【氹仔美食】蛋球仔＝雞蛋仔？80年老字號澤賢記12款口味任揀花城區都有澳門葡撻名物？

香港雞蛋仔向來係本地街頭小吃代表作之一，係情侶拍拖兩個人掃街之選。唔單止受到本地人歡迎，連外地遊客都慕名而至！而澳門原來都有一間貌似雞蛋仔嘅小吃店，不過就叫做「蛋球仔」，而唔係「雞蛋仔」，驟眼睇兩者毫無分別，到底有咩關係呢？呢間售賣「蛋球仔」嘅老字號小吃店，無論遊客區定非遊客區，都可見到佢蹤影，最特別嘅地方竟然以葡國同澳門招牌葡撻作餡！

以「澤賢記」命名嘅澳門蛋球仔專門店，主打係蛋球仔、夾餅，兩款小食都加入唔同餡料，口味不一。該店現時於澳門依然有7間分店，唔單止官也街、天神巷、澳門百老滙，連非遊客區嘅美景區、花城區都可以蹤影。最意外嘅地方，係連前香港重要報章《蘋果日報》於5年前都曾經為呢款「澳門名物」做過專訪。

「澤賢記」夾餅只係分組典原味、朱古力味，基本上同香港格仔餅無異，價格為MOP26至31。而蛋球仔就有足足12款口味，招牌必食之選係葡撻味，另外重有金山咖啡味、瘋脆原味、芝味雙重奏、心軟比利時朱古力撻、朱古力、澤賢記手工紫薯、靜岡抺茶撻、靜岡抺茶手工麻薯、朱古力手工麻薯，價格為MOP25至41。澳門嘅蛋球仔，同香港嘅雞蛋仔如出一轍，恍如倒模一樣，到底有無咩關係呢？

據當年《蘋果日報》報道，呢間「澤賢記」由1944年起推住車仔售賣一款叫「蛋球仔」嘅小食。至今日2024年，名氣愈做愈大，據知遊客區分店不時要排隊至少1小時先有得食；目前「澤賢記」已經於澳門屹立有80年歷史！好奇心軀使下，E.A.Two翻查返雞蛋仔歷史，發覺香港雞蛋仔係來自於50年代雜貨店，將剩餘嘅破爛雞蛋同牛油、麵粉混合，變成一款全新小食。問題嚟啦，到底係兩地撞橋，抑或蛋球仔本身就係雞蛋仔前身？

言歸正傳，「澤賢記」蛋球仔雖然賣得唔算平，但份量頗多，size似乎可以遮蓋人塊臉！蛋球仔同雞蛋仔質感基本無太大分別，表皮脆卜卜，同樣有咬口，內裏蛋漿依然鬆軟。蛋球仔亦有飽肚感，但同雞蛋仔一樣，飽肚同時都有滯感同膩感。該店嘅蛋球仔，最特別之處係加入葡撻作餡，變成澳門獨創嘅街頭小吃，葡撻蛋球仔的確係必試之選！

今次編輯嘗試兩款口味，一款係葡撻味，另一款就係鹹蛋黃味，兩種都係花城店餐牌上嘅推介之作。葡撻味係將葡撻嘅蛋部份加入雞蛋仔，令蛋球仔帶有蛋漿香甜味同葡撻烘焙味；而鹹蛋黃味就同平時乜都加鹹蛋黃嘅小食一樣，無乜太大驚喜。況且，鹹蛋黃味太濃厚，其實完全蓋過蛋球仔嘅蛋香味，只係食到鹹蛋黃味，反而葡撻味就調校得恰到好處。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式只限現金。

❷ 「澤賢記」目前於澳門有7間分店，除咗花城店，亦有科大店、官也街店、澳門百老匯店、美景店、天神巷店、寰宇天下店。

❸ 由於即叫即做，每份新鮮出爐，而且頗廢功夫，所以等候時間頗長。以無人等候計算，基本上15至30分鐘，蛋球仔先會上到手。

❹ 花城店旁邊有間叫「半仙豆夫」嘅茶飲，但一查之下先知原來係國內嘅網紅飲品，飲唔飲自己揀。