【西門町美食2024】詹記麻辣火鍋全新登陸西門町！朝聖台北最強麻辣鴨血！即睇最難訂檯火鍋店入座貼士！

台北最強麻辣鴨血係邊間？西門町近月有間全新開業嘅人氣麻辣火鍋店，受到在地人歡近，有台灣人更稱該店擁有台北最強麻辣鴨血。E.A.Two實試後，發覺的絕對值得拍拖兩個人搭飛機朝聖，係台北一間隱藏級麻辣火鍋店！不過，該店同時係一間最難訂檯嘅麻辣火鍋店，於門口排隊都要等待2至3小時，客人流量如此大，到底有咩辦法可以試到呢間極高水準嘅麻辣鴨血呢，即刻睇睇E.A.Two入座小貼士！

從捷運「西門站」步出，不足5分鐘步程即可以抵達呢間隱藏級台北人氣麻辣火鍋店。該店位於「西門大世界」內，從門口嚟講，真係唔覺得入面會有一間受歡迎嘅麻辣火鍋店。不過，玻璃門的確透視出「詹記麻辣火鍋」嘅名稱，該店位處地牢內，甚為隱蔽，當無客人排隊時，真係唔覺得係一間火鍋店，甚至餐廳。

事實上，「詹記麻辣火鍋」一直以來都受到台灣在地人歡迎，本來就只係得大安區有分店，而總店則位處新北市內，於1994年發跡。近月，「詹記麻辣火鍋」終於喺繁華熱鬧嘅進駐西門町，盛大開幕，並於5月起試業。E.A.Two編輯於6月初前往，故依然能夠清楚見到門口有大量開張花牌，顯現全新登陸西門町，並正式插旗「西門大世界」！室內有10000平方尺，地方偌大，更特別重現90年代台北舊式摩登場景，包括以往西門町「萬年大樓」嘅環境，係一種老式風格，故現場恍如時空穿梭。

入座後，店員會依人數講咩鍋，可以揀鴛鴦鍋。兩種湯底分別係由豬大骨、昆布熬製嘅大骨昆布清湯底，以及由花椒、各式辣椒磨粉、辣椒醬、香油熬製而成嘅麻辣湯底，不包含動物性油脂，例如牛油、雞油、豬油，所以湯底係比較香醇。而1至3人可揀小鍋TWD380，4至6人可揀中鍋TWD500，7人以上可揀大鍋TWD620；小鍋有1道主菜，中鍋有2道主菜，大鍋有3道主菜，而麻辣鍋底內已經包含有鴨血、豆腐，數量上嚟講，其實已經有大概3至4件鴨血。

「詹記麻辣火鍋」嘅麻辣湯別樹一格，既有麻辣風味，但又唔會太嗆鼻癢喉，並非好麻，亦非辣得刺激。湯汁最神奇嘅地方，係溫和得可以直接飲用！不過，當麻辣湯打邊爐滾得太耐，湯汁就會逐漸變鹹。如果湯汁逐漸蒸發，可以請店員加普通湯，但就唔係麻辣湯汁。因為麻辣湯汁係連同鴨血一齊上檯，想要加湯時，只要將浸住鴨血嘅湯汁倒入就得，保持麻辣湯味。

鍋底鴨血TWD220，每一檯只可以加半份鴨血，鴨血即水血，每半份則為TWD110。實際嚟講，一份鍋底鴨血有10件，半份鴨血就有5件，連同本身鍋內麻辣湯底都有3至4件，其實有近20件。雖然表面係有限制，但其實近20件鴨血已經足夠兩個人食用。另外﹐鍋底豆腐一份TWD140，半份則為TWD70，相對於鴨血嚟講，豆腐係比較遜色，雖然係嫩滑，但欠缺凍豆腐或蜂巢豆腐吸附湯汁嘅感覺。

至於全晚主角「詹記麻辣火鍋」鴨血，每件大小相近，四四方方，放入麻辣火鍋湯底內，完全吸附湯汁。鴨血夾起係唔會輕易散開，質感軟嫩，但又夠紮淨。當將鴨血放入口中，一啖咬下，自然知道點解會「詹記麻辣火鍋」鴨血能夠被台灣人叫做最強麻辣鴨血！鴨血不單入味，更會爆汁，入口Q軟無比，內裏水嫩軟滑，直頭滑嫩似果凍狀，的確比以往食過嘅鴨血寧舍出色。

火鍋配料不少，單單肉類已經有幾款，牛肉就包含有美國安格斯牛小排、美國牛五花、美國翼板牛、澳洲牛梅花心、牛胸肉，先揀選美國牛五花一份TWD470，以及美國翼板牛一份TWD550，只係點咗半份。其中，美國安格斯牛小排、美國牛五花油脂較多，澳洲牛梅花心油脂較少，牛胸肉就較有膠質。另外，店內亦有台灣培根豬、台灣松阪豬、台灣特選梅花豬、澳洲小羔羊，其中台灣培根豬、台灣松阪豬油脂較多。

其他配料有黑羽土雞腿、蜂巢牛肚、牛筋、大腸頭、牛雜、毛肚、大草蝦8尾、軟絲（魷魚）等，今次選擇TWD240／6粒、半份TWD120／3粒嘅半份干貝三鮮丸，重有TWD360一份嘅半份蜂巢牛肚，以及台灣先有嘅一份水蓮TWD100。店內飲品並非主打，我哋覺得無咩特別，只係點咗金牌啤酒TWD130、麥茶TWD85。但見隔離檯點咗「草莓莓有派對」沙瓦TWD150，係一種草莓味嘅台灣精釀啤酒，而另一張檯就點咗白菊烏梅湯TWD85，似乎都係值得一試之選。

埋單時，店員會為每檯客人送上手工雪糕，包含有仙草味、梅花山渣味，小小一球雪糕軟腍冰爽，正好為麻辣火鍋解解膩。以呢個份量計，我哋兩個人埋單需TWD2000至2500上落，折合港幣大概係HKD600，換言之人均約HKD300，已經能夠食到台北最強麻辣鴨血，CP值極高！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 用餐時間為2小時，另收加一服務費，人均有TWD580最低消費，接受現金、信用卡、Apple Pay、Android Pay、Samsung Pay、Google Pay付款。醬料櫃有神秘蛋醋，亦有白醋、醬油、香油、辣椒、蒜花、蘿蔔泥等可以選擇。

❷ 大多數情況都要於門口排隊，而且需要排2至3小時。最好預先訂檯，每月份1日12:00起即開放到次月份月底之訂位，訂位會用短訊或line通知。

❸ 如果香港人未能訂檯，建議要避開繁忙時間，唔好喺食飯時間去，比如係夜晚21:00後就會好啲，編輯於22:00左右去，完全無人排隊，但都需要等待10分鐘先有檯。不過，呢個情況就要留意店內最後加點時間為23:49。

❹ 店內係用QR Code點餐，有無線上網。可以免費點一首歌﹐女洗手間更有衛生巾免費取用。

❶ 任何有「半」字嘅配料，即係只可以點半份。

❷ 店內有紅龍杯、小詹杯賣，分別可裝350c.c.及143c.c.液體，價格為TWD699及TWD180。

❸ 乘搭捷運板南線或松山新店線至「西門站」，於6號出口徒步約4分鐘即達。

❹ 西門店為全新分店，「詹記麻辣火鍋」其他分店位於敦南店及新莊店，地址為台北市大安區和平東路三段60號、新北市新莊區新泰路187號，而新莊店則為總店。