【台北夜市】大稻埕延三夜市5間精選小吃店 80年歷史無價麵店人氣十足

延三夜市相比士林夜市、饒河夜市、寧廈夜市等，為台北夜市中比較少香港人前往嘅夜市選擇，而當中都有唔少小吃店值得拍拖兩個人一試。延三夜市中，有一間小吃店專注賣麵，但餐牌中竟然全無價錢，只有寥寥幾隻字，偏偏門口依然目人龍，到底一碗麵係幾多錢呢？

延三夜市美食（1）﹕大橋頭老牌筒仔米糕

於2020至2021年獲得台灣《米芝蓮指南》必比登推薦嘅「大橋頭老牌筒仔米糕」，開業已有超過50年，目前由第3代接手。該店一直以陳年圓潤糯米炮製古早味筒仔米糕，米糕上權呈圓柱形，內含肥肉或瘦肉，由客人自選，更可自由配搭辣蘿蔔或甜辣醬。筒仔形米糕粒粒煙韌，配料有蔥花、肉絲、蝦米、香菇等，蒸熟即成。

延三夜市美食（2）﹕排骨湯高麗菜飯

延三夜市內，另一間小吃店為「排骨湯高麗菜飯」，該店亦連續3年獲得台灣《米芝蓮指南》必比登推薦，實力不容忽視。店內分別有2款主打菜式，一係高麗菜飯，二係排骨湯，價格經濟實惠，高麗菜飯最平只係TWD20，排骨湯更可以免費添飲！

延三夜市美食（3）﹕賣麵炎仔

曾於2009年登上台灣《米芝蓮指南》必比登推介嘅「賣麵炎仔」，每日開店時間只限幾個鐘，人潮絡繹不絕。該店位於大同區，鄰近知名景點大稻埕，平日人龍無假日咁長。整張餐牌一個價錢都無，店員講幾多錢就係幾多錢，透明度極低，到底點解依然咁多食客呢？「賣麵炎仔」又叫「金泉小吃店」，開業已超過80年，歷史悠久，現時已經傳承至第3代，主打依然係沏仔麵。門口可見大廚熟練地斬雞斬燒肉，連不愛排隊嘅編輯都忍唔住跟住一眾當地公公婆婆等待用餐。雖則話要排隊，但其實人龍流轉度頗快，皆因店內採港式搭檯文化，坐低後，身邊極可能坐下毫不認識嘅客人，好多都係以台語點餐。

餐牌只係簡潔地寫有幾款菜式，包括有雞、小肚、心、肝、肚、三層肉、燒肉、生腸、花枝、鯊魚，可配搭菜、飯、腦湯、扁食湯，而腰只、下水、米粉、麵都有分乾麵及湯麵，而雞肉、燒肉亦有分為前後、中赤部位。單睇餐牌，外人的確難以明瞭，簡單嚟講，雞肉前後即前面定後面部位，而燒肉中赤即係帶皮定瘦肉。編輯慣性地快速觀察週邊客人食緊乜，發現大多數都係要白切雞、紅燒肉、豬心等，當然加上一碗麵。

湯麵為黃油麵，湯頭有如日本拉麵嘅豬骨湯頭，配料簡單，古早味濃。隔雜婆婆嘅紅燒肉甚吸引，肥瘦適中，表皮酥香，更配有有沾醬。點完餐方才發現，原來紅燒肉、豬心比土雞肉更能夠擄獲街坊味蕾，而紅燒肉比土雞肉價格更低！至於白切雞，份量不少，雞肉旁邊放滿薑絲，同時配有沾醬，一款為烏黑醬油膏，另一款色調有如泰式辣醬。雞肉雖為雞髀肉，但肉質較為結實，但又唔係嚡口，同平時滑嫩雞肉有啲唔同，連皮位置會比較嫩身。雞肉經過調味，入口有幾分微甜，係帶幾分油膩，雞皮比雞肉較有質感，而醬油膏就較配合雞肉肉感。