聚集各大戲院，從中可見各大型海報，原來西門町戲院嘅票價比市中心更平，難怪尤其吸引學生客﹐有時間可以去睇夜場呢。

走到電影街盡頭方向，你馬上會到達一個電影主題公園，名為「台北市電影主題公園」。呢個公園內有多幅巨型塗鴉作品，其實由多位街頭藝術家共同合力繪製，用色搶眼，繽紛畫作中可見獨特畫功，趣味十足。原來本身呢個公園綠地只係一個從日治時期閒置嘅地方，但現時可見舊建築依然保留，只係變成一個電影有關嘅藝術文化休憩空間，日頭不時會有大型活動或創意市集舉行。

西門町景點（3）﹕美國街

西門町重有一道「美國街」，只要從電影公園折返「西門町徒步區」方向，中途就會到達。「美國街」係一道滿佈青少年潮流服飾店嘅小巷，有人會稱為二手街，因為當中有大量美國二手服飾，吸引唔少年輕人專程朝聖。

而「美國街」內除咗有大量美式服飾，連街道都充滿美式風格，無論係牆身，抑或係小電箱，甚至係各家店舖嘅鐵閘，都添上美國街頭創意塗鴉。街頭隨處都係彩繪滿佈90年代Hip Hop元素，有人更稱之為台灣布魯克林區，打卡必到！

西門町景點（4）﹕獅子林商業大樓

而「獅子林商業大樓」同樣位於西門町範圍內，該幢大廈其實係商業大廈，已經有超過40年歷史！不過，上層由6至9樓被公寓、套房、辦公室進佔，10樓則為「金獅大酒樓」，而5樓以下則為「新光影城」、電動遊樂場、婚紗禮服店、手機維修店等。

西門町景點（5）﹕萬年商業大樓

至於「萬年商業大樓」，亦係一幢歷史悠久嘅商廈，距離獅子林商業大廈不遠。「萬年」前身其實係「國際館」，源自於日治時期嘅豪華戲院，現已拆除。大樓於1973年啟用，有200幾間店舖，當中有唔少流行服飾店、模型店、動漫店、雜誌店、美食街等，現時地下更有間Vacanza嘅飾品店座落大馬路旁。基本上，「萬年」係一個娛樂場所，依然吸引唔少年輕人朝聖。

「萬年」嘅1至4樓都係以服飾店及玩具店為主，地下一層就係美食街，面5樓起就有間湯姆熊歡樂世界，有如遊樂場。樓上就被旅店進駐，頂層則有U2電影館及沐茶閱讀咖啡館，夜晚有時間可以去坐吓。