淡水老街賞河岸美景！台版戀愛巷／海關碼頭倉庫／海邊咖啡廳打卡

淡水區係台北自由行熱門旅遊景點，其中淡水老街鄰近捷運站，今次就依海邊路線，走過淡水多個景點，黃昏重可以於淡水河岸海邊賞日落，景色不輸最西面嘅淡水漁人碼頭，不妨拍拖兩個人去散吓步啦！

淡水海邊景點（1）﹕淡水老街

去「淡水漁人碼頭」需要轉公車，但「淡水老街」毗連捷運淡水站，無需要再轉公車。老街一帶係淡水區最熱鬧嘅地方，由最主要嘅中正路到公明街，以至重建街、馬偕街，既有古蹟建築，亦有在地美食，更有夕陽靚景，打卡必到！

「淡水老街」係一道懷舊老街，週邊商店林立，更有唔少舊式雜貨店及古早味餅店，更有潮流服飾及玩具。老街週邊重有「清水祖師廟」、「福佑宮」、「淡水禮拜堂」等古蹟，適合尋幽探勝。另外，老街唔單止有知名老店，更多咗文創商店。

淡水海邊景點（2）﹕淡水金色水岸

而老街旁邊就係「淡水金色水岸」，正對小漁港，有海邊商店、水上舞台、漁作空間、咖啡座椅等，沿岸邊散步，可以於河畔歎咖啡。短短幾米路程，水岸一方面有淡水古蹟群，另一方面亦有多間歐式咖啡店，岸邊街道中西合璧。

黃昏時，重可以觀賞淡水夕陽美景，金色柔光反射於海岸上，令老街及水岸一帶都被染成淡金色調，故被稱為金色水岸，而日落西山時河岸暮色更美，浪漫非常。

淡水海邊景點（3）﹕重建街戀愛巷

澳門戀愛巷為人熟悉，其實台北淡水都有一道「戀愛巷」，隱藏於淡水老街背後，拍拖兩個人一於去逛一逛。只要從「福佑宮」旁樓梯上行巷弄，沿途可穿梭一道3D彩繪樓梯，週邊古色古香，之後就可以前往淡水呢個遊客唔知嘅隱密小景點。

台北「戀愛巷」位於重建街一隅，毗連淡水日本警官宿舍，地方唔大，只係重建街轉角位，所以好容易就會錯過。據稱係來自於一對情侶，男方送女方返屋企，一定會經過呢個位置，故此就係佢哋嘅「戀愛巷」。近年，新北市政府就以呢個故事作塗鴉，當中有唔少木板牆裝飾，不過好多被藤蔓遮蔽，淨返好細個嘅打卡位，目前基本上只係有「戀愛巷」三個字。

雖然而家叫做「戀愛巷」，但其實原先只係一道無名巷弄，更因為有野狗隨處便溺，髒臭無比，所以附近居民稱為「狗屎巷」，途人紛紛走避不及。藝術家將負面情況變成正面，將人人逃離嘅地方變成可以打卡嘅地方，而非將受歡迎嘅地方變成消除歷史文化嘅地方。

淡水海邊景點（4）﹕滬尾偕醫館

走到淡水老街近街尾位置，可以去到毗連「淡水禮拜堂」嘅「滬尾偕醫館」。淡水舊名其實就係叫滬尾，不過點解就有唔同講法，一係同當地原居民凱達格蘭族口音有關，另一個講法就係同專業捕魚嘅石滬尾端村莊有關。其中，中正路以前就叫滬尾街，長約1公里。

而「滬尾偕醫館」就係滬尾區嘅偕醫館，以前係淡水區一帶嘅醫院，為居民服務，亦係台北首家西式醫院；現時則為市定古蹟。據稱，該醫院係來自於馬偕博士，因為佢曾經喺度傳教，更特別邀請外籍醫師為居民提供醫療服務。入面既似博物館，活化後更加入馬偕咖啡館。而醫院週邊似足閩南式住宅，由馬偕博士親自設計，並加入西洋式圓拱形門窗，實而不華，感覺中西合璧。

淡水海邊景點（5）﹕多田榮吉故居

另一個位於「淡水老街」及「金色水岸」以上嘅市定古蹟，就係同樣免費入場嘅「多田榮吉故居」。多田榮吉其實係日治時期嘅淡水街長，為淡水區居民貢獻頗多，唔單止推動道路建設，而且開設學校、改建圖書館等。該居室係一座和式風格嘅建築物，建於1937年，座北向南，背山面海。室內外以傳統木造屋架設計，甚至日式庭園，遊人可以參觀整體空間佈局。值得一提，呢個舊居所可以俯視淡水河岸風景，甚至可以遠眺觀音山。

淡水海邊景點（6）﹕淡水咖啡廳

折返「淡水金色水岸」，河岸一帶有多間海邊咖啡店可以選擇，比如係「時光樹影-Memory 河岸景觀餐廳」、「淡水長堤咖啡餐館LB Cafe」，都係前排觀賞夕陽嘅好地方，係最佳景觀視野點，歎個下午茶又好，打卡又好，兩個人拍拖都夠浪漫！

淡水海邊景點（7）﹕淡水海關碼頭倉庫

走出咖啡廳，繼續前行可以去到「海關碼頭倉庫」，企喺末端位置，除咗可以環瞰淡水河一帶，重可以眺視關渡大橋。該位置既係落日餘暉最佳觀賞點，而且係淡水河岸近盡頭位置，可以細心欣賞海面上波光粼粼嘅畫面。河岸步道全長有約150米，前往碼頭期間，沿途更有LED燈飾及草地音階互動燈裝置。

「淡水海關碼頭」以前叫「淡水港」，曾被列為三級古蹟。碼頭位於淡水紅毛城以下，由清代至日治時期，一直係一個重要港口，目前台灣既保留碼頭，亦將洋樓及兩棟倉庫，以至相關建築都完整保留。當中，有一個清水紅磚倉庫座落淡水海關碼頭園區，係來自於日治時代嘅「港務倉庫」，目前係市定古蹟之一。園區內唔單止有「鐵馬元氣驛站」、「淡水漁業生活文化影像館」，更不時有唔同主題展覽活動。