好好運快餐店「世一」沙嗲牛肉麵近月荔枝角重開！麵底加1樣嘢畫蛇添足扣分、極上系列週六限定！

如果要搵香港特色小吃，港式茶餐廳會搵到好多，其中沙嗲牛肉麵就係重要小食，亦係香港獨有嘅茶記產物。被稱為「沙嗲牛世一」嘅「好好運快餐店」，近月於荔枝角重開，想要拍拖兩個人前往就要留意E.A.Two建議嘅最佳時間！

被網民視為Number 1沙嗲牛肉麵嘅「好好運快餐店」，出品冠絕全港，吸引大量區外客慕名而至，每日大排長龍。據悉，最終因生意太好而影響發牌，開業半年就突發退租，但3個月後又宣佈重開。近月，該店終於喺同區重新開業，單睇條隊就知火紅程度有幾高，令沙嗲牛肉麵再次成為荔枝角名物榜首。

身為全港冠軍沙嗲牛肉麵，一直獲得「沙嗲牛肉關注組」關注，一到午市例牌大排長龍，如果想要避免條隊太長，建議於午市之前到達，即係打工仔午飯時間前。雖然該店於朝早7時已經開始營業，但有部份產物如極上沙嗲牛肉只限逢星期六供應，而供應時間就只係朝早11點後。所以如果想要食沙嗲牛肉，又唔想點排隊，必須校準時間，朝早11點就要於門口等候，因為一到1點條隊就會特別長。

雖然店內主打沙嗲牛肉﹐但其實其他選擇都有水準，比如係咖喱吉列豬扒煎蛋飯$61、酸辣豬扒米線、生炸雞髀、鮮茄汁豬扒意粉等，發覺好多選擇都同豬扒有關，似乎店家除咗沙嗲牛肉，亦對豬扒特別有自信。咖喱吉列豬扒煎蛋飯就似咖喱魚蛋嘅咖喱，只係無嗰種咖喱汁咁重香料味，始終偏向似日式咖喱嘅甜味。

而吉列豬扒等候時間較沙嗲牛肉多一倍，或者係因為選擇嘅人唔多，所以每一份都係另外去做，呢點都係點餐小秘訣，點一份大眾較少選擇嘅餐點，隨時會有更大驚喜！吉列豬扒極大塊，幾乎覆蓋整碟碟頭飯，炸起色澤金黃，切落去亦發出滋滋聲響，豬扒表皮香脆，而肉質卻軟腍，味道比沙嗲牛肉反而更意外。

一份普通沙嗲牛肉麵餐$56，包兩款餸，例如火腿煎蛋或炒蛋，可選米粉、米通、米線、意粉，飲品有咖啡或茶，更可加$6轉紅豆冰、雜果冰、菠蘿冰，選擇就同一般茶餐廳無異﹐價格上就較高。沙嗲牛肉飯餐$60，寫明特濃沙嗲牛肉配雙太陽蛋飯，價格就好似平常碟頭飯，而淨沙嗲牛肉就賣$62一碗。

當中，店內逢星期六有一款極上沙嗲牛肉套餐$78，但僅限逢星期六11點後供應。官方表明沙嗲牛肉係採用澳洲榖飼無激素牛肉﹐難怪沙嗲牛肉肉質有別。一碗沙嗲牛肉賣近$80，就似一碗豪華版沙嗲牛肉麵，價格上真係可圈可點，甚至有啲離地。不過，豐儉由人，抵唔抵食就由讀者自行決定。

極上沙嗲牛肉雖然價格較高，但亦算不欺場，起碼食到底都重有，沙嗲牛肉份量係海量級，真係至少10塊，難得每一塊都比平常茶記厚切同大塊，唔會變成細碎上檯，而且入口更軟腍。沙嗲醬都係不外乎沙茶醬、沙嗲醬等材料，該店嘅沙嗲牛肉就同時加入洋蔥絲，增添增次。沙嗲醬汁色澤並非好沉色，入口鹹中有甜，咪就係鹹香沙嗲醬配上香甜花生醬嘅味道。

至於麵條，據悉麵係彈牙嘅大光麵，而今次選擇嘅係通粉。一般來說，通常都係指細細粒嘅通粉，但店內嘅通粉其實係米通，即係長長幼幼嗰種純白長通粉，就等於長洲「陳通記」食到嘅通粉。沙嗲牛肉湯底本來滲透沙嗲醬，加上海量高質量牛肉，其實都係難以挑剔。不過，湯底內竟然加入三色豆，真係令編輯忍唔住必須扣分，三色豆係多餘而令人討厭嘅配菜，何必加入呢？呢個情況，真係完完全全呈現畫蛇添足。