【淡水隱藏景點】一票通行市定古蹟小白宮＋紅毛城！純白迴廊／紅磚建築打卡必到！真理街歎淡水文化阿給小吃

去台北自由行，前往淡水區時，你會拍拖兩個人去邊度玩？好多人第一時間諗到「淡水漁人碼頭」，或者毗連捷運站嘅「淡水老街」，E.A.Two今次為大家推介兩個更值得深度遊嘅市定古蹟，由歷史文化到單純打卡，以至觀賞淡水風景，全部一覽無遺。重點係，一個價錢、一張票就可以遊走於3個地方，折合港幣只需約$20，CP值極高！

小白宮

淡水「小白宮」又叫前清淡水關稅務司官邸或「埔頂洋樓」，曾經係淡水區埔頂清朝淡水關稅務司的官邸，現時已被列為市定古蹟。除咗西方海關人員住過，連日治時期嘅日本首相伊藤博文都住過呢！建築物以純白色外牆吸引遊人，其中歐洲式迴廊建築更有如歐洲莊園，值得打卡朝聖！

擁有簡潔亮麗外觀嘅「小白宮」，建於1862年，歷史可追塑至清朝同治年間，有超過百年歷史。「小白宮」至今依然保留住英國維多利亞時代殖民地風格，並將英式建築風格與印度熱帶建築互相結合，帶出新建築風格。室內有迴廊及落地門窗，空間佈局有陽台、臥室、書房、辦公室，以及宴會廳、煙囪等，採光度及通風度良好，據悉園內重有3座官邸界石。

潔白外牆內有庭園造景，對出亦有一個小平台，環境優雅，樓下就係停車場，可以回望淡水河風景，甚至眺望觀音山。雖然位置比「紅毛城」低，但比較接近淡水河，而且係第二個淡水山崗高點。值得一提，「小白宮」同時係隱藏淡水夕陽靚景地！

紅毛城

淡水「紅毛城」距離「小白宮」只有約5分鐘步程，前身係英國駐台北領事館及官邸，又叫聖多明各城、安東尼堡，一早獲評定為國定古蹟，現時依舊似足一座淡水城堡。最特別之處，係「紅毛城」既係台灣現存古老建築物之一，其朱紅色外牆亦非常吸睛，紅磚牆身富有特色，而且可以從高點觀賞夕陽靚景，比「小白宮」位置更高！

「紅毛城」建於1646年，一直於淡水區屹立有超過300年，歷史悠久，曾經歷多國管轄，包括西班牙、荷蘭、明鄭、清朝、英國、美國、澳洲，所以「紅毛城」內都有多國旗幟隨風飄揚！本身外牆為灰白色，直到英國人管轄，先變成磚紅色﹐令外觀變得更為獨特。

目前「紅毛城」已變成古蹟博物館，古蹟區內包括有紅毛城主堡、前英國領事官邸，同埋清代同治時期建造嘅南門。至於「紅毛城」說法，則由於早期由西班牙建成嘅「聖多明哥城」被摧毀，再由荷蘭人於原址建立「安東尼堡」，而當時嘅漢人會叫荷蘭人做「紅毛」，所以就直呼呢座荷蘭人建立嘅城堡做「紅毛城」。

「紅毛城」建築可以任遊人參觀，包括其洋樓式領事官邸、地牢等，由外到內深入探索。「紅毛城」同「小白宮」一樣都有拱圈迴廊，亦有磚雕樑柱及土鑿牆，另外重有個封閉水井。「紅毛城」同樣可以眺望淡水河及觀音山，更可以觀賞落夕陽西下景色，其「戍台夕照」一度被列為淡水八景之一！

淡水文化阿給

由於參觀當日未知道重可以去埋「滬尾礮臺」，而且時間不足，所以E.A.Two未有前往第三個景點。反而中途見到有間真理街嘅淡水美食點「淡水文化阿給」﹐開業已超過50年，老店連台北媒體及明星都曾到訪。餐牌中菜式簡單，大概就係招牌阿給、魚丸湯同包子，一份夠給賣TWD45，重有一份周杰倫套餐賣TWD90，即係3款都有，而阿給大概即係日本所講嘅油炸豆腐皮，只係喺油豆腐中間放滿冬粉，浸泡醬汁，再以魚漿封實，然後蒸熟，最後淋上醬汁即可食用。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 門票人均只需TWD80，已經包含紅毛城、小白宮入場費，後來再睇清楚票尾先知，原來同時包含滬尾礮臺入場費，同一日可以憑當日票尾遊覽3個地方。可以現金、悠遊卡支付票價，留意每個地方閉館前30分鐘，售票處都會關閉。

❷ 小白宮及紅毛城都設有收費停車場，以每小時計算，大概TWD20起。

❸ 建議先遊小白宮，再遊紅毛城，最後行埋滬尾礮臺。紅毛城導覽時間為10:00、11:00、14:00、16:00，不過最好都係事先詢問遊客中心。

❹ 乘搭捷運淡水信義線至終點站「淡水站」，可以出站後先遊覽淡水河岸及淡水老街，小白宮位置靠近多田榮吉故居。如果唔想浪費時間，可以直接轉乘紅26或836公車，直達「小白宮站」或「紅毛城站」。