西門町10個夜貓好去處！影貼紙相／唱k／音樂酒吧／飛鏢撞球場

台北西門町係一個愈夜愈熱鬧嘅地方，係拍拖兩個人不得不到嘅台北景點。除咗每逢夜晚都會有西門町夜市，其實重有好多夜貓好去處，即刻睇睇以下10個夜貓地，夜晚漫無目的時，又唔想咁早返飯店，不妨去逛一逛啦！

西門町夜貓好去處（1）﹕韓式拍貼機

台北西門町就好似東京新宿，甚至係首爾弘大、聖水洞，以至係香港旺角中心，都有唔少拍貼機，即Y2K年代嘅貼紙相機。西門町一帶有幾間拍貼機，即管試吓為大家搜羅一下，當中包括「Killer007」、「THE FILM Seoul」、「咔洽 CAJA」﹐更可以影出人生四格貼紙相，同另一半Sweet Sweet地留低珍貴回憶。

西門町夜貓好去處（2）﹕師園鹽酥雞

夜晚於西門町逛街逛得耐，必然要搵地方醫吓肚。除咗西門町夜市，其實本身都有唔少食店開到凌晨，其中一間係「師園鹽酥雞」，另一間24小時營業嘅一陣再講。該店來自於師大夜市，主要售賣酥香鹽酥雞，於Google評分上竟然有4.8分，值得一試，兩個人不妨點雙人套餐，包含多款小食。

西門町夜貓好去處（3）﹕大聯盟射擊場

「今日秀泰影城」係西門町夜貓地之一，8樓更有一個「大聯盟射擊場」，可以體驗射擊、棒壘球，亦有遊戲機玩，好動嘅朋友可以去試一試，每次射擊靶場單次體驗，人均最平TWD100。

西門町夜貓好去處（4）﹕唱K

喜愛唱K嘅朋友，不妨拍拖兩個人試吓去台灣嘅K房。例如「好樂迪」係台北嘅唱K地方，西門町都有分店，只不過大多數都係台灣中文歌，人均最低消費為TWD100。

西門町夜貓好去處（5）﹕湯姆熊歡樂世界

想去搵西門町遊樂場嘅話，可以去「湯姆熊歡樂世界」，遊樂場位處「萬年」大樓內，近西門町徒步區。遊樂場就似台版「歡樂天地」，有唔少好玩娛樂機台，每個代幣售價約為TWD5，適合消磨時間﹐過一過電子遊戲機癮。

西門町夜貓好去處（6）﹕Qtime QED複合式網路咖啡

自問比較文靜嘅朋友，想要找尋放鬆休閒嘅夜貓好去處，可以試吓去「Qtime QED複合式網路咖啡」。同「湯姆熊歡樂世界」一樣，「Qtime」都係位於「萬年」大樓內，消費上會員最平每小時TWD39，非會員最平每小時TWD60。整個空間就好似日本嘅旅宿書店，可以要求過夜包廂，你可以喺入面睇漫畫、睇書、睇戲或打機，店內更可以免費任飲各款飲料，甚至另加淋浴服務！

西門町夜貓好去處（7）﹕音樂酒吧

西門町狀似不夜城，有唔少適合夜貓前往嘅地方，酒吧就係其中一個好例子，包括有駐唱嘅音樂酒吧「窖床音樂BAR Drunk Shelter」，既有現場音樂，亦可social﹐更可打發時間，人均大概TWD400至600。

西門町夜貓好去處（8）﹕按摩

平常去泰國曼谷旅遊，返回酒店前都會去按摩，而台北西門町其實都有唔少按摩店，有精油按摩、腳底按摩，甚至中式指壓、刮痧、拔罐等服務。

西門町夜貓好去處（9）﹕飛鏢撞球場

至於「G CLUB TAIPEI」就係夜貓玩樂嘅好地方，除咗有酒吧及餐廳，亦飛鏢、台球、撞球場。台灣人嘅桌球即係香港人講嘅乒乓球，而香港人講嘅桌球即係台灣人講嘅撞球。呢間夜晚娛樂場所營業至凌晨3點，於Google評分有4.6分，消費大概係TWD200至400，價位適中，甚至可以任打2小時，啱晒一眾夜貓朋友！