【澳門好去處】石排灣郊野公園睇大熊貓！探索珍稀動物恍如走入迷你動物園！

澳門雖然地方細小，但其實都有好幾個郊野公園，單單路環就已經有至少3個郊野公園，距離路氹城最接近嘅就係「石排灣郊野公園」。園內唔單止有得睇大熊貓，重有好幾款珍稀動物，平常都係難以睇到，恍如迷你版香港海洋公園或動植物公園，但卻免費入場，情侶拍拖兩個人不妨去逛一逛！

「石排灣郊野公園」現時有如一個縮小版嘅香港海洋公園，或者香港動植物公園，內有種有多款植物供欣賞用途。另外，園內既有稀有動物，更有大熊貓館！

位處路環島西北面嘅「石排灣郊野公園」，原先其實只係一個農場，40年代亦設有耶穌會，照顧孤兒同失業青年。直到1985年，原址先改建成郊野公園，目前佔地有近20萬平方米，係全澳門最大自然綠化區﹐最高點更有海拔85米，同香港嘉頓山相近。

從入口進入「石排灣郊野公園」會發現當中有架小型飛機同舊式火車頭，原來呢架飛機係大有來頭！小型飛機原先叫「沙路士號」，來自葡萄牙，於1987年從澳門返回葡萄牙時，曾經墜毀，其間曾經落力維修，不過最後葡萄牙都係送畀澳門，成為園內嘅陳列品。

呢個郊野公園最大特色固然係「大熊貓館」，不過要留意一端大熊貓資訊中心展館只係介紹大熊貓資訊，想睇大熊貓就要請移玉步至另一端「大熊貓館」。館內佔地有大概3000平方米，室內以仿自然環境設計，令熊瞄猶如置身大自然環境內。基本上﹐館內可以見到兩隻大熊貓，一隻叫婭林，另一隻就叫蜀蓉，兩者屬一男一女。當日編輯見到一隻懶洋洋地趴低瞓覺，另一隻則不斷食竹葉，非常可愛！

園內有樹木園、藥用植物園、趣異植物園、香花植物園，甚至種子交流區等，有興趣可以前往參觀。而動物園內唔單止有大熊貓，重有各式靈長類動物、梅花鹿、爬蟲類動物、鴕鳥、鸚鵡、孔雀等等。而郊野公園內更特別設有「稀有動物館」，當中飼養咗金絲猴、松鼠猴、黑葉猴、小熊貓，都係平常難以見到嘅小動物。小熊貓叫烙烙，身體偏啡紅色，臉部偏啡黃，白毛較多，體型頗大。

喜愛行山嘅朋友，不妨走過「石排灣郊野公園徑」，現時全長有約1680米，自然教育徑為主徑，佔其中935米。整條路線可以圍繞整個郊野公園東面、南面及西南面而走。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線15、21A、25、26、26A、50、N3至「石排灣郊野公園」，落車後其實係近媽祖文化村入口，需要行返轉頭，徒步約4分鐘先會抵達「石排灣郊野公園」入口。所以，比較建議前一個站「安順大廈」落車，行幾步道係「石排灣郊野公園」另一邊入口。

❷ 公園免費入場，可以自由進入大熊貓館及珍稀動物館。不過大熊貓館如果多人有機會分上下午兩個時段，包括10:00－13:00、14:00－17:00，並分幾個場次入場，逢星期一休息，而最後進館時間為16:45。

❸ 園內有小食亭、飲水機、飲品自動售賣機、公廁等設施。

❹ 園內另有澳門大熊貓禮品館、澳門大熊貓資訊中心、土地暨自然博物館，開放時間大致上都係10:00－17:00。