火炭首選工廠食堂！圓點工房抵食港式、西式下午茶開胃黑醋炒意粉／沙律菜／咖喱牛腩飯

有留意E.A.Two網站嘅讀者，大概會知道火炭區係我哋比較少前往嘅區域﹐主要係因為該區小店甚罕見，而且好荒蕪，想要搵食都唔容易。但事實上，火炭係一個工業區，同其他工業區一樣都有工廠食堂及地面其他小店，其中一間如同樓上Cafe嘅小店就值得大家拍拖兩個人一試。

「圓點工房 Canapés Room」係火炭區內一間持牌工廠食堂，位於華樂工業中心內，同一般持牌工廠食堂一樣，都有註明「只准本大廈之工廠員工使用」（FACTORY EMPLOYEES OF THIS BUILDING ONLY）。

店內採田園風，由裝潢到菜式，相當連戲。下晝3點前為午餐，而下晝3點後則為下午茶時間，餐牌並唔一樣。當日下午茶時段前往，眼見其他客人午餐菜式有扒餐，份量十足，非常吸引，午餐重有卡邦尼意粉、德國鹹豬手配蜜糖芥末醬、重量級芝士牛肉漢堡。而下午茶菜式則有熱狗、漢堡包，亦有湯麵、撈麵、粉同飯，當然唔少得小食類別。

一間田園風Cafe內，竟然有港式味濃嘅秘製咖喱牛腩飯$50？上檯後，會見到咖喱飯並非平時港式Cafe細細碟，而係茶記份量。而咖喱汁及牛腩都夠惹味，唔係普通唔喱粉或即食咖喱嘅簡潔味道，牛腩亦軟嫩入味。

意式黑醋豬頸肉炒意粉$46 則係比較開胃驚喜嘅菜式，意粉以酸酸甜甜，黑醋炒勻，好醒胃，情不自禁食完一啖又一啖。難得係連豬頸肉份量都唔少，軟腍又香口，意粉質感亦爽口彈牙，就好似意大利廚師所講嘅Al dente！

相對嚟講，小食就比較失望。香脆雞翼配沙律菜、香蒜牛油包$36，其實只係CP單骨雞翼配泰式辣醬。只不過佢嘅沙律菜同蒜蓉包救返晒成件事，麵包較細小，但就鋪滿蒜蓉。沙律菜唔係坊間幾片生菜撈少少麻醬就算，而係用紫椰菜、羽衣甘藍、車厘茄、青瓜等西式沙律菜製作，再加上西式沙律醬，打卡又食得。每份套餐都會附上熱茶、蜂蜜綠茶、韓國柚子蜜、冰糖雪梨茶、即磨咖啡等，不過不失。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小店有提供到會服務，全年無休，同餐廳休息日有別。

❷ 付款方式接受Visa、Master、現金、八達通。

❸ 店內無加一服務費，但程序上就係先點餐付款，然後就會送餐點。

❹ 午餐可以加$15買一杯Movenpick雪糕。店內有西班牙特色甜品西班牙油炸鬼配拖肥醬$58，下午茶重有鬆軟疏乎厘提供。