【酒店自助餐2024】逸東軒普慶餐廳下午茶低至$268 實試巴西烤肉／西班牙油條／香烤豬頸肉／墨西哥夾餅

香港自助餐食邊間好？E.A.Two一直以來只會選擇一至兩間酒店，其中一間係「香港逸東酒店」。酒店內嘅「普慶餐廳」就係知名自助餐廳，適合拍拖兩個人去食好啲。以香港嘅酒店自助餐嚟講，編輯覺得「普慶餐廳」嘅buffet係從未令人失望過，特別係熟食，而最惹味及高水平嘅竟然係豬頸肉？

「普慶餐廳 The Astor」係屬「香港逸東酒店 Eaton HK」旗下餐廳，主打自助餐，每日包含有自助午餐、自助下午茶及自助晚餐。以KKday及Klook網上訂購計算，不時有折扣優惠，甚至可享買一送一優惠，適合拍拖個人慶祝記念日或生日。若以快閃優惠計算，兩個人自助午餐只需$466，人均僅$233！而自助下午茶經8折後，每人只需$268，就算只係9折，亦只係$298，CP值高！

而2024年2月至5月期間，自助餐主題分別係東南亞及南美洲美食，而其他食材基本相近。多次前往「普慶餐廳」，發覺該店嘅熟食及鹹點係從來未曾令人失望過，而且係數一數二高水準，只不過甜點係較為遜色及參差，時好時差。

自助餐廳以懷舊風格設計，分成大概6至7個區域，種類不少，但下午茶就無港式燒味可擇。雖然下午茶未有生蠔、龍蝦等，但都有凍蝦、青口、西班牙龍蝦飯。由即日起嘅下午茶自助餐，為全新主題「肉罷不能南美洲」，特別在於無限量供應巴西烤肉！

除咗巴西烤肉，亦同時有燒春雞、燒牛肉、燒豬肉、燒香腸、燒菠蘿，更有超過10款醬汁可以選擇。雖然烤肉係吸引，但編輯覺得另一端嘅東南亞菜式先係隱藏級美食。當中，香烤豬頸肉水準甚高，最難得係唔只有焦香，肉質軟腍，而係豬頸肉烤得帶有黏度！

此外，下午茶自助餐亦有其他南美洲國家美食，比如係阿根廷餡餅及香腸三文治、墨西哥烤粟米、檸檬汁醃三文魚、墨西哥夾餅、墨西哥辣椒蝦薄餅等。不過，龍蝦海鮮飯竟然配搭小龍蝦裝飾，唔建議大家將小龍蝦食落肚，因為小龍蝦作用係清潔海洋，即係食垃圾，反正小龍蝦入面無乜肉，無意思。

甜點區方面，大多數都係平常自助餐會見到嘅蛋糕區、雪糕區，水果區等。今次最特別之處係有一款西班牙炸油條（Churros），另有阿根廷焦糖牛奶夾心餅、海鹽朱古力牛奶焦糖撻、酥皮忌廉卷筒等。當中Churros係最值得一試嘅甜點，小小油條即炸，整條上檯，造型似有花紋嘅手指餅，入口則似鬆脆版沙翁，因為油條滿滿砂糖、椰絲，食落又覺得頗為吸引。

至於飲品，可以到燒味區旁邊取特飲、果汁、熱茶及咖啡。當中可以任飲特飲，包含有兩款無酒幣飲品，一杯係草莓湯力，另一杯為菠蘿椰奶，另外都有橙汁及西柚汁可以選擇。而熱茶都有超過10款茶包口味，茶包牌子為JAF TEA，來自斯里蘭卡。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ buffet有午餐、下午茶、晚餐可擇，下午茶會最平，而午餐、晚餐就會多咗少少嘢食，例如生蠔、松葉蟹腳、海鮮等。如果食量唔太大，其實下午茶已經夠食。

❷ 記得留意kkday或klook優惠，隨時有8折或9折。不過，店內有加一服務費，除非使用coupon扣減。

❸ 午餐時間為12:00 - 14:30；下午茶時間為15:15 - 17:15；晚餐時間為18:30 - 21:30。

❹ 到達時只需於現場請出示 QR code即可，建議提早10分鐘到達，可以分到靚檯卡位。

EATWO

Miss A

【區區有小店2024】九龍灣21間尚存本土餐廳推介！平價牛扒／工業區茶記／台式滷味｜九龍灣美食推薦2024