紅磡車仔麵店威風百麵人人送甜品、8款任揀！隱藏驚喜勁爆蔥油／椰香咖喱碟頭飯

紅磡係香港老區，而區內小店不少，當中車仔麵店亦有唔少選擇。最神奇嘅地方係區內幾間車仔麵店都別具特色，最出色嘅都唔係車仔麵。以呢間紅磡車仔麵店為例，雖然好多人都會揀車仔麵，但其實碟頭飯更令人驚喜。店內最大特色則為點餐送甜品，而且係人人有份，重有8款可以選擇，適合拍拖兩個人去Sweet Sweet！

「威風百麵」係紅磡區內一間車仔麵店，鄰近「寶石戲院」，距離黃埔亦唔遠，地理位置方便。店內唔單止有車仔麵，當中重有一款自家製冰凍酸梅湯，生津解渴，甜度適中。

該店以車仔麵為主，可以揀湯麵或撈麵，包括招牌威風百麵$59，含豬大腸、腩肉、墨魚丸、冬菇、順德魚蛋、溏心蛋、雞翼、時蔬，就係八餸車仔麵，只係都係傳統車仔麵款式，無咩特別。湯底有瑞士汁、秘製辣汁等。湯底頗濃，帶有香甜味，而當中有一羹醬汁，味帶辛辣，同湯底配合。

精選飯餐有勁爆蔥油同椰香咖喱系列，勁爆蔥油豬扒煎蛋飯$53，相對車仔麵嚟講，碟頭飯需要等較長時間。上檯已經頗有驚喜，份量十足，太陽蛋底下係一大碗白飯量，旁邊有一大塊蔥油豬扒。整塊豬扒佔成隻碟嘅一半位置，好似有兩塊豬扒嗁感覺。豬扒味道頗濃，肉質軟腍，醬汁鹹中有甜，上面舖滿青青綠綠嘅蔥油﹐更香口。

店內最特別嘅地方係點餐後會送甜品一客，都算係香港車仔麵店中罕有嘅marketing。甜品有法式焦糖燉蛋、木槺布甸、Oreo木槺布甸、3.6牛乳奶凍、焦糖豆乳布甸、椰皇奶凍、抺茶奶凍、桂花糕，部份要加幾蚊。每人都會有一小盒甜品，最後帶上小小甜，甜度唔高。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 付款方式接受現金、八達通、PayMe。

❷ 需用QR Code落單。

❸ 店內地方不大，座位唔算多，可能要於門外排隊。

❹ 車仔麵會比較快出餐，碟頭飯就較需要時間。

EATWO

Miss A