【氹仔美食】花城區澳門水蟹粥／鑊氣小炒／甘蔗汁！肥仔文美食營業至凌晨3點宵夜好去處

以前拍拖兩個人去澳門快閃旅遊﹐不外乎要食葡撻、水蟹粥、雙皮奶、杏仁餅、豬肉乾等，今時今日澳門美食選擇增加﹐反而想搵返舊時去澳門食嘅嘢。氹仔官也街一帶雖然選擇不少，但編輯今次走到花城區，發覺有間食肆專賣竹昇麵、水蟹粥，而且營業至凌晨3點，如果要於澳門留過夜，不妨擇地宵夜！

位於氹仔舊城區花城嘅「肥仔文美食」，比較少遊客會專程前往，店內時而有吉位，店外時而又排隊，就算已落單，於門口等候45分鐘，入座都依然要等候15分鐘！預留時間係必須，值唔值得等就由讀者自行決定。

該店原來於氹仔舊城區創立25年，同澳門特別行政區一樣，都係始於1999年起。雖然今次以找尋水蟹粥為目標，但食完先發現原來該店另一個重點係古法竹昇麵，即係竹竿壓麵，以呢種方法製麵已經少之又少，香港依然保留傳統竹昇麵嘅小店亦唔多。其古法竹昇麵配搭用新鮮豬大骨、大地魚熬煮6小時嘅湯頭，睇嚟頗為吸引。一碗蝦籽雲吞撈麵MOP75、瑤柱鮮蝦雲吞麵MOP50、馬拉盞撈麵MOP60、秘製墨魚丸麵MOP80。

店內水蟹粥同一般海鮮一樣列明係時價，當日以一碗水蟹粥計算，賣MOP170，價格上係偏貴，好似香港酒樓飲宴嗰種大湯碗就貴一倍左右，但足夠成家人食，如果兩個人食，其實一碗基本上都夠。水蟹粥內除咗有一隻蟹，亦有元貝、大米。據店舖所介紹，水蟹粥以明火熬煮2小時，但應該唔係即刻煮，咁點解要等1小時呢？不過，水蟹粥的確係綿身又香滑，水蟹鮮甜，肉質清爽順口，白粥吸收蟹嘅精華，有舊時食澳門水蟹粥嘅感覺。

另外，重有唔少鑊氣小炒，都係甚受客人歡迎嘅菜式，例如係魚香茄子煲MOP90、粉絲九肚煲MOP140、紅燒乳鴿MOP58、生炒排骨MOP98、豉椒牛肉炒麵MOP65等，海鮮方面就有咖喱炒肉蟹、特色油浸烏魚，又或者係小吃椒鹽粟米MOP88、炸雙丸。一碟蒜蓉炒時菜MOP65，馬拉盞炒時菜MOP70，馬拉盞係幾香口，從通菜可以睇到係夠鑊氣嘅。店內有款澳門製造嘅新鮮甘蔗汁MOP25，每日新鮮直送，係有啲甘甜嘅甘蔗味，但就偏甜，似溝咗蜜糖水之類。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店設有兩間分店，一間係澳門皇朝店，另一間就係氹仔店，即係花城區分店。

❷ 入座需要先攞飛﹐等候時間比較耐，隨時要等至少1小時，但店員會先落單。不過，正確係等位45分鐘，入座都重要等15分鐘。離開時，該店畀港幣係會以港幣找續。

❸ 該店係中菜館，主打係水蟹粥。

❹ 留意營業時間係到凌晨03:00，不過02:30就會截單，適合作宵夜。