實試北投瀧乃湯浴室最古老溫泉浴場！附近溫泉會館自己煮溫泉蛋只需50台幣！

台北旅遊景點不少，北投區以溫泉聞名，唔少人都會拍拖兩個人去遊覽週邊溫泉景點。北投溫泉飯店多多，重有一個又一個湯屋浴室，連北投公園都有露天溫泉，但E.A.Two編輯覺得最特別嘅係當中一個歷史悠久嘅湯屋，更加係北投最古老嘅溫泉浴場，附近溫泉飯店更加可以自己煮溫泉蛋，自由行必玩！

從捷運北投站走出，向北投公園方向走，會發現距離公園不遠處，有一間復古味極濃厚嘅溫泉浴場。大門口有一支純白色柱樑，上面有5個紅色撩草大字豎起，寫有「瀧乃湯浴室」，「瀧」字就係瀑布嘅意思，即係溫泉瀑布，庭園內更有1923年建立嘅「皇太子殿下御渡涉紀念碑」。據悉，呢間古色古香嘅溫泉浴場曾經獲得台北市「老屋新生大獎2007」銀獎，由林志崧建築師事務所做規劃設計。

從「瀧乃湯浴室」建築已透視其「年齡」，充滿歲月痕跡。事實上，呢間以日式泡湯為主嘅湯屋浴場，主打庶民風格，亦係北投最古老嘅一間溫泉浴場。溫泉浴場於1896年建成，來先日本人筆下建造，於1907年正式開始營業，曾經歷日治時期，為日本傷兵療養所。目前浴場已傳承至第三代，而且由陽明山管理局買下﹐但依然保留古舊風格。浴室最特別之處係一直堅持採用最天然又最原始嘅優質青磺泉質，同日本玉川一樣都係咁罕見，值得一去。

甫踏入浴場，大門口就係櫃檯，付款後就可以取儲物櫃鑰匙，可以選擇男女分開嘅大眾湯，或者雙人湯屋，甚至家庭湯屋。如果兩個人前往，可以一齊入雙人湯屋，但如果一個人去﹐溫泉浴場方面要顧及安全問題，所以就只可以去大眾湯。不過，大眾湯始終係最平，每人只需TWD150，折合港幣HKD40有找，可能係北投最廉價嘅溫泉浴場，只係雙人湯屋嘅私隱度會較高。

走入大眾湯，需要留意呢間舊式溫泉浴場同其他台式北投溫泉唔同，只接受裸湯，同日本溫泉無異。如果介意裸湯就唔好去，或者搵相熟朋友陪同，直接租借雙人或家庭湯屋。呢個古舊嘅日式溫泉大眾浴場﹐浴池以唭哩岸石砌成，實而不華，非常古樸。而浴池內大部份都係在地人，年紀上大多都係公公婆婆，比較少年輕人。以女湯為例，幾位婆婆再三叮囑除咗要沖身，更加再先喺池外沖洗雙腳，將所有頭髮紮起，然後先可以走入浴池內。

池中滿滿透明帶綠色嘅青磺泉水，水質有啖啖硫磺味，水溫維持於42至46度，分2個溫度嘅浴池。左邊有45至46度，右邊都有42至43度，所以左邊浴池溫度較高，而右邊浴池溫度較低，如果初初體驗，最好先走入右邊浴池。浸入浴池中期間，婆婆們會互相提醒同指指點點，坐低唔好亂郁，因為一旦有水波，會影響到其他人，水波甚至會令其他人有唔舒服感覺，所以最好平靜坐低唔好郁。基本上，好多人於浸泡5分鐘左右就會上返水，因為要休息一下，然後再繼續浸泡。雖然溫泉水溫度較高，浸泡後一直冒汗，但泉水令人放鬆，減少筋骨痠痛，身心溫暖，血液循環得更好，含氧量及免疫力都會增加。如果於北投一帶走得太耐，不妨入溫泉浴場休息一下啦！

浸完浴，繼續前行可以去到一間毗鄰知名景點地熱谷嘅北投飯店「水都溫泉會館」，E.A.Two編輯今次唔係帶大家入住飯店，只係想帶大家去自己煮溫泉蛋，估唔到一間飯店竟然隱藏一個角落，可以自製溫泉蛋！「水都溫泉會館」入口旁邊有一個小角落，有古樸味濃嘅設施，寫明可以「煮溫泉蛋」。如果唔知煮溫泉蛋步驟，可以參照上方嘅煮溫泉蛋須知嘅指示，絕對新手都一定做到！

雞蛋喺邊度買？記得唔可以自攜雞蛋喔！只需要走入飯店內，向櫃檯表示想購買兩隻溫泉蛋，職員就會用兩隻杯裝住兩隻雞蛋，方便你整完溫泉蛋可以擺放入紙杯內。TWD50兩隻雞蛋算平定貴？折合港幣大概HKD10至20，係一個傳統方法DIY溫泉蛋體驗，對香港人嚟講其實唔貴。不過，編輯一邊自煮溫泉蛋，背後就有一堆香港人指指點點，一個借嚟影張相，幾個食花生，幾個驚奇原來可以自己煮，就係無一個會自己俾TWD50出嚟自己試。貫徹香港人性格，唔做第一個試，亦唔會做最後一個。

簡單嚟講，先將雞蛋擺入小竹籃內，將蛋放入溫泉水，輕輕搖晃，最好蓋上木蓋，等待雞蛋煮熟。溫泉水溫頗高，水蒸氣不斷上升，要小心唔好燙倒喔！自煮溫泉蛋可以選擇煮5分鐘、6分鐘，或者8分鐘，在乎於你想食幾熟嘅溫泉蛋。E.A.Two編輯實試後，發覺5分鐘嘅蛋黃太液體狀，蛋汁流到成手都係，反而6分鐘就剛剛好。取出之後，記得要將雞蛋放入旁邊冷水，大概再浸泡1分鐘，就可以品嚐光滑溫泉蛋啦！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運至「新北投站」，食光明路行，徒步約5分鐘即達「瀧乃湯浴室」。再向前走約2分鐘，即達「水都溫泉會館」。

❷ 注意開放時間分3個場次，首段時間06:30－11:00、中段時間12:00－17:00、後段時間18:00－21:00，每場次結束前1小時都不收客，而且人數上有限制，男湯屋限40人，女湯屋就限30人，基本上係一進一出。

❸ 價格上人均TWD150，可以選擇男女大眾湯，亦有雙人湯屋或家庭湯屋，雙人湯屋每1小時TWD400，限2人；家庭湯屋每小時TWD600，限5人。

❹ 溫泉水大概係40-42.5度左右。

❶ 「水都溫泉會館」1F入口處就係自己煮溫泉蛋嘅地方，每兩隻雞蛋體驗價為TWD50。

❷ 進入湯屋時，謹記女仔要紮起頭髮，唔好過膊頭，有需要可以借浴帽，每個TWD15。毛巾都可以租借，每條TWD50。