【台北實用指南】台北車站實測置物櫃！投幣式設計、電子密碼開關、每3小時計算

台北飯店一般於下午2至4點先有得check in，而朝早11點就要check out，距離上機、落機時間稍遠。雖然E.A.Two係backpacker，多數行李唔多，但知道唔少人都會帶上笨重行李，所以今次回程時就為大家實試台北車站內嘅置物櫃，方便大家將行李丟低，拍拖兩個人可以善用時間多走幾個行程。好多台北車站、桃園機場捷運，以至桃園機場嘅置物櫃大致相同，部份價格稍有分別，電子密碼式非常方便。不過，當中竟然有一組置物櫃係無人用，我哋實測時終於知點解，你又估唔估到呢？

喺台北全線捷運車站內，基本上都會有置物櫃，對於遊客同香港人嚟講，最方便應該都係台北車站、桃園機場捷運站，方便丟低行李再來回市區及機場。如果想知各車站置物櫃詳細位置，就要睇返官方網站旅客服務內嘅置物櫃服務一欄。

多數置物櫃都係分成3個尺寸，有部份則只分2個尺寸，價格不一。先以台北車站嘅置物櫃計算，中型及大型尺寸分別收TWD40、TWD60，可以存放3小時，而3小時係最少存放嘅時間，唔夠3小時都會當作3小時計算。以10點存放至7點計算，即係9小時，價格就係TWD120，折合港幣大概就係HKD30。

如果唔想離開時花時間去置物櫃取物，而又於台北車站轉乘桃園機場捷運，建議擺放桃園機場捷運對上嘅置物櫃，非常順路。置物櫃存放時間較長，分3個階段，第一階後係首24小時，第二階段係25至48小時，第三階段就係49至144小時。而置物櫃只分大、小兩個尺寸，每3小時計價格分別係TWD40、60，其實同台北車站相同。第二階段時間就只係TWD30、40，第三階段時間則為TWD20、30，不過其實一般旅客唔需要咁長時間。

若想再方便啲，可以直接將行李放置桃園機場出境大堂嘅置物櫃，但此方法只建議當日行程走桃園機場線一帶嘅朋友，要再走返去台北市區就太浪費時間。機場第一航廈置物櫃基本上分成3個尺寸，大中小分別係TWD40、60、80，同台北車站、桃園機場捷運大致上無異。而機場置物櫃係來自於宅配通，最側位置亦有該店托運中心，更意外係該店都可以儲存行李，價格亦分3小時計算，大中小型行李收費一樣係TWD40、60、80，更大優點係毗鄰check in櫃檯。

雖然台北好多置物櫃好方便，但編輯於走過台北捷運時，竟發現一組完全無人用嘅置物櫃。只得一個尺寸嘅置物櫃，每3小時聲稱只係需要TWD50，價格比上述置物櫃更低。但實試之後，入唔到錢，用唔到悠遊卡，方才發現原來呢組置物櫃根本係唔能夠使用，咁到底設置於此處有何作用？

使用台北車站、機場等置物櫃非常簡單，寄物、取物步驟唔複雜，放晒行李入置物櫃後，依指示妥善關門、按號碼、付款，然後會有一張單據從機器吐出。收到單據後記得要妥善保管，因為入面有你選擇嘅置物櫃號碼，以及電子密碼。要注意，呢6位數字嘅電子密碼每日只限開關一次，換言之係每日用一次，所以只張一次取物。而置物櫃一開始會先收取首3小時嘅費用，往後3小時嘅費用就需要喺取物時後補。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 官網置物櫃位置﹕https://www.metro.taipei/cp.aspx?n=074C9E96AEC24806 。而「台北捷運GO」官方app就可以睇到每個捷運站剩餘嘅置物櫃數量。

❷ 多數置物櫃都可以用悠遊卡，亦可以用投幣式使用現金。置物櫃基本上分別可擺上大概20吋、29吋嘅行李箱。

❸ 置物櫃會用電子密碼式寄物及取物，所以一定要記得單據上嘅密碼，唔好遺失單據。

❹ 若存放超過24小時，置物櫃嘅物品會移到其他地方，只會保留30日，需要聯繫有關當局取物。