實地搶先直擊全球首座IKEA空中花園！6月3日開幕成台中新景點小食站歎埋焦糖蛋撻味軟雪糕

IKEA首座空中花園剛剛登陸台中店，並於2024年6月3日先正式開幕，E.A.Two編輯有幸於首日前往實地直擊報道，戶外天台空間搖身變成空中花園，不僅擺放大量綠植盆栽及IKEA傢俬，更特別設計成多個section，包括花市、綠洲、迷宮、花園等，不妨拍拖兩個人參觀一下。不過，編輯覺得整個空間尚欠一物！

今次IKEA南屯區台中店係全球首座擁有空中花園嘅分店，空中花園座落於台中店5樓戶外天台，單單花園面積已有超過2000平方米。IKEA台中店原意以永續發展為題，構成充滿創意及趣味嘅生活體驗空間。整個場所讓客人可以享受綠意空間﹐以及片刻放鬆時光。同時，亦可以打造成另類示範單位，皆因現場擺放不少戶外專用傢俱，將示範單位場景延伸至戶外。

於6月2日，IKEA 5樓天台空中花園尚未開放；6月3日，IKEA空中花園終於開幕，走入大門口後，需要徒步樓梯方能登頂。天台大門外，其實有電梯來往4樓至5樓，方便行動不便人士；亦有一個花園座位可以打卡，戶外更設有太陽能光電板。

甫踏入IKEA空中花園，最先映入眼簾嘅係由綠植砌成嘅「Hej IKEA」字樣，行開IKEA必然知道「Hej」係瑞典文中嘅「你好」。綠植週邊為多個唔同設計空間，一端有售賣綠植嘅「露天花市」，亦有擺滿戶外檯櫈嘅「療癒綠洲」，另一邊更打造成綠意滿滿嘅小知識迷宮，更有一個有環保共享概念嘅「城市花園」，甚至擺放大量戶外鋼質傢俱嘅「戶外餐桌派對」。不過，後面可見重有一個頗大空間尚未開放，IKEA亦有指示敬請期待，到底有咩特別呢？

喜愛到IKEA買盆栽植物嘅朋友，必然要去露天花市睇睇，當中既有多肉植物、爬藤植身，亦有香草及觀葉植身等。後方則有唔少以木材質為主調嘅療癒綠洲，比如係NÄMMARÖ系列傢俱，木材帶有沉穩格調，充滿度假感，令人愜意。附近更可見打造成一個戶外餐桌派對，擺放有大量鋼質傢俱，比如係SEGERÖN系列傢俱，既能防水，感覺亦優雅時尚，但編輯覺得尚欠燒烤食物。如果空中花園持續發展落去，同時售賣及提供燒烤食物，相信會更吸引人流客量！

空中花園入口另一端可見一個綠意迷宮，但其實係一個擺放咗多塊展板嘅小知識及遊戲空間，可通過問答得知環保永續綠生活方法，比如調低冷氣1度可減省6%電力，適宜拍拖、更適宜親子前往。而背後就有一個城市花園小角落，設有咖啡渣環保共享區，入場人士都可以自備容器，將咖啡渣帶走，將咖啡渣變成肥料，甚至除濕或除臭劑，循環再用！

香港嘅IKEA既有餐廳，亦有小食站，台灣嘅IKEA菜式上比香港更吸引，比如會有香港無嘅原隻烤雞，以及炸雞等。而小食站亦比香港選擇多，一端更可以自行擠雪糕筒，每支人均只係TWD10！現時，IKEA更有一款焦糖蛋撻味雪糕筒，非常香甜。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ IKEA空中花園位於全幢IKEA內嘅頂樓天台位置，乘搭扶手電梯直上4樓，然後再食指示牌調轉頭走入大門口，徒步上樓梯即達5樓空中花園。

❷ 空中花園地方不大，只係將傢俱擺放於天台空間內，週邊以綠植圍繞，只係一個IKEA另類示範單位。

❸ 目前有一部份空間仍未開放，而該部份所佔天台空間不少，需要密切期待。

❹ 乘搭全新台中捷運至「文心森林公園」站，穿過文心森林公園及戶外圓滿廣場，5分鐘內即可到達全幢IKEA入口。

❶ 開幕首3週週末均有限定活動，包括夢幻泡泡秀、小丑魔術秀、歡樂氣球表演、巨型大偶／小丑折氣球、拍照打卡抽好禮、綠意迷宮闖關體驗送禮等，詳情請留意官網公佈。

EATWO

Miss A

兩個人旅吓行

專題

E.A.Tips :

台中IKEA空中花園