近科學園！sensory ZERO 7月聯乘百福推豆腐飯餐白石角海旁Roaster Lab、落地大窗＋榻榻米座位

「sensory ZERO」係本地知名咖啡店，全港目前依然有8間分店，其中位於白石角科學園嘅分店係一間咖啡烘焙研究室，較其他分店獨特，更有榻榻米座位可擇。該店不時會有期間限定菜式，最近更與百福豆腐聯乘，推出豆腐飯套餐，去白石角踩單車不妨拍拖兩個人一試！

白石角科學園嘅「sensory ZERO」分店鄰近海旁，門面甚為寬廣。週邊外牆全以落地大窗設計，採光十足，而且透明度高。室內樓底特高，以金、白色為主調設計，加上門口龍鳳模型裝飾，甚有霸氣。入面既有純白檯櫈，亦特別設由日式榻榻米座位，呼應店內嘅日本風格菜式。

白石角科學園一帶美食甚少，可謂大埔區美食沙漠，「sensory ZERO」就係當中比較有水準嘅小店。雖然該店價格稍高，但至少有穩定水平，而且不時有新菜式或限定菜式推出，保持新鮮感。一般嚟講，大多數香港嘅Cafe都係以西式為主要菜式，意粉、All Day Breakfast等都係常見之選，但「sensory ZERO」除咗有西式選擇，更有日式選擇，更難得係竟然有米到肚，比如係鰻魚滑蛋飯、炸豬扒飯等，選擇眾多，係香港Cafe中比較少見。

最近，「sensory ZERO」與「百福」於7月聯乘推出一款「我係豆腐飯 I‘M NOT RICE」套餐，一份售價$108，連「瑜伽達人」Coffee Lam（林芊妤）都大力推介！套餐內包含有百福「豆腐飯」迷你丼、炸濃豆板豆腐慢煮雞胸藜麥沙律配芝麻汁、唐揚炸雞配黑醋汁，感覺份量不算少。宣傳標句更寫明豆腐飯係比白飯低96%碳水化合物，卡路里及熱量更加比白飯低，每100克就少27%，而且豆腐飯係含有高鈣及高蛋白質，有益健康！豆腐飯只係單純加配蔥花，將豆腐形成粒狀，有白飯感。小食有炸成金黃方形嘅的骰豆腐粒，配搭淋上芝麻醬、質感嘅軟腍慢煮雞胸，更有以黑醋汁煮成嘅唐揚炸雞，雞肉被黑醋汁完全包裹，上面灑上少量芝麻點綴，黑醋汁令賣相上誤以為雞肉炸到燶晒，不過味道酸甜幾開胃，減少炸雞嘅膩感。

店內部份菜式含有創意，比如係以「小智，我一直等著你回來！」為題嘅香燒三黃雞半隻$138，即係半隻嘅燒春雞配薯條沙律，燒雞加入大量香草調味，表皮微脆，香口惹味，雞肉軟腍，略有肉汁。燒雞原隻上，賣相係比較美觀，不過就較難切開食，倒不如直接用手𢲡！本身燒雞其實已經夠味，醬汁反而有啲多餘。店內重有好多菜式，比如係普通啲嘅有煙三文魚菠菜意大利青瓜芥末籽忌廉汁扁意粉$128，而每一款套餐都可以$10加配是日餐湯，當日為蘑菇湯，材料打蘑成蓉後，餐湯變得軟綿綿，內裏同時含有顆粒感。

「sensory ZERO」嘅白石角科學園店既係一間Roaster Lab，即係咖啡烘焙研究室，以香港品版咖啡為主打，似乎對咖啡特別上心。當中有一款痴_線朱古力受到客人歡迎，杯內有大量朱古力，而且賣相打卡味濃，朱古力迷必試！編輯反而揀咗一杯自家製薑汁牛奶咖啡，上面有精緻拉花。而薑蓉及薑汁分開另上，擺放於小匙羹上，自己飲Latte時先將薑蓉及薑汁加入咖啡內，令牛奶咖啡滲出啖啖薑味。另外，該店更與「閣樓釀造」聯乘，可以於店內挑選「閣樓釀造」嘅飲品，比如係有汽香水檸檬鐵觀音。呢杯係自「閣樓釀造」嘅罐裝飲品，但就要$25，價格上有少少貴，倒不如要一杯咖啡。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ sensory ZERO 地址有﹕葵昌路100號KC100地下1號舖、海泓道1號奧海城3期地下G29號舖、廣東道3號海港城馬哥孛羅香港酒店G樓連卡佛、沙田正街18號新城市廣場一期7樓706號舖、黃竹坑道39-43號都會中心1座1樓101號舖、太古城道18號太古城中心地下誠品生活G014號舖、開源道68號觀塘廣場1樓116號舖馬會投注站。

❷ 接受現金、八達通、信用卡付款。另收加一服務費。

❸ 由2024年7月4日至8月31日，掃描QR碼登記成為Nestlé HK eShop會員，埋單時向我哋同事出示成功登記證明即可享「我係豆腐飯 I‘M NOT RICE」套餐85折優惠！

❹ 店內有唔少咖啡豆等售賣。$10加餐湯、$20加甜品、$25加$40以下飲品，$25加自家製蛋糕。